លោក Allan Zeman ដែលជាវិនិយោគិនអចលនទ្រព្យដ៏ធំមួយក្នុងហុងកុងបានងាកមកចាប់អារម្មណ៍លើវិស័យអចលនទ្រព្យ Phuket ក្នុងប្រទេសថៃយ៉ាងខ្លាំង។ លោកបានបង្កើតក្រុមហ៊ុនរួមរវាង Paradise Group របស់លោក…
លោក Allan Zeman ដែលជាវិនិយោគិនអចលនទ្រព្យដ៏ធំមួយក្នុងហុងកុងបានងាកមកចាប់អារម្មណ៍លើវិស័យអចលនទ្រព្យ Phuket ក្នុងប្រទេសថៃយ៉ាងខ្លាំង។ លោកបានបង្កើតក្រុមហ៊ុនរួមរវាង Paradise Group របស់លោក និងក្រុមហ៊ុន Pacific Century Premium Developments ដើម្បីអភិវឌ្ឍន៍គម្រោងសណ្ឋាគារផ្កាយប្រាំ និងវីឡាប្រណិតៗក្នុងក្រុង Thai Muang ជិតPhuket។
អតីតអគ្គនាយក Ocean Park ម្នាក់នេះបាននិយាយថា “ខ្ញុំបានចាប់ផ្តើមស្រលាញ់ទីនេះព្រោះវាមិននៅឆ្ងាយពេកពីហុងកុង និងវាងាយស្រួលក្នុងការចាកចេញពីជីវិតនៅទីក្រុងដ៏រវល់”។
លោកបានបន្តថា “ខ្ញុំមើលឃើញមានសក្តានុពលយ៉ាងច្រើនក្នុង Phuket។ ទីផ្សារអចលនទ្រព្យនៅទីនេះនឹងបន្តលូតលាស់ទៅទៀត។ ហុងកុងជួបប្រទះនឹងកង្វះដី ហើយអ្វីដែលពួកយើងតែងតែនិយាយគឺអចលនទ្រព្យ“ប្រអប់ស្បែកជើង”របស់ទីក្រុងនោះ។ ខណៈដែលក្នុងប្រទេសថៃវិញ… អ្នកអាចទិញខុនដូ ឬវីឡាមួយដ៏ល្អក្នុងតម្លៃស្មើចំណតរថយន្តមួយក្នុងហុងកុង”។ វិនិយោគិនអាស៊ីដទៃជាពិសេសមកពីប្រទេសចិនបានដើរតាមលោក Zeman មកក្នុងទីផ្សារអចលនទ្រព្យរបស់ប្រទេសថៃ។
យោងទៅតាមធនាគារជាតិថៃបានឲ្យដឹងថា តម្លៃផ្ទះក្នុងទីក្រុងបាងកកបានកើនឡើងយ៉ាងតិចណាស់ក៏ ១០%ដែរក្នុងមួយឆ្នាំតាំងពីឆ្នាំ ២០១០ មក ហើយអតិថិជនចិនគឺជាអ្នកជំរុញធំជាងគេ។ អ្នកស្រី Carrie Law ដែលជាអគ្គនាយកនៃគេហទំព័រ Juwai.com បានឲ្យដឹងថា “ក្នុងទីក្រុងបាងកក ពួកយើងមើលឃើញមានអាផាតមិនថ្មីៗចំនួន ១៥,០០០យូនីតដែលត្រូវបានលក់ទៅឲ្យអតិថិជនមកពីចិនដីគោក និងហុងកុងក្នុងឆ្នាំ ២០១៨ ដែលស្មើពាក់កណ្តាលនៃអចលនទ្រព្យដែលត្រូវបានទិញដោយអតិថិជនបរទេសសរុប”។ ការពឹងផ្អែកយ៉ាងខ្លាំងលើអតិថិជនមកពីប្រទេសចិនដីគោកនេះមានន័យថាវិស័យនេះអាចនឹងទទួលរងការប៉ះពាល់ពីសង្គ្រាមពាណិជ្ជកម្មរវាងសហរដ្ឋអាមេរិកនិងប្រទេសចិន ដែលអាចធ្វើឲ្យអតិថិជនមានការប្រុងប្រយ័ត្នជាងមុន។
ជាមួយគ្នានេះផងដែរ វិធានការថ្មីៗដែលមានគោលដៅកាត់បន្ថយការទិញអចលនទ្រព្យទុកក៏ចាប់មានប្រសិទ្ធិភាពនៅថ្ងៃទី ១ខែមករាឆ្នាំនេះផងដែរ។ យ៉ាងណាក្តី លោក Zeman នៅតែជឿជាក់យ៉ាងខ្លាំងលើប្រទេសថៃនិងបានបន្តថា “វាតែងតែជាពេលល្អក្នុងការទិញអចលនទ្រព្យក្នុងប្រទេសថៃ។ អ្វីដែលល្អពីប្រទេសនេះគឺវាជាកន្លែងអន្តរជាតិ ដែលមានន័យថាពេលដែលអ្នកចង់លក់ អ្នកអាចរកបានអតិថិជនពីជុំវិញពិភពលោក”៕
ចែករំលែកព័តមាននេះ