ខេត្តព្រះសីហនុ ៖ អូរនៅជុំវិញបឹងព្រែកទប់ បច្ចុប្បន្នត្រូវបានគេពិនិត្យឃើញថា មួយចំនួនធំស្ទើរតែបាត់អត្តសញ្ញាណអស់ទៅហើយ ដោយសារតែមន្ត្រីអ្នកមានលុយ មានអំណាចនិងឧកញ៉ាមួយចំនួនចាក់ដីរំលោភយកធ្វើជាកម្មសិទ្ធិផ្ទាល់ខ្លូន ហើយសកម្មភាពនេះហាក់មានភាពរលូន ដោយមិនឃើញមានមន្ត្រីជំនាញពាក់ព័ន្ធណាចុះទៅពិនិត្យ ដើម្បីមានវិធានការតាមផ្លូវច្បាប់ឡើយ…
ខេត្តព្រះសីហនុ ៖ អូរនៅជុំវិញបឹងព្រែកទប់ បច្ចុប្បន្នត្រូវបានគេពិនិត្យឃើញថា មួយចំនួនធំស្ទើរតែបាត់អត្តសញ្ញាណអស់ទៅហើយ ដោយសារតែមន្ត្រីអ្នកមានលុយ មានអំណាចនិងឧកញ៉ាមួយចំនួនចាក់ដីរំលោភយកធ្វើជាកម្មសិទ្ធិផ្ទាល់ខ្លូន ហើយសកម្មភាពនេះហាក់មានភាពរលូន ដោយមិនឃើញមានមន្ត្រីជំនាញពាក់ព័ន្ធណាចុះទៅពិនិត្យ ដើម្បីមានវិធានការតាមផ្លូវច្បាប់ឡើយ ។
ប្រជាពលរដ្ឋរស់នៅក្នុងក្រុងព្រះសីហនុបាននិយាយថា ការចាក់ដីលុបអូរតំបន់ជុំវិញបឹងព្រែកទប់កន្លងមក រហូតដល់បច្ចុប្បន្ន គេមិនដែលឃើញមានមន្ត្រីជំនាញពាក់ព័ន្ធណាមួយ មានវិធានការទប់ស្កាត់តាមផ្លូវច្បាប់ឲ្យមានប្រសិទ្ធភាពនៅឡើយទេ ដោយអូរមួយចំនួនដែលមានទំហំទទឹង១០ម៉ែត្រទៅ១៥ម៉ែត្រនោះ ត្រូវគេចាក់លុបនៅសល់ទំហំប្រមាណ២ទៅ៣ម៉ែត្រប៉ុណ្ណោះ ហើយអូរខ្លះត្រូវគេចាក់លុបទាំងស្រុងតែម្តង។
ជាក់ស្តែង ដូចជាអូរតំបន់ជិតភូមិគ្រឹះលោក តាក់ វណ្ណថា អតីតស្នងការនគរបាលខេត្ត ស្ថិតក្នុងភូមិ១ សង្កាត់លេខ៣ ក្រុងព្រះសីហនុ(តំបន់បឹងព្រែកទប់) ដែលកន្លងមកត្រូវបានមន្ត្រីជំនាញអះអាងថា ជាអូរធំជាងគេក្នុងចំណោមអូរ ជុំវិញបឹងព្រែកទប់ ហើយស្ថិតក្នុងគម្រោងស្ថាបនាស្ថានីយចម្រោះទឹកស្អុយមុននឹងបង្ហូរចូលបឹងព្រែកទប់ និងបន្តហូរចាក់ចូលសមុទ្រនោះ ប៉ុន្តែបច្ចុប្បន្នត្រូវគេចាក់ដីលុបចង់អស់ទៅហើយ គ្មានវាចានឹងថ្លែងនោះទេ គឺដីអូរទទឹងជិត២០ម៉ែត្រ នៅសល់ប្រមាណតែ២ម៉ែត្រប៉ុណ្ណោះ។
ប្រជាពលរដ្ឋនិយាយទៀតថា អូរមួយខ្សែនេះជាអូរមេ មានសារៈសំខាន់ខ្លាំងណាស់ក្នុងការរំដោះជំនន់ទឹកភ្លៀងដែលជន់លិចក្នុងរដូវវស្សា ពីព្រោះទឹកអូរជាច្រើនមកពីគ្រប់ទិសទីដូចជា ទឹកអូរមកពីតំបន់អនុវិទ្យាល័យសម្តេចឪ តំបន់សេតេ តំបន់ស្រះក្រពើ និងតំបន់វេទិកា៧មករា សុទ្ធសឹងហូរមកចាក់ចូលអូរមួយនេះទាំងអស់ មុននឹងបន្តហូរចូលបឹងព្រែកទប់និងសមុទ្រ ។ ប៉ុន្តែពេលនេះ ចរន្តទឹកហូរអាចកកស្ទះជន់លិចគ្រប់ពេលវេលា ជាពិសេសគឺរដូវវស្សាតែម្តង ដោយសារផ្លូវទឹកហូរតូចចង្អៀត ។
ដូចនេះជាសំណូមពររបស់ប្រជាពលរដ្ឋសង្ឃឹមថា អាជ្ញាធរខេត្ត អាជ្ញាធរក្រុង និងមន្ត្រីជំនាញពាក់ព័ន្ធ នឹងធ្វើការពិនិត្យមើលឡើងវិញ និងមានវិធានតាមផ្លូវច្បាប់ចំពោះជនដែលរំលោភយកដីអូរខាងលើនេះ ។
ទាក់ទិនទៅនឹងបញ្ហានេះ លោក អុី សុខឡេង អភិបាលក្រុងព្រះសីហនុ បានបញ្ជាក់ថា ជុំវិញករណីចាក់ដីលុបអូរនេះ លោកបានឲ្យមន្ត្រីចុះទៅពិនិត្យជាក់ស្តែងហើយ ដើម្បីមានវិធានការតាមផ្លូវច្បាប់ ។ បើពិនិត្យឃើញថា ការចាក់ដីនោះវាធ្វើឲ្យប៉ះពាល់ដល់ដីអូរ គឺអ្នកពាក់ព័ន្ធ ត្រូវតែទទូលខុសត្រូវទាំងស្រុងចំពោះមុខច្បាប់ មិនអាចគេចផុតទេ ។
គួរបញ្ជាក់ថា ថ្មីៗកន្លងមកនេះ ថ្នាក់ដឹកនាំខេត្តបានបង្កើតក្រុមការងារចម្រុះចុះត្រួតពិនិត្យប្រព័ន្ធលូបង្ហូរទឹក អូរ ប្រឡាយ ត្រពាំង និងប្រព័ន្ធប្រព្រឹត្តិកម្មទឹកកខ្វក់ ក្នុងក្រុងព្រះសីហនុ ដែលមាន លោក ជាវ វិជ្ជៈ អភិបាលរងខេត្តុ ជាប្រធានក្រុមការងារ និងមន្ត្រីជំនាញពាក់ព័ន្ធ មន្ទីរអង្គភាពចំនួន១៨ ទូទាំងខេត្ត ក្រុង ស្រុក និងចៅសង្កាត់ មេឃុំទូទាំងខេត្តចំនួន២៩ ជាសមាជិក ។
ការត្រួតពិនិត្យនេះ ក្នុងគោលបំណងរួមគ្នា ទទួលខុសត្រូវនិងធ្វើយ៉ាងណាទប់ស្កាត់រាល់សកម្មភាពរំលោភ
ដីអូរ ប្រឡាយទឹកពីសំណាក់ជនខិលខូច ។ ប៉ុន្តែអ្វីដែលគួរឲ្យកត់សម្គាល់នោះគឺ គណៈកម្មការចម្រុះរបស់រដ្ឋបាលខេត្តដែលទើបបង្កើតនោះដូចជាមិនមានប្រសិទ្ធភាពអ្វីបន្តិចទាល់តែសោះ នៅតែបណ្តែតបណ្តោយឱ្យមានការរំលោភចាក់ដីយ៉ាងអនាធិបតេយ្យដដែល ៕
ចែករំលែកព័តមាននេះ