រាជធានីភ្នំពេញ ៖ មន្ត្រីជំនាញបានអះអាងថា មនុស្សយ៉ាងតិចជាង២ម៉ឺននាក់បានដាក់ពាក្យ ទទួលបានបណ្ណបើកបររថយន្តថ្មី នៅឆ្នាំ២០១៨កន្លងមកនេះ ។ ការផ្តល់បណ្ណបើកបរជូនប្រជាពលរដ្ឋមានការកើនឡើង ឬថយចុះ គឺអាស្រ័យទៅលើសមត្ថកិច្ច…
រាជធានីភ្នំពេញ ៖ មន្ត្រីជំនាញបានអះអាងថា មនុស្សយ៉ាងតិចជាង២ម៉ឺននាក់បានដាក់ពាក្យ ទទួលបានបណ្ណបើកបររថយន្តថ្មី នៅឆ្នាំ២០១៨កន្លងមកនេះ ។ ការផ្តល់បណ្ណបើកបរជូនប្រជាពលរដ្ឋមានការកើនឡើង ឬថយចុះ គឺអាស្រ័យទៅលើសមត្ថកិច្ច បើចំខែណា សមត្ថកិច្ចរឹតបន្តឹងច្បាប់ចរាចរណ៍ខ្លាំងប្រជាពលរដ្ឋនាំគ្នាសម្រុកទៅធ្វើច្រើន ។
ប្រជាពលរដ្ឋរស់នៅក្នុងរាជធានីភ្នំពេញអាយុចាប់ពី១៨ឆ្នាំឡើងមានជាង៩សែននាក់ ប៉ុន្តែអ្នកមានបណ្ណបើកបររថយន្តមានតែជាង២សែននាក់ប៉ុណ្ណោះ ក្នុងនោះផុតសុពលភាពមានប្រមាណជាង៣ម៉ឺននាក់ថែមទៀត ។
លោក ឡូវ នីកូវឌ្ឍនា ប្រធានអង្គភាពផ្តល់បណ្ណបើកបរ និងសុវត្ថិភាពចរាចរណ៍ផ្លូវគោកនៃមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា ក្នុងរយៈពេល១ឆ្នាំកន្លងមក គឺគិតពីខែមករា ដល់ខែធ្នូ ឆ្នាំ២០១៨ អង្គភាពរបស់លោកបានផ្តល់បណ្ណបើកបររថយន្តជូនប្រជាពលរដ្ឋបានចំនួន៥៨.៩៨៥ បណ្ណ ក្នុងនោះមានប្រឡងយកបណ្ណថ្មីចំនួន២២.១៥២បណ្ណ និងប្តូរ ឬពន្យាបណ្ណដែលហួសសុពលភាពមានចំនួន៣៦.៨៣៣បណ្ណ ។ លោកបន្តថា បណ្ណបើកបររថយន្តជិត៦ម៉ឺនសន្លឹកក្នុងនោះមានប្រឡងយកបណ្ណថ្មី ពន្យា និងជ្រុះបាត់បណ្ណត្រូវបានអង្គភាពផ្តល់បណ្ណបើកបរ និងសុវត្ថិភាពចរាចរណ៍ផ្លូវគោកនៃមន្ទីរសាធារណការ និងដឹកជញ្ជូន រាជធានីភ្នំពេញផ្តល់ជូនប្រជាពលរដ្ឋក្នុងឆ្នាំ២០១៨កន្លងមក ។
យោងតាមរបាយការណ៍របស់មន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា ក្នុងរយៈពេល១០ឆ្នាំគិតពីថ្ងៃទី០៣ មេសា ២០០៧ដល់ខែធ្នូ២០១៨ អង្គភាពផ្តល់បណ្ណបើកបរ និងសុវត្ថិភាពចរាចរណ៍ផ្លូវគោកបានផ្តល់បណ្ណបើកបររថយន្តជូនប្រជាពលរដ្ឋបានចំនួន២៧៤.៤៧២បណ្ណ ក្នុងនោះប្រឡងយកបណ្ណថ្មី និងពន្យាបណ្ណដែលហួសសុពលភាព និងសម្រាប់ឆ្នាំ២០១៨ មានចំនួន៥៨.៩៨៥ សន្លឹក ។
របាយការណ៍បានបញ្ជាក់ថា ប្រជាពលរដ្ឋរស់នៅក្នុងរាជធានីភ្នំពេញអាយុចាប់ពី១៨ឆ្នាំឡើង មានជាង៩សែននាក់ ប៉ុន្តែអ្នកមានបណ្ណ បើកបររថយន្ត មានតែជាង២សែននាក់ប៉ុណ្ណោះ ក្នុងនោះផុតសុពលភាពប្រមាណជាង៣ម៉ឺននាក់ថែមទៀត ។ ទាក់ទិន្នទៅនឹងការទទួលប្តូរ និងពន្យារបណ្ណបើកបរនៅផ្សារទំនើប AEON MALL រាជធានីភ្នំពេញ លោកឡូវ នីកូវឌ្ឍនា បានឲ្យដឹងថា ជាលទ្ធផលក្រុមការងារទទួលធ្វើបានចំនួន៣០.៦៥៧បណ្ណ ក្នុងនោះប្តូរ ឬពន្យារបានចំនួន២៦.៩១៥បណ្ណ ទុតិយតា ឬបណ្ណ ដែលបាត់មានចំនួន៣.០៦៥ បណ្ណ និងប្រឡងយកបណ្ណបើកបរថ្មី បានចំនួន៦៧៧បណ្ណផងដែរ ។
លោកបានបញ្ជាក់ថា បើតាមលទ្ធភាពក្រុមការងារធ្វើបានរាប់រយក្នុងមួយថ្ងៃ ដោយហេតុថា ការធ្វើបណ្ណបើកបរដែលរៀបចំឡើងដោយក្រសួងសាធារណការនេះមានលក្ខណៈទំនើប គឺបម្រើសេវារហ័សទាន់ចិត្ត ប្រើរយៈពេលតែ២០នាទីប៉ុណ្ណោះ សម្រាប់មនុស្សម្នាក់ នេះប្រសិនបើមានឯកសារគ្រប់គ្រាន់ ។ ចំពោះការផ្តល់សេវាធ្វើជារៀងរាល់ថ្ងៃចាប់ពីផ្សារបើក និងបិទទៅវិញ និងទទួលសម្រាប់២៥រាជធានី ខេត្ត ឬទូទាំងប្រទេស និងទទួលប្តូរបណ្ណបើកបរសម្រាប់ជនបរទេសផងដែរ ។
ប្រធានអង្គភាពផ្តល់បណ្ណ័បើកបរ សូមអំពាវនាវជាពិសេសប្រជាពលរដ្ឋណាដែលមានបណ្ណបើកបរហើយ តែផុតសុពលភាព និងអ្នកដែលជ្រុះបាត់បណ្ណ សូមឲ្យរួសរាន់ទៅប្តូរ ឬពន្យាឲ្យបានគ្រប់ៗគ្នានៅផ្សារទំនើប AEON MALLទាំងទី១ និងទី២ ដោយមិនចាំបាច់ប្រើពេលយូឡើយ ៕
ចែករំលែកព័តមាននេះ