រាជធានីភ្នំពេញ៖ ក្នុងពេលតារាចម្រៀងលោកព្រាប សុវត្ថិ បានត្រៀមខ្លួនចេញទៅសម្តែងនៅលើទឹកដីអាមេរិកនាឱកាសបុណ្យចូលឆ្នាំថ្មីប្រពៃណីខ្មែរនោះ អាណិកជនខ្មែរមួយចំនួនបានត្រៀមធ្វើពហិការមិនចូលរួមទស្សនាទេ ។ ការធ្វើពហិការនេះត្រូវប្រភពមួយអះអាងនាពេល ថ្មីៗកន្លងមកថា ដោយសារតែតារាចម្រៀងរូបនេះជាប់ទាក់ទងជាមួយការមានឋានន្តរសក្តិជានាយទាហាន ហើយអាចពាក់ព័ន្ធទៅនឹងបញ្ហានយោបាយ…
រាជធានីភ្នំពេញ៖ ក្នុងពេលតារាចម្រៀងលោកព្រាប សុវត្ថិ បានត្រៀមខ្លួនចេញទៅសម្តែងនៅលើទឹកដីអាមេរិកនាឱកាសបុណ្យចូលឆ្នាំថ្មីប្រពៃណីខ្មែរនោះ អាណិកជនខ្មែរមួយចំនួនបានត្រៀមធ្វើពហិការមិនចូលរួមទស្សនាទេ ។ ការធ្វើពហិការនេះត្រូវប្រភពមួយអះអាងនាពេល ថ្មីៗកន្លងមកថា ដោយសារតែតារាចម្រៀងរូបនេះជាប់ទាក់ទងជាមួយការមានឋានន្តរសក្តិជានាយទាហាន ហើយអាចពាក់ព័ន្ធទៅនឹងបញ្ហានយោបាយ ។
ការព្រមានធ្វើពហិការមិនចូលរួមទស្សនាការសម្តែងរបស់លោកព្រាប សុវត្ថិ ពីអាណិកជនខ្មែររស់នៅអាមេរិកមួយក្តាប់តូចនោះ រងការរិះគន់ និងការមិនពេញចិត្តពីអាណិកជនជាច្រើនដែលគាំទ្រវត្តមានសម្តែងរបស់តារាចម្រៀងរូបនេះ ។
បើយោងតាមការបង្ហោះជាវីដេអូឃ្លីបរបស់ម្ចាស់ហ្វេសប៊ុកមួយដែលឈ្មោះ Sakoun Sok ឲ្យដឹងថា «ការធ្វើពហិការមិនចូលរួមមើលការសម្តែងរបស់តារាចម្រៀងលោកព្រាប សុវត្ថិ នោះគឺជារឿងមិនត្រឹមត្រូវឡើយ ។ បើទោះបីជាអស់លោកខ្លះមិនចង់ចូលរួមការមើលការសម្តែងពីក្មួយព្រាប សុវត្ថិ នោះជាសិទិ្ធគ្រប់គ្រាន់ តែសូមពិចារណា បើទោះបីជាព្រាប សុវត្ថិ គ្រងឯកសណ្ឋានជាទាហាន តែព្រាប សុវត្ថិ មិនដែលធ្វើទុក្ខបុកម្នេញចំពោះនរណាម្នាក់ឡើយ ។ ម្យ៉ាងតារាចម្រៀង ល្បីៗមួយចំនួនទៀតសុទ្ធតែមានឈ្មោះនៅក្នុងជួរកងទ័ពដូចគ្នា អ៊ីចឹងហើយទោះក្មួយព្រាបសុត្ថិ ជាទាហាន តែមិនបានទៅកាប់សម្លាប់ ឬធ្វើទុក្ខចំពោះអ្នកណានោះឡើយ» ។
ប្រភពដដែលឲ្យដឹងថា មានប្រជាជននៅអាមេរិកមួយក្រុមបបួលគ្នាធ្វើពហិការមិនចូលរួមមើលការសម្តែងរបស់លោកព្រាប សុវត្ថិ ពេលមកសម្តែងនៅទីនេះ ។ ពួកគេទាំងនោះកំពុងតែយល់ខុសចំពោះតារាចម្រៀងលោកព្រាប សុវត្ថិ ព្រោះបើគេមិនចង់មើលការច្រៀងរបស់តារាចម្រៀងរូបនេះ ពួកគេគួរតែក៏កុំមើលយូធូប ឬក៏ស៊ីឌីរបស់ក្រុមហ៊ុនហង្សមាស ហេតុអីពួកគេទាំងនោះមកធ្វើត្រឹមនេះ ក្នុងពេលដែលម្ចាស់ឧបត្ថម្ភបានចំណាយលុយជាច្រើន ដើម្បីអញ្ជើញព្រាប សុវត្ថិ មកសម្តែង ។ គោលបំណងតែមួយគត់របស់តារាចម្រៀងលោកព្រាប សុវត្ថិ ទៅសម្តែងនៅអាមេរិក គឺដើម្បីឲ្យជនរួមជាតិខ្មែរបានសប្បាយរីករាយនាឱកាសបុណ្យចូលឆ្នាំខ្មែរ ពោលគឺមិនមែនមកដើម្បីសាបព្រោះនូវនយោបាយណាមួយឡើយ ។
តារាចម្រៀងលោកព្រាប សុវត្ថិ និង កូនៗទាំង៣ រួមទាំងក្រុមភ្លេងលោកផង គ្រោងនឹងទៅសម្តែងជាថ្មីនៅសហរដ្ឋអាមេរិក ក្រោយពីខកខានអស់ពេលប្រមាណ៦ឆ្នាំ ក្រោមការអញ្ជើញពីអតីតតារាចម្រៀងហង្ស ឈា និងអតីតតារាភាពយន្តលោកសុភា ដេវីដ រួមជាមួយ Rising Star Entertainment ។
លោកហង្ស ឈា បានលើកឡើងថា «វាគឺជាព្រឹត្តិការណ៍តន្ត្រីទេសចរណ៍ធំបំផុតនៅអាមេរិក ខណៈពេលលើកនេះក៏វត្តមាន កូនៗគាត់ទាំង៣ ទៀត ដែលពួកគេកំពុងមានការចាប់អារម្មណ៍ខ្លាំងផងដែរ ។
ក្រៅពីលោកព្រាប សុវត្ថិ និងកូនទាំង៣ នៅមានក្រុមភ្លេង និងតារាចម្រៀងស្រីក្នុងក្រុមភ្លេងលោកម្នាក់ទៀត សរុបមានគ្នា៩នាក់ នឹងត្រូវរួមដំណើរជាមួយគ្នាលើកនេះ ។ តាមការរៀបចំ ពួកគេនឹងត្រូវស្នាក់នៅអាមេរិកយ៉ាងតិច២ ទៅ៣ខែ ព្រោះតាមអ្នករៀបចំ ពួកគេមានកាលវិភាគច្រើនដែលត្រូវធ្វើដំណើរសម្ដែងទៅកាន់រដ្ឋ និងទីក្រុងរបស់អាមេរិក ប្រមាណ២០ ។
តាមលោកហង្ស ឈា ក្រុមលោកព្រាប សុវត្ថិ នឹងត្រូវទៅសម្ដែងនៅតាមរដ្ឋ និងទីក្រុងមួយចំនួនដូចជា ទីក្រុងឡូវែល ឡុងប៊ិច បូស្តុន ស្ដុកតុន លីន ហ្វី៊ឡាដែលហ្វ៊ីយ៉ា រដ្ឋផ្លរីដា និងរដ្ឋ ទីក្រុង ធំៗជាច្រើនទៀត ដែលមានខ្មែររស់នៅច្រើន ។
បេសកកម្មនេះ លោកថា ដើម្បីផ្ដល់ភាពសប្បាយរីករាយដល់ជនរួមជាតិខ្មែរជាពិសេសនាឱកាសបុណ្យចូលឆ្នាំខ្មែរប្រពៃណីជាតិ ដែលនឹងមកដល់នៅពាក់កណ្ដាលខែក្រោយ ។ នៅមិនទាន់ដឹងទេថា លោកព្រាប សុវត្ថិ នឹងចាកចេញពីកម្ពុជានៅពេលណាឡើយ ប៉ុន្តែ លោកហង្ស ឈា ថា នៅមិនយូរឡើយ ក្រុមតារាចម្រៀងរបស់កម្ពុជានឹងចាកចេញ ឆាប់ៗនេះ ៕
ចែករំលែកព័តមាននេះ