សហរដ្ឋអាមេរិក ៖ យោងតាមមេប៉ូលិសមូលដ្ឋានថា មនុស្សយ៉ាងតិច២៣នាក់បានត្រូវស្លាប់ កាលពីថ្ងៃទី៣ មីនា ដោយសារការវាយប្រហាររបស់ខ្យល់ព្យុះកំបុតត្បូងមួយ ដែលបង្កឲ្យមានគ្រោះមហន្តរាយធំធេងនៅរដ្ឋអាឡាបាម៉ាភាគខាងត្បូងសហរដ្ឋអាមេរិក។ កុមារជាច្រើននាក់ស្ថិតក្នុងចំណោមជនរងគ្រោះ រួចមនុស្សច្រើននាក់បានបាត់ខ្លួន…
សហរដ្ឋអាមេរិក ៖ យោងតាមមេប៉ូលិសមូលដ្ឋានថា មនុស្សយ៉ាងតិច២៣នាក់បានត្រូវស្លាប់ កាលពីថ្ងៃទី៣ មីនា ដោយសារការវាយប្រហាររបស់ខ្យល់ព្យុះកំបុតត្បូងមួយ ដែលបង្កឲ្យមានគ្រោះមហន្តរាយធំធេងនៅរដ្ឋអាឡាបាម៉ាភាគខាងត្បូងសហរដ្ឋអាមេរិក។
កុមារជាច្រើននាក់ស្ថិតក្នុងចំណោមជនរងគ្រោះ រួចមនុស្សច្រើននាក់បានបាត់ខ្លួន និងច្រើននាក់ទៀតរងរបួស ក្នុងនោះមួយចំនួនរបួសធ្ងន់បំផុត។ មេប៉ូលិសមូលដ្ឋាន LEE នាភាគខាងកើតរដ្ឋអាឡាបាម៉ា ជាប់ព្រំដែនជាមួយរដ្ឋចចជៀ លោក JAY JONES បាននិយាយថា ពេលនេះចំនួនមនុស្សស្លាប់មាន២៣នាក់។ ខ្ញុំគិតថាចំនួននោះនឹងមានការកើនឡើងថែមទៀត។
ប្រធានាធិបតីអាមេរិកលោកដូណាល់ត្រាំបានបញ្ជូនសារ សម្ដែងមរណទុក្ខជូនចំពោះបណ្ដាគ្រូសារជនរងគ្រោះ។ តាម TWITTER លោកសរសេរថា បណ្ដាព្យុះកំបុតត្បូងនិងព្យុះឯទៀតៗពិតជាខ្លាំងក្លា ហើយអាចបំផ្លាញអ្វីគ្រប់យ៉ាង។
យោងតាមមេប៉ូលិសតំបន់LEEថា ព្យុះកំបុតត្បូងនោះបានបោកបក់ក្នុងចម្ងាយច្រើនគីឡូម៉ែត្រ ហើយបង្កការបំផ្លិចបំផ្លាញប្រកបដោយគ្រោះមហន្តរាយ ក្នុងមុខខ្យល់ប្រវែងប្រមាណ៤០០ម៉ែត្រ។ មេប៉ូលិសរូបនោះលើកឡើងតែពីព្យុះកំបុតត្បូងមួយ ប៉ុន្តែភ្នាក់ងារឧតុនិយមគូសបញ្ជាក់ថា មានច្រើន។ ទូរទស្សន៍CNN និយាយពីព្យុះកំបុតត្បូង២ ដែលវាយប្រហារលើតំបន់LEEដំណាលគ្នា ហើយព្យុះកំបុតត្បូងសរុបយ៉ាងតិច១០ ត្រូវបានកត់សម្គាល់ឃើញនៅរដ្ឋអាឡាបាម៉ានិងរដ្ឋចចជៀនាថ្ងៃទី៣កុម្ភៈ។
យោងតាមផ្នែកឧតុនិយមអាមេរិកថា ព្យុះកំបុតត្បូងដែលវាយប្រហារលើតំបន់LEEជាខ្យល់កំបុតត្បូងប្រភេទ EF-3 មានន័យថា ជាព្យុះកំបុតត្បូងអមដោយកម្លាំងខ្យល់ដល់២១៨ទៅ២៦៦គីឡូម៉ែត្រក្នុងមួយម៉ោង។ បណ្ដារូបភាពផ្សាយតាមទូរទស្សន៍ ឬតាមបណ្ដាញសង្គម បង្ហាញពីបណ្ដាអគារ រងការការខូចខាតធ្ងន់ធ្ងរ ហើយមួយចំនួនត្រូវប៉ើងដំបូលអស់ ឬមានជញ្ជាំងបាក់ បណ្ដាដើមឈើដួលរលំ រួចផ្លូវថ្នល់ទាំងឡាយរាយប៉ាយដោយបំណែកឬកម្ទេចកម្ទី មិនអាចធ្វើចរាចរណ៍បាន។
មនុស្សប្រមាណជា៦០០០នាក់ ពុំមានភ្លើងអគ្គិសនីប្រើប្រាស់ក្នុងតំបន់LEE ហើយការដាច់ភ្លើងក៏ប៉ះពាល់ដល់មនុស្ស១៦.០០០នាក់នៅរដ្ឋចចជៀជិតខាងផងដែរ។ ខ្យល់ព្យុះកំបុតត្បូងជាបាតុភូតស្មុគ្រស្មាញដែលពិបាកព្យាករណ៍ទុកមុនឲ្យបានច្បាស់។ ព្យុះកំបុតត្បូងតែងលាយឡំជាមួយព្យុះខ្លាំងហៅ ORAGES SUPE CELLUAIRES។ ព្យុះកំបុតត្បូងតែងកើតមានច្រើននៅសហរដ្ឋអាមេរិក៕
ចែករំលែកព័តមាននេះ