ខេត្តព្រះសីហនុ ៖ ប្រឡាយអូរនៅជុំវិញបឹងព្រៃកទប់ បច្ចុប្បន្នត្រូវបានគេពិនិត្យឃើញថា មួយចំនួនធំស្ទើរតែបាត់អត្តសញ្ញាណអស់ទៅហើយ ដោយសារតែការចាក់ដីលុបពីសំណាក់មន្ត្រីមានលុយ មានអំណាច និងឧកញ៉ាមួយចំនួនតូចរំលោភយកជាកម្មសិទ្ធិផ្ទាល់ខ្លូន ដោយបញ្ហានេះ ហាក់មានភាពរលួនមិនមានមន្ត្រីជំនាញពាក់ព័ន្ធណាចុះទៅពិនិត្យ ដើម្បីមានវិធានការតាមផ្លូវច្បាប់អ្វីនោះឡើយ ។
ប្រជាពលរដ្ឋរស់នៅក្រុងព្រះសីហនុ បាននិយាយថា ការចាក់ដីលុបអូរតំបន់ជុំវិញបឹងព្រៃកទប់កន្លងមក រហូតដល់បច្ចុប្បន្ន គេមិនដែលឃើញមានមន្ត្រីជំនាញពាក់ព័ន្ធណាមួយមានវិធាន ការទប់ស្កាត់លើផ្លូវច្បាប់ឲ្យមានប្រសិទ្ធភាពនៅឡើងទេ ដោយអូរមួយចំនួនដែលមានទំហំធំទទឹង១០ម៉ែត្រទៅ១៥ម៉ែត្រនោះ ត្រូវគេចាក់លុបនៅសល់ទំហំប្រមាណ២ទៅ៣ម៉ែត្រប៉ុណ្ណោះ ហើយអូរខ្លះត្រូវគេចាក់លុបទាំងស្រុងតែម្តង ។
ជាក់ស្តែងដូចជាអូរតំបន់ជិតភូមិគ្រឹះលោក តាក់វណ្ណថា អតីតមេស្នងការដ្ឋាននគរបាលខេត្តព្រះសីហនុ ស្ថិតក្នុងភូមិ០១ សង្កាត់លេខ០៣ ក្រុងព្រះសីហនុ (តំបន់បឹងព្រែកទប់) ដែល កន្លងមក ត្រូវបានមន្ត្រីជំនាញអះអាងថា ជាអូរធំជាងគេក្នុងចំណោមអូរជុំវិញបឹងព្រៃកទប់ ហើយអូរចំណុចនេះ គឺស្ថិតក្នុងគំរោងសាងសង់ស្ថានីយចម្រោះទឹកសំអុយ មុននឹងបង្ហូរចូលបឹងព្រៃកទប់ និងបន្តហូរចាក់ចូលសមុទ្រនោះ ប៉ុន្តែសំរាប់ពេលនេះ អូរដ៏ធំមួយនេះត្រូវបានចាក់ដីលុបចង់អស់ទៅហើយ គ្មានវាចានឹងថ្លែងនោះទេ គឺដីអូរទទឹងទំហំជិត២០ម៉ែត្រ នៅសល់ប្រមាណ២ម៉ែត្រតែប៉ុណ្ណោះ។
ទាក់ទិនទៅនឹងបញ្ហានេះ លោក អ៊ី សុខឡេង អភិបាលនៃគណៈអភិបាលក្រុងព្រះសីហនុ លោកបានបញ្ជាក់ថា ជុំវិញករណីចាក់ដីខាងលើនេះ លោកបានឲ្យមន្ត្រីចុះទៅពិនិត្យជាក់ស្តែងហើយ ដើម្បីមានវិធានការតាមផ្លូវច្បាប់ ហើយបើពិនិត្យឃើញថា ការចាក់ដីនោះវាធ្វើឲ្យប៉ះ ពាល់ដល់ដីអូរនោះ អ្នកពាក់ព័ន្ធត្រូវតែទទួលខុសត្រូវទាំងស្រុងចំពោះមុខច្បាប់ និងត្រូវកាយចេញមិនអាចគេចផុតនោះទេ។
ចែករំលែកព័តមាននេះ