ខេត្តរតនគីរី ៖ បុរសវ័យចំណាស់ម្នាក់ចុះក្នុងរណ្តៅជីកត្បូង ស្រាប់តែបាក់ដីសង្កត់បណ្តាលឱ្យស្លាប់យ៉ាងអាណោចអាធ័ម កាលពីវេលាម៉ោង២និង៣០នាទីរសៀលថ្ងៃទី៣ មីនា ឆ្នាំ២០១៩ ស្ថិតក្នុងភូមិ១ ឃុំឡាមិញ ស្រុកបកែវ…
ខេត្តរតនគីរី ៖ បុរសវ័យចំណាស់ម្នាក់ចុះក្នុងរណ្តៅជីកត្បូង ស្រាប់តែបាក់ដីសង្កត់បណ្តាលឱ្យស្លាប់យ៉ាងអាណោចអាធ័ម កាលពីវេលាម៉ោង២និង៣០នាទីរសៀលថ្ងៃទី៣ មីនា ឆ្នាំ២០១៩ ស្ថិតក្នុងភូមិ១ ឃុំឡាមិញ ស្រុកបកែវ ។
ជនរងគ្រោះដែលស្លាប់ឈ្មោះទីង ហ្វែល ភេទប្រុស អាយុ៥៨ឆ្នាំ ជាជនជាតិដើមភាគតិចទំពួន មុខរបរជីកត្បូងលក់ មានទីលំនៅភូមិត្រំ ឃុំឡាមិញ ស្រុកបកែវ ។
តាមប្រភពពីសាក្សីនៅកន្លែងកើតហេតុបានអោយដឹងថា នៅមុនពេលកើតហេតុ ជនរងគ្រោះបានចុះទៅក្នុងរណ្ដៅដីជីកត្បូងតែម្នាក់ឯងដែលមានជំរៅជាង១០ម៉ែត្រ ស្រាប់តែបានប្រហែល៣០នាទីឃើញមានដីបាក់ ទើបមានការភ្ញាក់ផ្អើលឡើង និងនាំគ្នាជីកកកាយដីដើម្បីជួយសង្គ្រោះ លុះពេលយកជនរងគ្រោះចេញមកបានហើយ ទើបដឹងថាជនរងគ្រោះដាច់ខ្យល់ស្លាប់បាត់ទៅហើយ ។
ប្រភពដដែលបានបន្តថា មូលហេតុបណ្ដាលបាក់ដីនោះគឺមកពីជនរងគ្រោះមិនព្រមយកកំណាត់ឈើទល់ ទើបបណ្ដាលអោយបាក់ដីសង្កត់ស្លាប់បែបនេះ ។
ក្រោយពីកើតហេតុ សមត្ថកិច្ចប៉ូលិសស្រុកបកែវបានចុះទៅដល់កន្លែងកើតហេតុដើម្បីធ្វើការត្រួតពិនិត្យសព និងរណ្ដៅដីដែលជនរងគ្រោះជីករកត្បូង ជាលទ្ធផលរកឃើញថា ជនរងគ្រោះបានជីកដីមានជំរៅជាង១០ម៉ែត្រមានរណ្ដៅដីជាច្រើនជាប់ៗគ្នា ទើបបណ្ដាលអោយដីបាក់សង្កត់ស្លាប់តែម្ដង ។
សមត្ថកិច្ចបានបញ្ជាក់ថា ជនរងគ្រោះពិតជាបានស្លាប់ដោយសារចុះទៅរណ្តៅដីដើម្បីជីកត្បូងហើយបាក់ដីសង្កត់ពីលើប្រាកដមែន គ្មានរឿងឃាតកម្មអ្វីកើតឡើងនោះទេ ។ សមត្ថកិច្ចបានប្រគល់សពជួនក្រុមគ្រួសារដើម្បីយកទៅធ្វើបុណ្យតាមប្រពៃណីបងប្អូនជនជាតិដើមភាគតិចទំពួន ៕
ចែករំលែកព័តមាននេះ