យោងតាមអ្នកវិទ្យាសាស្ត្រឱ្យដឹងថា ទទួលទានដំណេកមិនគ្រប់គ្រាន់មិនត្រឹមតែធ្វើឱ្យអស់លោកអ្នកអស់កម្លាំងប៉ុណ្ណោះទេ ប៉ុន្តែថែមទាំងធ្វើឱ្យឡើងទម្ងន់និងឆាប់ក្រោធខឹងទៀតផង។ ការសិក្សាពិសោធន៍លើមនុស្សមួយក្រុមបង្ហាញថា អ្នកដែលគេតម្រូវឱ្យដេកក្នុងមួយយប់ត្រឹម៥ម៉ោងរយៈមួយសប្តាហ៍ គឺឡើងទម្ងន់០,៩០គីឡូក្រាម ។
ការឡើងទម្ងន់លឿនបែបនេះ ក៏ព្រោះតែពួកគេបង្កើនការទទួលប្រភេទអាហារសម្រន់ដែលសម្បូរដោយកាឡូរី ។ ក្នុងន័យនេះ អ្នកវិទ្យាសាស្ត្រអាចសន្និដ្ឋានបានថា ដំណេកតែមួយមុខមិនមែនជាកត្តាជំរុញឱ្យឡើងទម្ងន់១០០ភាគរយនោះទេ តែគឺប្រភេទអាហារសម្រន់សម្បូរដោយកាបូអុីដ្រាដ ប្រូតេអុីននិងសារធាតុសរសៃឯណោះទៅវិញទេដែលជាដើមចមមួយសំខាន់នាំឱ្យឡើងទម្ងន់ ។
សាស្ត្រាចារ្យ Ken Wright មកពីសាកលវិទ្យាល័យ Colorado Boulder Universityសហរដ្ឋអាមេរិកបានបញ្ជាក់ថា៖ «ខ្ញុំមិនគិតថា ដេកឱ្យបានច្រើនម៉ោងតែមួយមុខអាចធ្វើឱ្យចុះទម្ងន់បានទេ ។ ចំណុចសំខាន់គឺអាស្រ័យលើការទទួលទានផងដែរ ។ និយាយដល់ការឡើងទម្ងន់ពិតជារឿងស្មុគស្មាញ ។ ប៉ុន្តែខ្ញុំគិតថា វានៅតែអាចដោះស្រាយបាន ។ ប្រសិនជាយើងអាចបញ្ចូលដំណេកសុខភាពទៅក្នុងកម្មវិធីបញ្ចុះទម្ងន់និងរក្សាទម្ងន់ដូចដែលការរកឃើញរបស់យើងបានបង្ហាញនោះ ប្រហែលជាអាចធានាឱ្យយើងគ្រប់ៗគ្នាទទួលបានទម្ងន់ខ្លួនស្ថិតក្នុងកម្រិតសុខភាព»។ ចំណែកក្រុមអ្នកវិទ្យាសាស្ត្រមកពីសាកលវិទ្យាល័យ Uppsala University ប្រទេសស៊ុយអែត ក៏បានអះអាងផងដែរថា ដេកមិនគ្រប់គ្រាន់ ធ្វើឱ្យកម្រិតអ័រម៉ូនបញ្ជាការឃ្លានកើនឡើងខ្ពស់ជាហេតុបណ្តាលឱ្យការស្រេកឃ្លានអាហារកើនទ្វេដង ។
ចំណែក ការសិក្សាមួយផ្សេងទៀតបានបង្ហាញថា ទទួលទានដំណេកមិនគ្រប់គ្រាន់ធ្វើឱ្យល្បឿននៃការរំលាយអាហាររបស់មនុស្សថយចុះជាហេតុនាំឱ្យរាងកាយដុតបំផ្លាញកាឡូរីបានតិចតួច និងនាំឱ្យរាងកាយខ្វះថាមពលក្នុងការប្រតិបត្តិកាតព្វកិច្ចងាយៗដូចជា ការដកដង្ហើមនិងការទទួលទានជាដើម ។ មួយវិញទៀត ទទួលដំណេកមិនគ្រប់គ្រាន់នឹងនាំឱ្យយើងទទួលទានអាហារពេលព្រឹកតិច ប៉ុន្តែបង្កើនការទទួលទានប្រភេទអាហារសម្រន់ ៕
ចែករំលែកព័តមាននេះ