រាជធានីភ្នំពេញ ៖ រថយន្តម៉ាកហ៊ីណូដឹកស៊ីម៉ង់ត៍មួយគ្រឿង បើកសុខៗផ្ទុះកង់រេចង្កូតធ្លាក់ផ្លូវបុករះបង្គោលស្លាកសញ្ញាបង្ហាញផ្លូវបាក់រាបដល់ដីចំនួន៧ដើម ហើយរថយន្តជាប់ផុងក្នុងប្រឡាយទៅមុខលែងរួច ។
គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៥ព្រឹកថ្ងៃទី៣ ខែមីនា ឆ្នាំ២០១៩ នៅចំណុចផ្លូវជាតិលេខ៥ ខាងត្បូងអធិការដ្ឋានខណ្ឌព្រែកព្នៅ ក្នុងសង្កាត់សំរោង ខណ្ឌព្រែកព្នៅ ។
រថយន្តមួយគ្រឿងខាងលើម៉ាកហ៊ីណូ ពណ៌ស ពាក់ស្លាកលេខ ចង្កូតស្តាំ PSHN.០៤១៦ ជារថយន្តដឹកស៊ីម៉ង់តិ៍ បើកបរដោយបុរសម្នាក់មិនស្គាល់អត្តសញ្ញាណឡើយ ។
តាមព័ត៌មាននៅកន្លែងកើតហេតុអោយដឹងថា នៅមុនពេលកើតហេតុ គេឃើញរថយន្តម៉ាកហ៊ីណូមួយគ្រឿងមានដឹកស៊ីម៉ងត៍បើកបរមកពីខេត្តបាត់ដំបងក្នុងគោលបំណងចូលរាជធានីភ្នំពេញ លុះពេលមកដល់កន្លែងកើតហេតុ ស្រាប់តែរថយន្តបានផ្ទុះកង់មុខខាងស្តាំ ក៍បានទាញចង្កូតទៅស្តាំដៃធ្លាក់ផ្លូវបុករះបង្គោលស្លាកសញ្ញាបង្ហាញផ្លូវ បណ្តាលអោយបាក់រាបដល់ដីអស់ចំនួន៧ដើម ហើយរថយន្តនោះក៍ជ្រុលចូលប្រឡាយទៅមុខលែងរួច ។
ក្រោយពីកើតហេតុ ម្ចាស់ក៏បានទាក់ទងហៅរថយន្តផ្សេងទៀតមកដឹកស៊ីម៉ងត៍យកចេញទៅ និងស្ទួចយករថយន្តម៉ាកហ៊ីណូបញ្ជូនទៅកាន់ការិយាល័យចរាចរណ៍ផ្លូវគោក ដើម្បីដោះស្រាយសងការខូចខាត៕
ចែករំលែកព័តមាននេះ