ខេត្តបាត់ដំបង ៖ យានដ្ឋានជួសជុល និងលក់គ្រឿងបន្លាស់រថយន្តដ៏ធំមួយកន្លែង ត្រូវអគ្គិភ័យលេបត្របាក់អស់គ្មានសល់ កាលពីវេលាម៉ោងជាង១២រំលងអធ្រាត្រឈានចូលថ្ងៃទី៣មីនា នៅក្នុងភូមិចំការសំរោង១ សង្កាត់ចំការសំរោង ក្រុងបាត់ដំបង ដែលគេមិនទាន់ទម្លាយឲ្យដឹងអំពីមូលហេតុ ។ មន្ត្រីពន្លត់អគ្គិភ័យបានឲ្យដឹងថា យានដ្ឋានជួសជុល និងលក់គ្រឿងបម្លាស់រថយន្តដ៏ធំនោះធ្វើពីដែកប្រក់ស័ង្កសី មានទំហំ១៤ម៉ែត្រគុណនឹង៣០ម៉ែត្រ របស់ឈ្មោះ ឈឹម សុធា ហៅ សៅលិញ ភេទប្រុស អាយុ៤០ឆ្នាំ មានមុខរបរជាជាងជួសជុលរថយន្ត ។
មន្ត្រីដដែលបានប្រាប់ថា នៅក្នុងយានដ្ឋាននេះមានលក់គ្រឿងបម្លាស់រថយន្តគ្រប់ប្រភេទយ៉ាងច្រើនសន្ធឹកសន្ធាប់ និងមានទាំងរថយន្តដែលគេយកទៅជួសជុលផងពេញក្នុងយានដ្ឋានដែលត្រូវខូចខាតដោយសារភ្លើងឆេះ ។ មិនតែប៉ុណ្ណោះអគ្គិភ័យនេះបានឆ្លង រាលដាលធ្វើឲ្យខូចខាតផ្ទះអ្នកជិតខាងមួយខ្នងផងដែរ ប៉ុន្តែគេនូវមិនទាន់ដឹងជាក់លាក់អំពីមូលហេតុ ដែលនាំឲ្យមានអគ្គិភ័យទាំងកណ្ដាលអាធ្រាត្រនេះនៅឡើយទេ ។
ប៉ុន្តែបើតាមព័ត៌មានបឋមពីសមត្ថកិច្ច ដែលបានស្រង់សម្តីម្ចាស់យានដ្ឋានពីដំបូងថា អគ្គិភ័យនេះទំនងផ្ដើមចេញពីការទុស្សេចរន្តអគ្គិសនី ។ ប្រភពដដែលបានបញ្ជាក់ថា ទាំងយានដ្ឋានទាំងទ្រព្យសម្បត្តិ រួមទាំងសម្ភារក្នុងឃ្លាំងផង បានក្លាយជាចំណីព្រះអគ្គីទាំងអស់ដោយមិនអាចរំដោះបានឡើយ តែមិនមានគ្រោះថ្នាក់ដល់មនុស្សណាម្នាក់ទេ ។
លោក រៀម សារ៉េត នាយរងការិយាល័យបង្ការ និងពន្លត់អគ្គិភ័យបានឲ្យដឹងថា អគ្គិភ័យនោះបានចាប់ផ្ដើមឡើងយ៉ាងគំហុកតែម្ដង ដោយសាតែនៅក្នុងយានដ្ឋានមានគ្រឿងជ័រច្រើនរួមទាំងគ្រឿងឆេះ ដូចជាប្រេងឥន្ធនៈ នៅក្នុងរថយន្តដែលយកទៅជួសជុល ។ លោកបានបញ្ជាក់ក្នុងរបាយការណ៍ថា កម្លាំងការិយាល័យជំនាញបានចំណាយទឹកអស់ចំនួន១០រថយន្ត ទើបបង្ក្រាបភ្លើងបានទាំងស្រុង តែទ្រព្យសម្បត្តិនិងគ្រឿងបម្លាស់រថយន្តស្ទើរទាំងអស់បានរងការខូចខាត ។
លោកបានបញ្ជាក់ដែរថា ម្ចាស់យានដ្ឋានហាក់មិនទាន់ឲ្យដឹងពីការខាតបង់មានទំហំទឹកប្រាក់ប៉ុន្មាននោះទេ ហើយក៏មិនទាន់ច្បាស់លាស់អំពីមូលហេតុដែលនាំឲ្យមានអគ្គីភ័យនេះដែរ ។ ប៉ុន្តែយ៉ាងណា បើតាមប្រភពនានាបានបង្ហើបឲ្យដឹងថា អគ្គិភ័យនេះបានធ្វើឲ្យម្ចាស់យានដ្ឋានខាតបង់លុយរាប់ម៉ឺនដុល្លារ ហើយថែមទាំងធ្វើឲ្យ ប៉ះពាល់ផ្ទះអ្នកនៅក្បែរខាងនោះ ដែលមានតម្លៃរាប់ម៉ឺនដុល្លារទៀតផង ។ ពេលនេះសមត្ថកិច្ចកំពុងបន្តការសាកសួរជនរងគ្រោះនៅឡើយអំពីមូលហេតុនៃគ្រោះមហន្តរាយនេះ ៕
ចែករំលែកព័តមាននេះ