អ្នកវិទ្យាសាស្ត្របានរកឃើញថា ការទទួលទានសាច់មាន់និងស៊ុតប្រហែលជាអាចជួយបន្ថយភាពចាស់របស់ខួរក្បាលមនុស្សបាន។ ស៊ុតត្រូវគេពិនិត្យឃើញថាសម្បូរទៅដោយសារធាតុម្យ៉ាងឈ្មោះ Cholineដែលជាអាហារចិញ្ចឹមរាងកាយមួយប្រភេទស្ថិតនៅក្នុងគ្រួសារវីតាមីន B ។
នេះអាចជាលើកទី១ដែលគេបានឮអំពីផលប្រយោជន៍របស់ស៊ុតក៏ដូចជាសាច់មាន់ ប៉ុន្តែរបបអាហារទាំងឡាយណាដែលសម្បូរទៅដោយសារធាតុ Cholineប្រហែលជាអាចជួយការពារខួរក្បាលរបស់មនុស្សមិនឱ្យចាស់ទៅតាមអាយុ ។ សារធាតុCholineដែលជាអាហារចិញ្ចឹមរាងកាយមួយប្រភេទស្ថិតនៅក្នុងគ្រួសារវីតាមីន Bនេះត្រូវបានគេរកឃើញនៅក្នុងអាហារមួយចំនួនដូចជា សាច់មាន់ ស៊ុត ត្រីទឹកប្រៃនិងពពួកបន្លែមានដូចជាសណ្តែកអង្គុយជាដើម ។
ក្រុមអ្នកស្រាវជ្រាវរបស់សាកលវិទ្យាល័យBoston Universityរបស់សហរដ្ឋអាមេរិកបានពិសោធន៍ឃើញថា អ្នកដែលទទួលអាហារសម្បូរដោយ Cholineច្រើនមានលទ្ធផលល្អប្រសើរនៅក្នុងការពិសោធន៍ការចងចាំនិងមានភាគរយតិចបំផុតក្នុងការប្រឈមនឹងជំងឺវិកលចរិត ។ អ្នកស្រាវជ្រាវជាន់ខ្ពស់ លោកស្រីវេជ្ជបណ្ឌិត Rhauda Auបាននិយាយថា៖«ខ្ញុំគិតថា ការរកឃើញលើកនេះគឺមានន័យថា ទទួលទានរបបអាហារដែលមានផលប្រយោជន៍ដល់រាងកាយក្នុងពាក់កណ្តាលអាយុគឺពិតជាសំខាន់បំផុត»។
តាមអ្នកជំនាញបានលើកឡើងថា ដើម្បីធ្វើឱ្យការចងចាំបានល្អប្រសើរ បុរសជាទូទៅត្រូវការសារធាតុ Choline ប្រមាណជា ៥៥០មិល្លីក្រាមក្នុងមួយថ្ងៃ ខណៈស្ត្រីត្រូវការប្រមាណជា ៤២៥មិល្លីក្រាម ។ អ្នកស្រីវេជ្ជបណ្ឌិត Auបានបញ្ជាក់ថា ការស្រាវបន្ថែមទៀតនឹងធ្វើនៅពេលក្រោយ ៕
ចែករំលែកព័តមាននេះ