ខេត្តបន្ទាយមានជ័យ ៖ កម្លាំងមូលដ្ឋានកងរាជអាវុធហត្ថក្រុងប៉ោយប៉ែតបានចាប់ឃាត់ខ្លួនជនសង្ស័យប្រព្រឹត្តហិង្សា ដោយសហព័ទ្ធបញ្ជូនមកបញ្ជាការដ្ឋានកងរាជអាវុធហត្ថខេត្ត ហើយបានរៀបចំសំណុំរឿងបញ្ជូនតាមនីតិវិធីច្បាប់នៅថ្ងៃទី០២ ខែមីនា ឆ្នាំ២០១៩ ។
លោកវរសេនីយទោ ព្រហ្ម ថេង ប្រធានមន្ទីរយុត្តិធម៌បានឲ្យដឹងថាថ្ងៃទី០១ ខែមីនា ឆ្នាំ២០១៩ វេលាម៉ោង២និង៥២នាទីរសៀលនៅចំណុចភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មានអំពើហិង្សាកើតឡើងបង្កដោយឈ្មោះភិន កុយ ភេទ ប្រុស អាយុ២៤ឆ្នាំ នៅចំណុចភូមិប្រជាធម្មលិច សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ។
ក្រោយកើតហេតុស្ត្រីរងគ្រោះជាប្រពន្ធឈ្មោះ ផល សៀក (ហៅម៉ាប់) ភេទស្រី អាយុ២៣ឆ្នាំ បានប្តឹងឈ្មោះភិន កុយ ភេទប្រុស អាយុ២៤ឆ្នាំ ត្រូវជាប្តីដែលជាមនុស្សញៀនគ្រឿងញៀន កន្លងមក តែងតែរករឿងឈ្លោះទាស់ទែងក្នុងគ្រួសារ ហើយថែមទាំងវាយដំមកលើខ្លួននាងរងគ្រោះជាញឹកញាប់ ពេលនេះដោយស៊ូទ្រាំលែងបាន នាងក៏នាំកូនរត់ទៅរស់នៅជាមួយម្តាយបង្កើតរបស់ខ្លួន ។ ហើយនៅថ្ងៃកើតហេតុប្តីហេង ស៊យ បានមករកនាង ដើម្បីនាំកូនទៅលេងស្រុក តែខ្លួនមិនព្រមឲ្យក៏មានការប្រតាយប្រតប់គ្នា ពេលនោះជនសង្ស័យបានខាំដៃរបស់ជនរងគ្រោះ ហើយចាប់បោកផ្តួលទៅនឹងដី និងបានវាយជាច្រើនដៃចំផ្ទៃមុខរបស់ជនរងគ្រោះទៀតផង ។
លោកវរសេនីយទោ ព្រហ្ម ថេង ប្រធានមន្ទីរយុត្តិធម៌បានបញ្ជាក់ឲ្យដឹងថាក្រោយពីទទួលបណ្តឹងជនរងគ្រោះជាប្រពន្ធកម្លាំងមូលដ្ឋានកងរាជអាវុធហត្ថក្រុងដឹកនាំដោយលោកវរសេនីយទោ អ៊ុ សាខន នាយរងសេនាធិការប្រចាំទិសមូលដ្ឋានកងរាជអាវុធហត្ថក្រុងប៉ោយប៉ែត បានចុះប្រតិបត្តិការបង្ក្រាបចាប់ឃាត់ខ្លួនជនសង្ស័យមកសួរនាំ ជនសង្ស័យបានឆ្លើយសារភាពថា ខ្លួនពិតជាបានប្រព្រឹត្តដូចការចោទប្រកាន់របស់ប្រពន្ធខ្លួនពិតប្រាកដមែន ។
ដោយផ្អែកលើចម្លើយសារភាពរបស់ជនសង្ស័យ និងយោងតាមការបំភ្លឺរបស់ជនរងគ្រោះ និងនិត្យរកឃើញនូវសារធាតុញៀន បច្ចុប្បន្នកម្លាំងជំនាញកងរាជអាវុធហត្ថខេត្ត បានកសាងសំណុំរឿងបញ្ជូនជនសង្ស័យទៅតុលាការ ដើម្បីចាត់ការទៅតាមនីតិវិធីហើយដែរ ៕
ចែករំលែកព័តមាននេះ