រាជធានីភ្នំពេញ៖ តារាចម្រៀងប្រចាំផលិតកម្មថោនអ្នកនាងប៊ូ ស្រីរ័ត្ន ហៅនីរត្តន៍ បានសម្រេចចុះសំបុត្រអាពាហ៍ពិពាហ៍ជាប្តីប្រពន្ធស្របច្បាប់ជាមួយបុរសអាណិកជនខ្មែររស់នៅប្រទេសអូស្ត្រាលី ។ ការចុះសំបុត្រអាពាហ៍ពិពាហ៍ និងបំពាក់ចិញ្ចៀននេះបានធ្វើឡើងនៅប្រទេសអូស្ត្រាលីកាលពីថ្ងៃទី២៧ ខែកុម្ភៈ ឆ្នាំ២០១៩ ដោយមានការចូលរួមពីសាក្សីដឹងឮ ។
តារាចម្រៀងនីរត្តន៍ បានភ្ជាប់ពាក្យជាមួយបុរសអាណិកជនដោយរៀបពិធីនៅក្នុងប្រទេសកម្ពុជាកាលពីអំឡុងខែកក្កដាឆ្នាំ២០១៨ ។ បន្ទាប់ពីនោះមកជា រឿយៗនាងតែងតែទៅជួបគូដណ្តឹង និងគ្រួសារនៅប្រទេសអូស្ត្រាលីជាញឹកញាប់ ។
រូបភាពនៃពិធីចុះសំបុត្រអាពាហ៍ពិពាហ៍របស់តារាចម្រៀងប៊ូ ស្រីរ័ត្ន ហៅនីរត្តន៍ ត្រូវគេបង្ហោះតាមហ្វេសប៊ុក ជាមួយនឹងសារសម្តែងការអបអរសាទរពីមិត្តភក្តិ និងប្រិយមិត្តគាំទ្រ ។ អ្នកគាំទ្រជាច្រើនបានបង្ហាញគោលបំណងចង់ឃើញតារាចម្រៀងរូបនេះរៀបការម្តងទៀតនៅក្នុងប្រទេសកម្ពុជា បើទោះបីជាស្វាមី និងក្រុមគ្រួសារខាងប្រុសមានសញ្ជាតិ និងការងារនៅក្នុងប្រទេសអូស្ត្រាលីក៏ដោយ ។ ឆ្លើយតបទៅនឹងបញ្ហានេះម្ចាស់បទ«វ៉ល់ វ៉ល់» អ្នកនាង នីរត្តន៍ បញ្ជាក់ថា ពិធីមង្គលការរបស់នាងនឹងធ្វើឡើនៅក្នុងប្រទេសអូស្ត្រាលីដដែល ពោលទំនងជាមិនអាចរៀបចំនៅស្រុកខ្មែរទេ ។
ប៊ូ ស្រីរ័ត្ន ហៅនីរត្តន៍ និយាយថា «មូលហេតុដែលនាងខ្ញុំមិនអាចធ្វើពិធីនៅស្រុកខ្មែរបាននោះ គឺដោយសារម្តាយក្មេករបស់នាងខ្ញុំមានភារៈមើលថែកូនតូច ដោយមិនអាចមកស្រុកខ្មែរបាន »។
នីរត្តន៍ មិនបានបញ្ជាក់ឲ្យច្បាស់នៅឡើយទេថា បន្ទាប់ពីការចុះសំបុត្រអាពាហ៍ពិពាហ៍នេះរួចហើយ នាង និងស្វាមីនឹងរៀបចំពិធីជប់លៀងមង្គលការធំដុំនៅប្រទេសអូស្ត្រាលីនាពេលណានៅឡើយទេ ។ ជាងនេះទៅទៀតគេនៅមិនទាន់ដឹងច្បាស់នៅឡើយដែរថា នីរត្តន៍ អាចនឹងវិលមកកាន់អាជីពចម្រៀងវិញ ឬយ៉ាងណាឡើយ បន្ទាប់ពីនាងបានសាងជីវិតគ្រួសារនៅឯនាយសមុទ្រនាពេលនេះ ៕
ចែករំលែកព័តមាននេះ