បច្ចុប្បន្នមនុស្សរាប់លាននាក់កំពុងប្រឈមនឹងការខូចត្រចៀកស្តាប់មិនឮពីព្រោះតែពួកគេស្តាប់ MP3 Playersដោយបើកសំឡេងឮខ្លាំងៗ។ កាលពីអតីកាល កន្លែងប្រកបអាជីវកម្មការងារដែលមានសំឡេងឮខ្លាំងត្រូវបានគេបន្ទោសថា ជាហេតុបង្កឱ្យមានគ្រោះថ្នាក់ដល់សោតវិញ្ញាណ ប៉ុន្តែលើកនេះ ក្រុមអ្នកស្រាវជ្រាវនៅសាកលវិទ្យាល័យ Michigan University សហរដ្ឋអាមេរិកបានរកឃើញថា សំឡេងរបស់ MP3 Playersគឺមានគ្រោះថ្នាក់ច្រើនជាងសំឡេងរំខាននានា ដោយវាអាចបំផ្លាញសោតវិញ្ញាណរបស់អ្នកស្តាប់បាន ។
ក្រុមជំនាញសុខភាពបានរកឃើញថា ៩ក្នុងចំណោមមនុស្ស១០នាក់ដែលធ្វើដំណើរតាមមធ្យោបាយដឹកជញ្ជូនសាធារណៈ ត្រចៀករបស់គេបានប៉ះនឹងសំឡេងខ្លាំងតាមរយៈខ្សែខ្សឹបម៉ាស៊ីន MP3 Palyersជាជាងសំឡេងចេញពីបរិស្ថាននៅជុំវិញខ្លួន ។ នេះក៏ព្រោះតែខ្សែខ្សឹបទាំងនោះមិនជិតត្រចៀកបណ្តាលឱ្យអ្នកស្តាប់បន្ថែមវ៉ូលីមឱ្យខ្លាំងដើម្បីទប់មិនឱ្យឮសំឡេងខាងក្រៅ ។
លោកសាស្ត្រាចារ្យ Rick Neitzel បាននិយាយថា «វាពិតជាភ្ញាក់ផ្អើលដែល២ក្នុងចំណោមមនុស្ស៣នាក់ប្រឈមនឹងសំឡេងខ្លាំងដោយការស្តាប់តន្ត្រី ។ ខ្ញុំតែងតែគិតថា កន្លែងប្រកបអាជីវកម្មការងារដែលមានសំឡេងឮខ្លាំងគឺជាដើមហេតុនៃគ្រោះថ្នាក់ ប៉ុន្តែតាមរយៈការសិក្សាលើកនេះនាំឱ្យយើងដឹងបានថា ការផ្តោតការយកចិត្តទុកដាក់តែលើកន្លែងប្រកបអាជីវកម្មមួយចំនួននោះ គឺមិនទាន់គ្រប់គ្រាន់ឡើយ»។
សូមបញ្ជាក់ថា លទ្ធផលនៃការសិក្សាលើកនេះ អ្នកវិទ្យាសាស្ត្របានពិសោធលើមនុស្សប្រមាណជា៤.៥០០នាក់នៅក្នុងទីក្រុងញូវយ៉កដោយចំណាយពេលអស់ប្រហែលជា៣៨០ម៉ោង ។ ពួកគេរកឃើញថា អ្នកដែលធ្វើដំណើរតាមរថភ្លើងឬរថយន្តក្រុងប្រឈមនឹងសំឡេងពី៧២ទៅ៨១ដេស៊ីប៊ែល( decibels-ឯកតារង្វាស់សំឡេង) ។
ជាការប្រៀបធៀប សំឡេងមនុស្សនិយាយគ្នាជាមធ្យមឮក្នុងកម្រិត ៦០ដេស៊ីប៊ែល ខណៈសំឡេងចរាចរណ៍អ៊ូអរនៅនៅតាមដងផ្លូវមានកម្រិត៨០ដេស៊ីប៊ែល ។ ចំណែកសំឡេងកូនក្មេងយំមានកម្រិត១១៥ដេស៊ីប៊ែល ។ លោកសាស្ត្រាចារ្យ Neitzelបានបញ្ជាក់ថាមនុស្សជាច្រើនកំពុងតែប្រឈមនឹងសំឡេងដែលស្ថិតក្នុងកម្រិតគ្រោះថ្នាក់ ៕
ចែករំលែកព័តមាននេះ