រាជធានីភ្នំពេញ៖ អ្នកស្រីពៅ ថាវី បានចាប់អាជីពសិល្បៈជិត២០ឆ្នាំមកហើយ ភាគច្រើនដើរតួជាអ្នកស្រែចម្ការ ។ គាត់បានចូលរួមសម្តែងកុនច្រើនរឿង តែជីវភាពមិនធូរធារទេ ។ ដើមហេតុយ៉ាងណាទើបគាត់អាចឈានជើងចូលក្នុងពិភពសិល្បៈ ?
តារាជើងចាស់រូបនេះអ្នកតាខ្មៅហៅគាត់ថាយាយពៅសាច់គោអាំង ព្រោះគាត់ជួលកន្លែងគេលក់សាច់គោអាំង ។ ដោយឃើញគាត់បានវោហារកំប្លុកកំប្លែងគួរឲចង់សើច នាយក្រឹម ក៏ផ្តល់ឱកាសឲ្យគាត់ចូលរួមថតឈុតកំប្លែងឲ្យស្ថានីយទូរទស្សន៍បាយ័ន ។
តារាសម្តែងអ្នកស្រីពៅ ថាវី មានជីវភាពលំបាកស្រាប់តែមានសំណាងឈ្នះរង្វាន់ធំ គឺរង្វាន់ដីចម្ការប៊័រមួយហិកតា ធ្វើឲ្យគាត់រីករាយយ៉ាងខ្លាំង ។
ក្នុងពិធីជប់លៀង និងបើកសម្ពោធគម្រោងលក់ចម្ការ កាលពីយប់ថ្ងៃទី២៧ កុម្ភៈ ២០១៩តារាសម្ដែងជើងចាស់អ្នកស្រីពៅ ថាវី មានសំណាងបានឈ្នះរង្វាន់ធំគឺចម្ការប៊័មួយហិកតានៅក្នុងខេត្តមណ្ឌលគិរី ។ យាយពៅ មិននឹកស្មានថាខ្លួនមានសំណាងបានឈ្នះរង្វាន់ធំបែបនោះទេ ខណៈគាត់ចូលរួមក្នុងពិធីក្នុងនាមជាភ្ញៀវកិត្តិយសប៉ុណ្ណោះ ។
យាយពៅនិយាយថា «ខ្ញុំរំភើបចង់ហោះ ដោយសារតែវ័យកាន់តែចាស់ ហើយអាជីពសម្ដែងក៏ចាប់ផ្ដើមធ្លាក់ចុះទីផ្សារ ខណៈផ្ទះសម្បែង គឺជួលគេនៅទៀត »។
អ្នកសិល្បៈដែលចូលរួមពិធីនោះ ម្នាក់ៗសម្តែងការអបអរយាយពៅដែលមានលាភសំណាង ព្រោះអាណិតគាត់ដែលមានជីវភាពលំបាក ។ កន្លងមកពេលទៅសម្តែង ពេលខ្លះគាត់ជិះកង់បី ពេលខ្លះម៉ូតូឌុប ៕
ចែករំលែកព័តមាននេះ