រាជធានីភ្នំពេញ ៖ ទីប្រឹក្សាសេដ្ឋកិច្ចនិងពាណិជ្ជកម្ម នៃស្ថានទូតចិនប្រចាំនៅកម្ពុជាបានអះអាងថា ការវិនិយោគផ្ទាល់ពីប្រទេសចិន បានចូលរួមយ៉ាងសំខាន់ចំពោះកំណើនសេដ្ឋកិច្ចកម្ពុជា បើគិតចាប់ពីឆ្នាំ១៩៩៤ មកទល់នឹងបច្ចុប្បន្នទំហំនៃការវិនិយោគផ្ទាល់របស់ប្រទេសចិនគឺឈរនៅលំដាប់លើគេ ក្នុងចំណោមការវិនិយោគផ្ទាល់ពីបរទេស។
ទីប្រឹក្សាសេដ្ឋកិច្ចនិងពាណិជ្ជកម្ម របស់ស្ថានទូតសាធារណៈរដ្ឋប្រជាមានិតចិនប្រចាំនៅកម្ពុជា លោកលី អាន បានមានប្រសាសន៍ឲ្យដឹងក្នុងវេទិកាពន្ធដារកម្ពុជា-ចិន ២០១៩ កាលពីថ្ងៃទី២៧ ខែកុម្ភៈ ឆ្នាំ២០១៩កន្លងមកថា វេទិកានេះមានសារៈសំខាន់យ៉ាងខ្លាំង ស្របពេលដែលការវិនិយោគផ្ទាល់ពីប្រទេសចិន បានចូលរួមយ៉ាងសំខាន់ ចំពោះកំណើនសេដ្ឋកិច្ចកម្ពុជា ព្រោះបើគិតចាប់ពីឆ្នាំ១៩៩៤ មកទល់នឹងបច្ចុប្បន្នទំហំនៃការវិនិយោគផ្ទាល់របស់ប្រទេសចិនគឺឈរនៅលំដាប់លើគេ ក្នុងចំណោមការវិនិយោគផ្ទាល់ពីបរទេស។
យោងតាមរបាយការណ៍របស់រដ្ឋាភិបាលបានឲ្យដឹងថា ទុនវិនិយោគចិននៅកម្ពុជាមានទំហំទឹកប្រាក់៦៨០០លានដុល្លារអាមេរិក កាលពីឆ្នាំ២០១៨ ហើយចិនបានវិនិយោគលើវិស័យសំខាន់ៗជាច្រើននៅកម្ពុជា ដូចជា វិស័យសំណង់ និងអចលនទ្រព្យ វិស័យថាមពល វិស័យគមនាគមន៍ វិស័យទេសចរណ៍ និងវិស័យពាណិជ្ជកម្មជាដើម។
ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារលោក គង់ វិបុលបានបញ្ជាក់ឲ្យដឹងផងដែរថា រាជ រដ្ឋាភិបាលបានដាក់ចេញនូវវិធានការដ៏មុតស្រួចមួយចំនួនក្នុងនីតិកាលទី ៦ នៃរដ្ឋសភា ដើម្បីជួយលើកកម្ពស់ភាពប្រកួតប្រជែង និងការកែលម្អបរិយាកាសធុរកិច្ច មានជាអាទិ៍មានដូចជា កាត់បន្ថយថ្លៃអគ្គិសនីចាប់ពីឆ្នាំ២០១៩សម្រាប់អ្នកប្រើប្រាស់ ការបញ្ចប់តួនាទីអចិន្ត្រៃយ៍របស់អគ្គនាយកដ្ឋានកាំកុងត្រូល និងកំពង់ផែ លុបចោលអង្គភាពកម្ពុជាភ្នាក់ងារនាវាចរ (កាំសាប) ការកែសម្រួលការផ្តល់សេវាសាធារណៈរបស់អគ្គនាយកដ្ឋានគយ និងរដ្ឋាករកម្ពុជា និងការរៀបចំការធ្វើវិសោធនកម្មច្បាប់ស្តីពីការវិនិយោគនិងច្បាប់ស្តីពី តំបន់សេដ្ឋកិច្ចពិសេស ព្រមទាំងវិធានការនានាជាច្រើនទៀត។
លោកបន្តថា “អគ្គនាយកដ្ឋានពន្ធដារ ចង់ឃើញសហគ្រាសចិនទាំងឡាយ ដែលបានមកវិនិយោគនៅកម្ពុជារីកចម្រើន លូតលាស់ ធំធាត់ មានប្រាក់ចំណេញ និងប្រកាសមានប្រាក់ចំណេញបង់ជូនរដ្ឋ និងពិតជាមិនចង់ឃើញសហគ្រាសប្រកាសខាត បង់ពន្ធខ្វះ មានបញ្ជីគណនេយ្យ២ឬ៣នោះទេ”។លោកបន្តថា “យើងរំពឹងថានឹងមិនមានការកិបកេងបន្លំពន្ធ ហើយរងការកំណត់ពន្ធឡើងវិញ ទទួលរងពិន័យ ទោសទណ្ឌ ព្រមទាំងការប្រាក់នោះទេ។ បន្ថែមពីលើនេះចាប់ពីខែមករា ឆ្នាំ២០១៩តទៅ ក្រុមហ៊ុនសហគ្រាសចិន នឹងទទួលបាននូវអត្ថប្រយោជន៍ ផ្នែកពន្ធដារបន្ថែមទៀត តាមរយៈការអនុវត្តកិច្ចព្រមព្រៀង នៃការចៀសវាងការយកពន្ធត្រួតគ្នា (DTA) កម្ពុជា- ចិន”៕
ចែករំលែកព័តមាននេះ