ខេត្តបាត់ដំបង ៖ អគ្គីភ័យបានឆេះយានដ្ឋានជួសជុលរថយន្តមួយកន្លែងអស់គ្មានសល់ បង្កការភ្ញាក់ផ្អើលកាលពីវេលាម៉ោងជាង១២រំលងអាធ្រាត្រឈានចូលថ្ងៃទី៣ មីនា ឆ្នាំ២០១៩ នៅចំណុចភូមិចំការសំរោង១ សង្កាត់ចំការសំរោង ក្រុងបាត់ដំបង ដែលគេសង្ស័យបណ្ដាលមកពីទុស្សេខ្សែភ្លើង ។
សមត្ថកិច្ចបានឲ្យដឹងថា យានដ្ឋានជួសជុលរថយន្តដែលត្រូវអគ្គីភ័យលេបត្របាក់ទាំងកណ្ដាលអាធ្រាត្រនោះ ធ្វើអំពីឈើ ដែក និងប្រក់ស័ង្កសី តែមិនទាន់អាចដឹងពីទំហំនៃការខូចខាតនៅឡើយទេ។ សមត្ថកិច្ចបានរាយការណ៍ថា ម្ចាស់យានដ្ឋានដ៏ធំនេះឈ្មោះឈឹម សុធា ហៅ សៅលិញ ភេទប្រុស អាយុ៤០ឆ្នាំ មានមុខរបរជាជាងជួសជុលរថយន្ត នៅចំណុចកើតហេតុខាងលើ។
បើតាមសមត្ថកិច្ចបានស្រង់សំដីម្ចាស់យានដ្ឋានបានឱ្យដឹងថា អគ្គីភ័យនេះទំនងផ្ដើមចេញពីការទុស្សេខ្សែភ្លើង។
ប្រភពដដែលបានបញ្ជាក់ថា ទាំងយានដ្ឋាន ទាំងទ្រព្យសម្បត្តិ រួមទាំងសម្ភារៈផ្សេងៗផងនោះ បានក្លាយជាចំណីព្រះអគ្គីអស់ទាំងស្រុង តែមិនមានគ្រោះថ្នាក់ដល់មនុស្សណាម្នាក់នោះេទ ។ ក្នុងហេតុការណ៍ខាងលើនោះ រថយន្តពន្លត់អគ្គីភ័យរបស់សមត្ថកិច្ចបានចុះអន្តរាគមន៍ទាំងយប់ព្រោងព្រាតផងដែរ។
ទោះយ៉ាងណា មន្ត្រីជំនាញមិនទាន់មានរបាយការណ៍ស្ដីពីការខូចខាតនៅឡើយ ព្រោះពេលនេះមន្ត្រីជំនាញកំពុងសាកសួរម្ចាស់យានដ្ឋាននោះនៅឡើយ៕
ចែករំលែកព័តមាននេះ