ខេត្តបន្ទាយមានជ័យ ៖ មនុស្សមួយក្រុមរត់បាតជើងសព្រៀតចោលម៉ូតូទាំងយប់ ហើយត្រូវជនសង្ស័យមួយក្រុមកាប់បំផ្លាញម៉ូតូបង្កភ្ញាក់ផ្អើលកាលពីវេលាម៉ោងជិត១០យប់ថ្ងៃទី២៨ កុម្ភៈ ឆ្នាំ២០១៩ នៅភូមិព្រៃព្រិច (ខាងជើងដើមស្រល់ទឹកដីកាស៊ីណូ) សង្កាត់ប៉ោយប៉ែត ក្រុងប៉ោយប៉ែត ។
ជនរងគ្រោះឈ្មោះស៊ុន សុខថេត ភេទប្រុស អាយុ១៩ឆ្នាំ រស់នៅស្រុកសំពៅលូន ខេត្តបាត់ដំបង ជាម្ចាស់ម៉ូតូមួយគ្រឿងម៉ាកR15 ស៊េរីឆ្នាំ២០១៧ ត្រូវជនសង្ស័យកាប់ម៉ូតូចំនួន៣កាំបិត ចំណែកជនរងគ្រោះម្នាក់ទៀតឈ្មោះជា ភាព ភេទប្រុស អាយុ២០ឆ្នាំ ជាម្ចាស់ម៉ូតូមួយគ្រឿងម៉ាកMSX ត្រូវក្រុមជនសង្ស័យកាប់បំផ្លាញម៉ូតូនៅនឹងកន្លែងកើតហេតុ។
តាមប្រភពព័ត៌មានពីជនរងគ្រោះឈ្មោះស៊ុន សុខថេត បានប្រាប់ឱ្យដឹងថា មុនពេលកើតហេតុ គាត់ និងមិត្តភក្តិសរុបមានគ្នា៥នាក់ទៅក្រុងប៉ោយប៉ែតដើម្បីចូលរួមពិធីភ្ជាប់ពាក្យមិត្តភក្តិម្នាក់ទៀត លុះពេលចប់កម្មវិធីក៏នាំគ្នាទៅអង្គុយលេងនៅកន្លែងកើតហេតុខាងលើ ។
ប្រភពដដែលបានបន្តថា ពេលពួកគាត់កំពុងនាំគ្នាអង្គុយផឹកនោះ ស្រាប់តែឃើញមនុស្សមួយក្រុមជិះម៉ូតូ៥ទៅ៦គ្រឿងមកឈប់លើដងផ្លូវបេតុងក្បែរនោះ រួចទាញសុទ្ធតែដាវសាម៉ូរ៉ៃយកចេញពីក្នុងអាវដើរតម្រង់មករកពួកគាត់ ធ្វើឱ្យពួកគាត់ភ័យរត់ចូលផ្ទះអ្នកស្រុកដើម្បីគេចខ្លួន។
ពាក់ព័ន្ធនឹងករណីខាងលើនេះដែរ នគរបាលការពារព្រំដែនគោកលេខ៩១១ប៉ុស្តិ៍បឹងសាគូនិងនគរបាលប៉ុស្តិ៍រដ្ឋបាលសង្កាត់ប៉ោយប៉ែតបានចុះដល់កន្លែងកើតហេតុដើម្បីសួរនាំជនរងគ្រោះ និងការពារក្រុមជនរងគ្រោះឲ្យធ្វើដំណើរចេញពីកន្លែងកើតហេតុដោយសុវត្ថិភាព ហើយអះអាងថានឹងស្រាវជ្រាវរកមុខសញ្ញាជនសង្ស័យយកមកផ្តន្ទាទោស ក្រោយពីទទួលបានពាក្យបណ្តឹងរបស់ជនរងគ្រោះកាលពីព្រឹកថ្ងៃទី១ មីនា ឆ្នាំ២០១៩នេះ៕
ចែករំលែកព័តមាននេះ