ប្រទេសឥណ្ឌា-ប៉ាគីស្ថាន ៖ ការបាញ់តតាំងគ្នាដោយកាំភ្លើងធំ កើតមានយ៉ាងខ្លាំងក្លាកាលពីថ្ងៃទី២មីនា រវាងកងទ័ពឥណ្ឌានិងប៉ាគីស្ថាន បណ្ដាលឲ្យមនុស្សស្លាប់យ៉ាងតិច៧នាក់ទាំងសងខាងនៅព្រំដែនកាស្មៀរ ទោះបីមានការដោះលែងអ្នកបើកយន្តហោះឥណ្ឌាម្នាក់ក្ដី ខណៈប្រទេសទាំង២កំពុងធ្វើសង្គ្រាមឃោសនាយ៉ាងខ្លាំងប្រឆាំងគ្នាផងដែរ។
យោងតាមប្រភពយោធាមួយថា រយៈពេល២៤ម៉ោងចុងក្រោយនេះ ទាហាន២នាក់និងជនស៊ីវិល២នាក់បានត្រូវស្លាប់ខាងផ្នែកប៉ាគីស្ថាន។ ចំណែកខាងឥណ្ឌាវិញនារីម្នាក់និងកុមារ២នាក់បានត្រូវស្លាប់ ដោយសារគ្រាប់ផ្លោងមួយគ្រាប់ធ្លាក់ត្រូវកម្ទេចផ្ទះរបស់ពួកគេ។ ក្នុងតំបន់កាស្មៀរទាំងមូលពួកអ្នកភូមិ នាំគ្នាចូលក្នុងជម្រកការពារ ចំណែកប៉ូលិសហាមឃាត់ការធ្វើចរាចរណ៍មិនចាំបាច់នៅតាមផ្លូវថ្នល់នានា។ ជនស៊ីវិលយ៉ាងតិច១២នាក់បានត្រូវស្លាប់ទាំងសងខាង តាំងពីដើមសប្ដាហ៍មុនមកនៅព្រំដែនរវាងប្រទេសទាំង២។
ម្យ៉ាងវិញទៀតមានវីដេអូមួយអំពីអ្នកបើកយន្តហោះឥណ្ឌា ដែលត្រូវប៉ាគីស្ថានដោះលែងកាលពីថ្ងៃទី១មីនា ដោយក្នុងវីដេអូនោះ អ្នកបើកយន្តហោះរូបនោះបានថ្លែងអំណរគុណ ចំពោះអាជ្ញាធរប៉ាគីស្ថាន នាំឲ្យមានការក្ដៅក្រហាយនិងការខឹងយ៉ាងខ្លាំងនៅឥណ្ឌា ពេលកំពុងមានសង្គ្រាមឃោសនាទាំងសងខាង យ៉ាងក្ដៅគគុកបន្ទាប់ពីភាគីប៉ាគីស្ថាន ចាត់ទុកការដោះលែងនោះថាជា កាយវិការសន្តិភាពមួយ ក្នុងវិបត្តិថ្មីនៅកាស្មៀរ។
វរសេនីយទោរូបនោះដែលយន្ហហោះប្រយុទ្ធធុនMIG-21 របស់គេត្រូវបាញ់ធ្លាក់ ពេលដេញតាមបណ្ដាយន្តហោះប្រដេញប៉ាគីស្ថានពីលើកាស្មៀរ បានដើរឆ្លងកាត់ប៉ុស្តិ៍ព្រំដែន WAGAH នាថ្ងៃទី១មីនា ជាមួយការយឺតយាវជាច្រើនម៉ោងខុសការគ្រោងទុក៕
ចែករំលែកព័តមាននេះ