រាជធានីភ្នំពេញ ៖ រថយន្តបែនដឹកដីមួយគ្រឿងបើកកៀរម៉ូតូម៉ាកហុងដាស្គូពីមួយគ្រឿងបណ្ដាលឲ្យមន្ត្រីយោធាម្នាក់ដែលជាអ្នកបើកបរម៉ូតូដួលរងរបួសធ្ងន់ធ្ងរ ហើយត្រូវបាននគរបាលហៅរថយន្តសង្គ្រោះបន្ទាន់របស់អង្គភាព៧១១ មកដឹកយកទៅកាន់មន្ទីរពេទ្យភ្លាមៗ រីឯអ្នកបើកបររថយន្តបង្កបានរត់គេចខ្លួនបាត់ស្រមោល។
ហេតុការណ៍ខាងលើនេះដែរបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី៤ ខែមីនា ឆ្នាំ២០១៩ នៅលើកំណាត់ផ្លូវវ៉េងស្រេង ខាងលិចភ្លើងស្តុប កែងផ្លូវទួលពង្រ ស្ថិតនៅក្នុងភូមិត្រពាំងថ្លឹង២ សង្កាត់ចោមចៅ១ ខណ្ឌពោធិសែនជ័យ ។
បុរសរងគ្រោះឈ្មោះ ហង្ស សារុន អាយុ៥៧ឆ្នាំ ជាមន្ត្រីយោធាមានឋានន្តរសក្តិវរសេនីយ៍ឯក បម្រើការងារនៅអគ្គបញ្ជាការដ្ឋានកងទ័ពជើងគោក មានទីលំនៅក្នុងភូមិដុតកំបោរ ឃុំព្រះនិព្វាន្ត ស្រុកគងពិសី ខេត្តកំពង់ស្ពឺ ជាអ្នកបើកបរម៉ូតូមួយគ្រឿងម៉ាកហុងដាស្គូពី ពណ៌ក្រហម ពាក់ស្លាកលេខ ភ្នំពេញ ១HE-៧១៥៤ ។
ចំណែករថយន្តបង្កម៉ាកហ៊ីណូ ប្រភេទបែនដឹកដី ពណ៌ខៀវលាយស្លាទុំ ពាក់ស្លាកលេខ ចង្កូតស្តាំ PP-1331 បើកបរដោយបុរសម្នាក់មិនត្រូវបានស្គាល់អត្តសញ្ញាណ បានរត់គេចខ្លួនបាត់។
តាមប្រភពព័ត៌មានបានឲ្យដឹងថា នៅមុនកើតហេតុ ជនរងគ្រោះជិះម៉ូតូមួយគ្រឿងតែម្នាក់ឯង ធ្វើដំណើរក្នុងទិសដៅពីជើងទៅត្បូង លុះមកដល់ត្រង់ចំណុចកើតហេតុ ស្រាប់តែរថយន្តបង្ក បើកបរក្នុងទិសដៅស្របគ្នាកៀរម៉ូតូពីក្រោយ បណ្ដាលឲ្យអ្នកបើកបរម៉ូតូដួលបោកផ្ទប់ថ្នល់រងរបួសធ្ងន់បាក់ជើងឆ្វេង និងបែកក្បាលសន្លប់ស្តូកស្ដឹងតែម្ដង។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះរបស់អង្គភាព៧១១ មកដឹកបញ្ជូនទៅមន្ទីរពេទ្យព្រះកេតុមាលា ហៅ 1-79 ដើម្បីសង្គ្រោះបន្ទាន់ ចំណែករថយន្តបង្កនិងម៉ូតូត្រូវបាននគរបាលចុះទៅពិនិត្យវាស់វែង រួចនាំយកទៅរក្សាទុកនៅអធិការនគរបាលខណ្ឌពោធិ៍សែនជ័យរង់ចាំការដោះស្រាយនៅពេលក្រោយ ៕
ចែករំលែកព័តមាននេះ