ខេត្តប៉ៃលិន ៖ ពិតជាមានការសោកស្តាយខ្លាំង ខណៈផ្ទះប្រជាពលរដ្ឋក្រីក្រ១ខ្នងសង់ពីឈើប្រ ក់ស័ង្កសីត្រូវបានអគ្គីភ័យលេបត្របាក់អស់រលីងគ្មានសល់សូម្បីសម្ភារក្នុងផ្ទះ ដោយសារតែជនរងគ្រោះជាប់រវល់ទៅស៊ីឈ្នួលដកដំឡូងមីឱ្យគេចាក់សោទុកចោលក៏ត្រូវភ្លើងឆេះអស់តែម្តង ។
ហេតុការណ៍អគ្គីភ័យឆេះផ្ទះប្រជាពលរដ្ឋអស់រលីងនេះបានកើតឡើងកាលពីវេលាម៉ោង៥និង៣០នាទីល្ងាច ថ្ងៃទី០១ ខែមីនា ឆ្នាំ២០១៩ ស្ថិតនៅចំណុចក្បែរខ្ទមអ្នកតា ក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ដោយសារគ្មានអ្នកនៅផ្ទះ ។
ប្រភពព័ត៌មានពីនគរបាលក្រុងប៉ៃលិនបានឱ្យដឹងថា ម្ចាស់ផ្ទះមានឈ្មោះ សារី មករា ភេទប្រុស អាយុ៣១ឆ្នាំ ជាកសិករ មានប្រពន្ធឈ្មោះ វ៉ាន់ សូយ អាយុ២៩ឆ្នាំ ទទួលរងការខូចខាតអស់សម្ភារចានឆ្នាំ អង្ករ សម្លៀកបំពាក់ និងរបស់របរផ្សេងៗទៀតទាំងស្រុង ។
ប្រភពបន្តទៀតថា មុនពេលកើតហេតុគេឃើញជនរងគ្រោះប្តីប្រពន្ធបាននាំគ្នាដាំបាយហូបរួចធ្វើដំណើរទៅស៊ីឈ្នួលដកដំឡូងមីឱ្យថៅកែម្នាក់នៅឆ្ងាយពីផ្ទះដោយចាក់សោទុកចោល លុះត្រឡប់មកដល់ផ្ទះវិញស្រាប់តែឃើញឆេះខ្ទេចខ្ទីសល់តែផេះផង់ប៉ុណ្ណោះ បណ្តាលឱ្យតក់ស្លុត និងមានការសោកស្តាយយ៉ាងខ្លាំង ។
ប្រភពបញ្ជាក់ថា ករណីខាងលើនេះគឺមិនទាន់ដឹងពីមូលហេតុច្បាស់លាស់នៃការឆេះផ្ទះរបស់ ជនរងគ្រោះនៅឡើយទេ បច្ចុប្បន្នកម្លាំងប៉ុស្តិ៍នគរបាលអូរតាវៅកំពុងធ្វើការស្រាវជ្រាវនៅកន្លែងកើតហេតុ ៕
ចែករំលែកព័តមាននេះ