រាជធានីភ្នំពេញ ៖ បុរសម្នាក់ដែលគេស្គាល់ថាជាកូនប្រសាលោកមេភូមិ ពេលឃើញកូនស្រីឈ្លោះប្រកែករឿងចតម៉ូតូនិងរថយន្តតាមផ្លូវ ខឹងខ្លាំងពេកឈានចូលទៅទះកំផ្លៀងស្ត្រីម្នាក់ចំនួន៣ដៃ ធ្វើឲ្យស្ត្រីរងគ្រោះប្តឹងសមត្ថកិច្ចអោយជួយអន្តរាគមន៍ បង្កអោយមានការភ្ញាក់ផ្អើលកាលពីវេលាម៉ោង៩និង៣០នាទីយប់ថ្ងៃទី៤ខែ មិនាឆ្នាំ២០១៩ នៅមុខផ្ទះលោកមេភូមិ ដែលស្ថិតនៅភូមិសាមគ្គី២ សង្កាត់ត្រពាំងក្រសាំង ខណ្ឌពោធិ៍សែនជ័យ ។
ជនរងគ្រោះឈ្មោះ កែវ ចាន់វាសនា ភេទស្រី អាយុ២៩ឆ្នាំ មុខរបរបុគ្គលិកហាង រស់នៅភូមិសាមគ្គី២ សង្កាត់ត្រពាំងក្រសាំង ខណ្ឌពោធិ៍សែនជ័យ ។ ចំណែកជនបង្កមិនបានបញ្ជាក់ឈ្មោះនោះទេ ដោយគ្រាន់តែដឹងថាជាកូនប្រសាលោកមេភូមិសាមគ្គី២។
តាមប្រភពព័ត៌មានពីស្ត្រីរងគ្រោះបានបញ្ជាក់ប្រាប់ថា ផ្ទះរបស់គាត់នៅទល់មុខផ្ទះលោកមេភូមិ ហើយមុនកើតហេតុ ពួកគាត់បានទុកម៉ូតូនៅមុខផ្ទះរបស់ខ្លួន ចំណែកជនបង្កដែលជាកូនប្រសាលោកមេភូមិ បាននាំគ្រួសារមកលេងផ្ទះឪពុកក្មេក ដោយទុករថយន្តនៅមុខផ្ទះរបស់ពួកគេផងដែរ បន្ទាប់មកមានរថយន្តមួយគ្រឿងទៀតបានបើកតាមផ្លូវខាងលើ តែបើកទៅមិនរួចទេ ។
ប្រភពដដែលបានបន្តថា ពេលនោះកូនស្រីជនបង្កដែលត្រូវជាចៅលោកមេភូមិបាននិយាយដៀមដាមរឿងទុកម៉ូតូអោយទើសផ្លូវគេបើកបរ ចំណែកជនរងគ្រោះវិញបាននិយាយវិញថា រថយន្ដទុកកណ្តាលផ្លូវមិនទើស បែរជាមកទើសម៉ូតូទុកចិញ្ចើមផ្លូវទៅវិញ ធ្វើឲ្យភាគីទាំងសងខាងនិយាយយកឈ្នះរៀងៗខ្លួនយ៉ាងតឹងសរសៃកដាក់គ្នា និងជេរប្រមាថគ្នាទៅវិញទៅមកផងដែរ ចំណែកឯជនបង្កឃើញកូនស្រីឈ្លោះប្រកែកគ្នា ខឹងពេកបានទះកំផ្លៀងស្ត្រីរងគ្រោះមួយដៃ ធ្វើឲ្យស្ត្រីរងគ្រោះបានជេរទៅជនបង្កមួយម៉ាត់ ស្រាប់តែជនបង្កបានទះកំផ្លៀង២ដៃបន្ថែមទៀត ។
បើតាមសំដីភាគីខាងកូនប្រសាលោកមេភូមិបាននិយាយថា គាត់អត់បានវាយទៅលើស្ត្រីរងគ្រោះនោះទេ គ្រាន់តែប្រតាយប្រតប់គ្នាតិចតួចតែប៉ុណ្ណោះ ។
ចំណែកប្រជាពលរដ្ឋដែលនៅជិតកន្លែងកើតហេតុបានបញ្ជាក់ប្រាប់ថា ពួកគាត់បានឃើញបុរសជាកូនប្រសាលោកមេភូមិខាងលើបានវាយស្ត្រីរងគ្រោះពិតប្រាកដមែន តែពួកគាត់មិនហ៊ាននិយាយឡើយ ព្រោះខ្លាច។
ក្រោយពេលកើតហេតុ សមត្ថកិច្ចនគរបាលប៉ុស្តិ៍ត្រពាំងក្រសាំងបាននាំភាគីទាំងសងខាងទៅប៉ុស្តិ៍ដើម្បីសួរនាំបន្ត ៕
ចែករំលែកព័តមាននេះ