ខេត្តកណ្ដាល ៖ អ្នកភូមិជាច្រើននាក់ខ្លះបង់សំណាញ់ និងខ្លះទៀតអូសអួននាំគ្នារាវរកសពក្មេងប្រុសម្នាក់ដោយសង្ស័យថា បានលង់ទឹករណ្ដៅដីដ៏ជ្រៅមួយកន្លែងស្លាប់ បន្ទាប់ពីប្រទះឃើញតែខោខ្លីនៅមាត់ទឹករណ្ដៅដីមួយនោះ បង្កឱ្យមានការភ្ញាក់ផ្អើលកាលពីម៉ោង៩ព្រឹក ថ្ងៃទី៣ ខែមីនា ឆ្នាំ២០១៩…
ខេត្តកណ្ដាល ៖ អ្នកភូមិជាច្រើននាក់ខ្លះបង់សំណាញ់ និងខ្លះទៀតអូសអួននាំគ្នារាវរកសពក្មេងប្រុសម្នាក់ដោយសង្ស័យថា បានលង់ទឹករណ្ដៅដីដ៏ជ្រៅមួយកន្លែងស្លាប់ បន្ទាប់ពីប្រទះឃើញតែខោខ្លីនៅមាត់ទឹករណ្ដៅដីមួយនោះ បង្កឱ្យមានការភ្ញាក់ផ្អើលកាលពីម៉ោង៩ព្រឹក ថ្ងៃទី៣ ខែមីនា ឆ្នាំ២០១៩ ស្ថិតនៅក្នុងភូមិជ្រៃមង្គល ឃុំដំណាក់អំពិល ស្រុកអង្គស្នួល។
ក្មេងប្រុសដែលសង្ស័យថាលង់ទឹកស្លាប់នោះឈ្មោះ ហ៊ាន រ៉ូហ្សា អាយុ១៣ឆ្នាំ មានស្រុកកំណើតនៅក្នុងភូមិដីដុះក្រោម ឃុំព្រែកប្រសព្វ ស្រុកព្រែកប្រសព្វ ខេត្តក្រចេះ សព្វថ្ងៃស្នាក់នៅម្ដុំពោធិ៍ចិនតុង សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ។
បើតាមអ្នកភូមិនិយាយថា កាលពីព្រលប់ថ្ងៃទី២ មីនា ក្មេងប្រុសរងគ្រោះខាងលើបានទៅលេងផ្ទះបងប្អូននៅក្នុងភូមិ-ឃុំកើតហេតុខាងលើជាមួយឪពុកបង្កើត លុះក្រោយមកឪពុកបានត្រឡប់ទៅផ្ទះវិញមុន ចំណែកក្មេងប្រុសរងគ្រោះអត់ទៅជាមួយទេ ដោយរង់ចាំទៅផ្ទះវិញជាមួយពូ។ លុះដលព្រឹកថ្ងៃកើតហេតុ ក្មេងប្រុសរងគ្រោះបានលេងបាល់ជាមួយបងប្អូន និងអ្នកភូមិ បន្តិចក្រោយមកមានក្មេងប្រុសអាយុ១៥ឆ្នាំម្នាក់ទៅងូតទឹករណ្ដៅដីនោះ ហើយក្មេងប្រុសរងគ្រោះស្លៀកតែខោខ្លីអត់ពាក់អាវទេបានរត់ទៅតាមក្រោយដែរ។
ប្រភពខាងលើបន្តទៀតថា លុះពេលទៅដល់ក្មេងប្រុសអាយុ១៥ឆ្នាំម្នាក់នោះចុះហែលទឹកពីត្រើយខាងលិចទៅកាន់ត្រើយខាងកើត ហើយបានស្រែកប្រាប់ទៅក្មេងប្រុសរងគ្រោះកុំឲ្យចុះងូតទឹកអី ប្រយ័ត្នលង់ស្លាប់។ បន្ទាប់មកខណៈដែលក្មងប្រុសអាយុ១៥ឆ្នាំនោះកំពុងហែលទឹកមិនបានមើល ស្រាប់តែបាត់មិនឃើញក្មេងប្រុសរងគ្រោះឡើយ ឃើញតែខោខ្លីនៅមាត់ទឹករណ្ដៅដីនោះប៉ុណ្ណោះ។ ទើបសង្ស័យថា ក្មេងប្រុសរងគ្រោះលង់ទឹកធ្វើឲ្យមានការភ្ញាក់ផ្អើលឆោឡោ ហើយនាំគ្នារាវរក ដោយខ្លះបង់សំណាញ់ និងខ្លះទៀតអូសអួន ប៉ុន្តែរកមិនឃើញឡើយ។
ប្រភពដដែលបន្តថា រណ្ដៅដីមួយនេះ ត្រូវបានឈ្មួញជីកយកអាចម៌ដីលក់ជាច្រើនឆ្នាំកន្លងមកហើយស្ថិតនៅជាប់ភូមិជ្រៃមង្គលនោះតែម្ដង ដែលមានជម្រៅ៣ទៅ៤ប្រម៉ោយអេស្ការវ៉ាទ័រឯណោះ ហើយមានទឹកពេញផងដែរ។ កន្លងមក មានអ្នកភូមិមួយចំនួនតូចប៉ុណ្ណោះដែលចេះហែលទឹក ហើយចុះហែលលេងឆ្លងពីត្រើយម្ខាងទៅត្រើយម្ខាងទៀតបាន ដោយឡែកក្មេងប្រុសរងគ្រោះអត់ចេះហែលទេ ទើបលង់ស្លាប់។
ម្យ៉ាងទៀតក្រោយពីអ្នកភូមិរាវរកមិនឃើញ ក្រុមគ្រួសារបានជួលអ្នកជំនាញមុជទឹកពីផ្សារច្បារអំពៅ ខណ្ឌច្បារអំពៅ ទៅរាវរក ហើយការចរចាគ្នាតាមទូរស័ព្ទអ្នកមុជទឹកទារ៦០០ដុល្លារ ប៉ុន្តែបន្ទាប់ពីតថ្លៃគ្នា ទើបត្រូវរ៉ូវក្នុងតម្លៃ៤០០ដុល្លារ ប៉ុន្តែរហូតដល់វម៉ោងជាង១រសៀលថ្ងៃដដែល អ្នកមុជទឹកនៅមិនទាន់ទៅដល់នៅឡើយ៕
ចែករំលែកព័តមាននេះ