រាជធានីភ្នំពេញ ៖ សមាជិកសភាអាល្លឺម៉ង់បានសន្យាផ្តល់ព័ត៌មានពិតរបស់កម្ពុជារឿង EBAទៅកាន់បណ្តាភាគីពាក់ព័ន្ធឲ្យបានដឹងច្បាស់ ។ ការសន្យានេះស្របពេលដែលសហគមន៍អឺរ៉ុប (EU) កំពុងដំណើរការនីតិវិធីផ្អាកជាបណ្តោះអាសន្ននូវការអនុគ្រោះពន្ធគ្រប់ប្រភេទលើកលែងតែអាវុធ (EBA) ពីកម្ពុជា ។
លោក Manfred Grund សមាជិកសភាអាល្លឺម៉ង់បានលើកឡើងនៅក្នុងជំនួបជាមួយលោកឈាង វុន ប្រធានគណៈកម្មការកិច្ចការបរទេសសហប្រតិបត្តិការអន្តរជាតិឃោសនាការ និងព័ត៌មាននៃរដ្ឋសភា កាលពីថ្ងៃទី៤ មីនា ឆ្នាំ២០១៩ នៅវិមានរដ្ឋសភាថា ដំណើរទស្សនកិច្ចនៅពេលនេះ គឺដើម្បីសិក្សាស្វែងយល់ និងថ្លឹងថ្លែងបញ្ហា EBA ដើម្បីឲ្យមានការទទួលបានព័ត៌មានស្មើគ្នាពីគ្រប់ភាគីពាក់ព័ន្ធ ។ ដំណើរទស្សនកិច្ចនេះក៏ដើម្បីពង្រឹងកិច្ចសហប្រតិបត្តិការរវាងសភាអាល្លឺម៉ង់ និងសភាកម្ពុជាឲ្យកាន់តែល្អប្រសើរឡើងថែមទៀតផងដែរ ។
លោកបញ្ជាក់ថា«ចំពោះបញ្ហា EBA យើងសន្យាថា នឹងផ្តល់ព័ត៌មានអំពីស្ថានការណ៍នយោបាយ ពិសេសសុខសន្តិភាព និងការអភិវឌ្ឍពិតនៅកម្ពុជាដល់គ្រប់ភាគីពាក់ព័ន្ធ» ។ នៅក្នុងឱកាសនោះផងដែរលោកឈាង វុន បានប្រាប់អំពីស្ថានការណ៍នយោបាយនៅកម្ពុជា ពិសេសសុខសន្តិភាព និងការអភិវឌ្ឍដល់លោក Manfred Grund ។ លោកបានលើកឡើថា កម្ពុជាបានអនុវត្តគោលនយោបាយដឹកនាំប្រទេសតាមបែបលទ្ធិប្រជាធិបតេយ្យសេរីពហុបក្ស ។ កម្ពុជាបានរៀបចំការបោះឆ្នោតរៀងរាល់ប្រាំឆ្នាំម្តងដោយមានគណបក្សជាច្រើនចូលរួមប្រកួតប្រជែងដោយសេរី និងយុត្តិធម៌ ។
លោកប្រធានគណៈកម្មការបានលើកឡើងបន្តថា កម្ពុជាបានឆ្លងកាត់ភ្លើងសង្គ្រាមអស់រយៈពេល៤ទសវត្សរ៍ ។ សង្គ្រាមបានធ្វើឲ្យកម្ពុជាធ្លាក់ចូលក្នុងភាពក្រីក្រ តែក្រោយពីមានកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ កម្ពុជាបានប្រែមុខមាត់ថ្មីមានការអភិវឌ្ឍរីកចម្រើនជាពិសេសនៅក្រោមគោលនយោបាយឈ្នះៗរបស់សម្តេចតេជោ ហ៊ុន សែន កម្ពុជាទទួលបានទាំងសន្តិភាព និងការអភិវឌ្ឍ ។ ឆ្លៀតក្នុងឱកាសនេះផងដែរលោកឈាង វុន បានស្នើដល់សភាអាល្លឺម៉ង់បន្តជួយកម្ពុជាទៅលើគ្រប់វិស័យ និងការបណ្តុះបណ្តាលយុវជនជំនាន់ថ្មី ។
លោកបន្តថា សហគមអឺរ៉ុបមិនគួរយកបញ្ហា EBA ដែលជាបញ្ហាពាណិជ្ជកម្មមកធ្វើជារឿងនយោបាយនៅកម្ពុជានោះទេ ។ ជាការឆ្លើយតបលោក Manfred Grund បានឯកភាពសំណើរបស់លោកឈាង វុន និងបានអះអាងថា នឹងខិតខំពង្រឹងកិច្ចសហប្រតិបត្តិការរវាងសភានៃប្រទេសទាំងពីរឲ្យកាន់តែប្រសើរឡើង ។
សូមបញ្ជាក់ថា ប្រទេសដែលទទួលបានការអនុគ្រោះពន្ធលើគ្រប់មុខទំនិញលើកលែងសព្វាវុធពីសហភាពអឺរ៉ុបមាន៤៩ប្រទេសក្នុងនោះបណ្ដាប្រទេសនៅអាហ្វ្រិកមានចំនួនច្រើនជាងគេ ។ ប្រព័ន្ធអនុគ្រោះពន្ធក្រោមកម្មវិធីទំនិញគ្រប់មុខលើកលែងគ្រឿងសព្វាវុធត្រូវបានសហភាពអឺរ៉ុបបង្កើតឡើង កាលពីឆ្នាំ២០០១ ហើយកម្ពុជាទទួលបានប្រព័ន្ធអនុគ្រោះពន្ធនេះ កាលពីឆ្នាំ២០១២ ក្រោមប្រព័ន្ធអនុគ្រោះពន្ធកម្ពុជាបានរួចផុតពីកាតព្វកិច្ចពន្ធជិត៧រយលានដុល្លារក្នុងមួយឆ្នាំៗ ចំពោះទំនិញនាំចេញទៅទីផ្សារអឺរ៉ុប ៕
ចែករំលែកព័តមាននេះ