រាជធានីភ្នំពេញ៖ អ្នកសិល្បៈមួយចំនួនទាំងថ្មី ទាំងចាស់ នៅពេលបាត់បង់ឱកាសការងារ ព្រោះញាំញីដោយជំងឺ មានអ្នកខ្លះបានអំពាវនាវសុំការឧបត្ថម្ភពីមហាជន និងសមាគមសិល្បៈ ។ ចំណុចនេះមានមតិមួយចំនួនបានណែនាំគួរត្រៀមទុកសម្រាប់ខ្លួនឯងជាការប្រសើរបំផុត នៅពេលមានលទ្ធភាពរកប្រាក់បាននោះ…
រាជធានីភ្នំពេញ៖ អ្នកសិល្បៈមួយចំនួនទាំងថ្មី ទាំងចាស់ នៅពេលបាត់បង់ឱកាសការងារ ព្រោះញាំញីដោយជំងឺ មានអ្នកខ្លះបានអំពាវនាវសុំការឧបត្ថម្ភពីមហាជន និងសមាគមសិល្បៈ ។ ចំណុចនេះមានមតិមួយចំនួនបានណែនាំគួរត្រៀមទុកសម្រាប់ខ្លួនឯងជាការប្រសើរបំផុត នៅពេលមានលទ្ធភាពរកប្រាក់បាននោះ ។
មួយរយៈចុងក្រោយនេះមានអ្នកសិល្បៈច្រើននាក់ធ្លាក់ខ្លួនឈឺ ហើយប្រឈមនឹងការលំបាកចំពោះថ្លៃព្យាបាល ។ ការផ្តល់ជំនួយ ផ្សេងៗជូនសិល្បករ គឺមហាជនខ្លះគិតថាជាការជួយគ្នាក្នុងគ្រាមានអាសន្ន ។ ប៉ុន្តែនៅមានមតិខ្លះចោទលើអ្នកសិល្បៈថាឱ្យតែឈឺដឹងតែប្រកាសរកជំនួយ ពេលនៅមានកម្លាំងរកលុយបានអត់ចេះទុកដាក់ត្រៀមសម្រាប់ខ្លួនឯង ។
អតីតារាកំប្លែងនាយឃ្លោក ឈ្មោះពិតទុំ សារ៉ុត ជីវិតបានឡើងខ្ពស់ក្លាយជាឧកញ៉ា ។ អ្នកណាៗក៏ដឹងថាលោកមានមុខជំនួញពេញដៃនិងសម្បូរទ្រព្យ ។ នាយឃ្លោក ឡើងដល់ចំណុចនេះ តែមិនមែនងាយទេ គឺនាយតស៊ូជម្នះឧបសគ្គជាច្រើន មិនមែននៅ សុខៗប្រាក់រត់ចូលឬទេវតាប្រទានឲ្យទេ ។
កាលពីពេល ថ្មីៗកន្លងមកនាយឃ្លោកលើកឡើងថា សម្រាប់សិល្បៈសព្វថ្ងៃមានកើតឡើងច្រើនរូបភាព ស្ទើរតែថាអ្វីក៏មាន ។ ជាពិសេសនោះគឺសិល្បករជើងចាស់ជាច្រើនមានជំងឺចូលព្យាបាលនៅមន្ទីរពេទ្យ រហូតដល់ក្រៅប្រទេស។ មានខ្លះទៀតឈឺធ្ងន់រហូតលាចាកលោក ។
នាយឃ្លោកថ្លែងថា«យ៉ាងណាស់ខ្ញុំសុំសរសើរចំណុចមួយគឺការរួបរួមគ្នារបស់មិត្តសិល្បករ ឥឡូវចេះជួយគ្នា រាល់មានទុក្ខធុរៈចាំបាច់ណាមួយឃើញថាស្រុះស្រួលគ្នា ខ្លះក៏បង្ហោះអំពាវនាវទៅ ទាំងអស់នេះជារឿងល្អគេឃើញក៏គេគិតថាយើងសិល្បៈជួយគ្នាទោះជាអ្នកណាថាសិល្បៈសុំតែជំនួយនោះជាមតិរបស់គេសំខាន់ស្នូលខាងក្នុងត្រូវរឹងមាំ »។
ទោះជាយ៉ាងណាក្តីនាយឃ្លោកមានមតិផ្តាំផ្ញើថា«សម្រាប់ខ្ញុំគ្មានអ្វីច្រើនទេគ្រាន់តែមានមតិតិចតួចប្រាប់ដល់តារា ក្មេងៗដែលកំពុងមានកម្លាំង មានទីផ្សាររកបាន គួរសន្សំប្រាក់ទុកដាក់ឲ្យបានត្រឹមត្រូវ មិនត្រូវហ៉ឺហាសម្ភារនិយមហួសកម្រិត ទិញអ្វីដែលមានប្រយោជន៍ ដូចជាដីធ្លីណាតម្លៃ ល្មមៗ ឬបង្កើតមុខរបរណាផ្សេងទៀតបង្កើនចំណូលក្រៅពីសិល្បៈ។
មួយទៀតការផឹកស៊ូចូលហាង ចូលក្លឹបសម្ញែងទ្រព្យឲ្យមិត្តភក្តិដឹង គួរតែកាត់បន្ថយហើយត្រូវចេះថែរក្សាសុខភាពហាត់ប្រាណជាប្រចាំ បើសុខភាពល្អយើងក៏កាន់តែធ្វើការបានយូរទៀត ។ ខ្ញុំមិនមានចេតនាមើលស្រាលតារាស្រីមួយចំនួននោះទេ ប្រសិនបើបានស្វាមីល្អមានទ្រព្យ យសសក្តិ ស្រាប់តែបែកធ្លាយប្រពន្ឋដើមចុងអ្វីនោះ គួរតែសុំត្រឹមតែផ្ទះ១ល្វែងរស់នៅសមរម្យកុំចាំបាច់ផ្ទះវីឡាធំអ្វីឲ្យតែបានផ្ទះល្វែងដាក់ឈ្មោះយើងក៏ជាបុណ្យសំណាង ។ ជាជាងបែកបាក់ស្វាមី អត់ផ្ទះអត់សម្បែង នៅផ្ទះជួល នោះមិនប្រសើរទេ អន់ណាស់ ។ បានផ្ទះ១ល្វែងឈ្មោះយើង ។
ប្រការផ្សេងទៀតបើស្រឡាញ់សិល្បៈពិតត្រូវចេះតស៊ូ ត្រូវមានសីលធម៌ វិន័យ គោរពចាស់ទុំគោរពពេលវេលាគោរព រៀមច្បង នោះក៏ជាការបើកទីផ្សារឲ្យយើងរកប្រាក់ចំណូលចូលហោប៉ៅទុកសន្សំតទៅទៀតដែរ ។ ប្រសិនបើលើសលស់ការផ្តាំផ្ញើនេះខុស ឬត្រូវសូម ប្អូនៗសិល្បករមេត្តាអធ្យាស្រ័យផង »។ នាយឃ្លោក មិនមានគម្រោងវិលរកអាជីពសិល្បៈវិញទេ ៕
ចែករំលែកព័តមាននេះ