ខេត្តតាកែវ ៖ ព្រឹកថ្ងៃទី៣ ខែមីនា នគរបាលការិយាល័យព្រហ្មទណ្ទកម្រិតស្រាលខេត្ត បានបញ្ជូនបុរសម្នាក់ទៅកាន់សាលាដំបូងខេត្ត ក្រោយពីបុរសរូបនេះបានទាត់មន្ត្រីជំរឿន៤ជើង ពេលកំពុងបំពេញការងារ ហើយស្ទុះទៅរារាំងចាប់ហែកឯកសាររួចដុតចោលអស់គ្មានសល់ និងថែមទាំងជេរដៀលត្មះថ្នាក់ដឹកនាំទៀតផង ។
យ៉ាងណាក៏ដោយ ទីបំផុតបុរសរូបនេះក៏ត្រូវសមត្ថកិច្ចចាប់វាយខ្នោះ នាំយកទៅចាត់វិធានការតាមច្បាប់ ។ បាតុភាពនេះ បង្កឲ្យមានការភ្ញាក់ផ្អើលកាលពីថ្ងៃទី១ ខែមីនា នៅភូមិត្រពាំងត្រកៀត ឃុំឧត្តមសុរិយា ស្រុកត្រាំកក់ ។ លោកវរសេនីយ៍ឯក យ៉ុង ញីវ នាយការិយាល័យនគរបាលព្រហ្មទណ្ទកម្រិតស្រាលខេត្តបានឱ្យដឹងថា បុរសរូបនេះឈ្មោះ មិន សុក អាយុ៤៩ឆ្នាំ ជាកសិករ រស់នៅក្នុងភូមិ ឃុំខាងលើ ចំណែកមន្ត្រីជំរឿនដែលត្រូវជននេះ ទាត់ឈ្មោះ យ៉ាង សុភាព ភេទប្រុស អាយុ៣៩ឆ្នាំ រស់នៅភូមិរពាក់ពេន ឃុំឧត្តមសុរិ
យា ។
លោកនាយការិយាល័យបញ្ជាក់ថា ក្នុងពេលចុះបំពេញការងារជំរឿន ប្រជាជននៅទីតាំងខាងលើ ស្រាប់ តែជនសង្ស័យរារាំងមិនឱ្យលោកយ៉ាង សុភាព បំពេញឯកសារនិងធ្វើការងារនោះទេ ។ គ្រាន់តែឃើញមន្ត្រីជំរឿនចុះបំពេញការងារភ្លាម ស្រាប់តែជនសង្ស័យទៅដណ្តើមយកឯកសារការងារដែលលោក យ៉ាង សុភាព ចុះធ្វើបានចំនួន៥៧គ្រួសាររួចហើយ និងផែនទីប្លង់ជំរឿនយកទៅហែកនិងដុតចោលទាំងអស់ ។
មិនតែប៉ុណ្ណោះ ជនសង្ស័យថែមទាំងទាត់លោក យ៉ាង សុភាព ដែលជាមន្ត្រីជំរឿនចំនួន៤ជើងទៀតផង ។
លើសពីនេះទៀត ជនសង្ស័យបានជេរដៀលថ្នាក់ដឹកនាំរាជរដ្ឋាភិបាលផងដែរ ។ ក្រោយកើតហេតុ នគរបាលស្រុកបានទៅឃាត់ខ្លួនជននេះ កសាងសំណុំរឿងបញ្ជូនទៅការិយាល័យព្រហ្មទណ្ទកម្រិតស្រាលខេត្ត រួចបញ្ជូនបន្តទៅសាលាដំបូងខេត្ត ។ មិនមានប្រភពណាអះអាងនោះទេថា តើបុរសរូបនេះហេតុអ្វីក៏មានឥរិយាបថបែបនេះ?
ចែករំលែកព័តមាននេះ