ខេត្តប៉ៃលិន ៖ រហូតមកដល់ពេលនេះ អាជ្ញាធរខេត្តប៉ៃលិនបានស្នើដល់អាជ្ញាធរក្រុង-ស្រុក ឃុំ-សង្កាត់ ខិតខំសហការ និងជំរុញដល់វិស័យឯកជនក្នុងនោះមាន ក្រុមហ៊ុន កាស៊ីណូ សណ្ឋាគារ…
ខេត្តប៉ៃលិន ៖ រហូតមកដល់ពេលនេះ អាជ្ញាធរខេត្តប៉ៃលិនបានស្នើដល់អាជ្ញាធរក្រុង-ស្រុក ឃុំ-សង្កាត់ ខិតខំសហការ និងជំរុញដល់វិស័យឯកជនក្នុងនោះមាន ក្រុមហ៊ុន កាស៊ីណូ សណ្ឋាគារ ផ្ទះសំណាក់ជាដើម ត្រូវចូលរួមសហការជាមួយមន្ទីរផែនការខេត្ត ធ្វើការស្រង់ស្ថិតិបុគ្គលិករបស់ខ្លួនឱ្យបានត្រឹមត្រូវ និងច្បាស់លាស់ ដើម្បីធ្វើឱ្យដំណើរការជំរឿននាពេលខាងមុខទទួលបានជោគជ័យទៅតាមផែនការគ្រោងទុក ស្របតាមគោលនយោបាយរបស់រាជរដ្ឋាភិបាល ។
កិច្ចប្រជុំនេះបានធ្វើឡើងនៅក្នុងសាលប្រជុំក្រុមប្រឹក្សាខេត្ត កាលពីព្រឹកថ្ងៃទី២៦ ខែកុម្ភៈ ឆ្នាំ២០១៩ ដោយមានការអញ្ជើញចូលរួមពីអភិបាលរងខេត្ត លោក លោកស្រី នាយក នាយករងរដ្ឋបាលសាលាខេត្ត ថ្នាក់ដឹកនាំមន្ទីរផែនការខេត្ត ព្រមទាំងអាជ្ញាធរមូលដ្ឋានផងដែរ។
លោក ផាន់ ចាន់ធុល អភិបាលខេត្ត បានឱ្យដឹងថា ការធ្វើជំរឿនទូទៅប្រជាជននៅឆ្នាំ២០១៩ ពិតជាមានសារៈសំខាន់ ដើម្បីដឹងពីស្ថិតិ ស្ថានភាព ប្រជាជន និងងាយស្រួលរៀបចំយុទ្ធសាស្ត្រ គោលនយោបាយ អោយបានត្រឹមត្រូវ ដែលជាអត្ថប្រយោជន៍សម្រាប់ជនរួមជាតិ និងប្រទេសជាតិទាំងមូល ។ លោកក៏បានផ្ដាំផ្ញើដល់មន្ត្រីជំនាញ អ្នកពាក់ព័ន្ធទាំងអស់ និងអាជ្ញាធរមូលដ្ឋាន ត្រូវរួមគ្នាអនុវត្តន៍នូវការងារជំរឿនទូទៅ ប្រជាជនខេត្តប៉ៃលិននេះ ដោយត្រូវប្រើប្រាស់នូវមធ្យោបាយ ធនធាន ដែលមានដើម្បីឲ្យការងារជំរឿនឆ្នាំ២០១៩នេះ សម្រេចជោគជ័យ តាមផែនការដាក់ចេញរបស់ថ្នាក់ជាតិ ក៏ដូចជា រាជរដ្ឋាភិបាលកម្ពុជា ជាពិសេសត្រូវធ្វើការផ្សព្វផ្សាយអោយបានទូលំទូលាយពីការធ្វើជំរឿនដល់ប្រជាពលរដ្ឋ ដើម្បីអោយពួកគាត់សហការជាមួយក្រុមការងារ ងាយស្រួលចុះអនុវត្តការងារជាក់ស្តែងមានប្រសិទ្ធភាពខ្ពស់។
លោក ទឹម សុខធីម ប្រធានមន្ទីរផែនការខេត្ត បានឱ្យដឹងថា នៅថ្ងៃទី២៨ ខែកុម្ភៈ ឆ្នាំ២០១៩ ខាងមុខនេះ មន្ទីរផែនការខេត្តនឹងធ្វើការបណ្តុះបណ្តាលដល់បណ្តាវិស័យឯកជនទាំងអស់នៅក្នុងខេត្ត ឱ្យយល់ពីសារៈសំខាន់នៃការធ្វើជំរឿន ហើយការជំរឿនទូទៅរបស់ប្រជាជនកម្ពុជានាឆ្នាំ២០១៩នេះ មានរយៈពេល១០ថ្ងៃ ចាប់ពីថ្ងៃទី៣ ដល់១៣ ខែមីនា ឆ្នាំ២០១៩ ដើម្បីធ្វើការប្រមូលយកព័ត៌មានមូលដ្ឋានអំពីប្រជាជាតិសាស្ត្រ សេដ្ឋកិច្ចសង្គម និងវប្បធម៌របស់មនុស្សម្នាក់ៗ ព្រមទាំងព័ត៌មានអំពីអគារដែលកាន់កាប់ដោយគ្រួសារ ស្ថានភាពលំនៅដ្ឋាន និងសម្ភារៈប្រើប្រាស់នៅក្នុងគ្រួសារ ហើយគោលបំណងនៃការធ្វើជំរឿននេះមានសារៈប្រយោជន៍ដល់វិស័យផ្សេងៗ គឺមិនត្រឹមតែសម្រាប់ការគ្រប់គ្រងរដ្ឋបាលប៉ុណ្ណោះទេ តែក៏សម្រាប់ឲ្យរាជរដ្ឋាភិបាលព្យាករណ៍ធ្វើគោលនយោបាយប្រជាជន ធ្វើផែនការលំនៅដ្ឋាន ការកែលម្អសម្ភារៈប្រើប្រាស់សេដ្ឋកិច្ច ផែនការអភិវឌ្ឍន៍កាត់បន្ថយភាពក្រីក្រ រួមនឹងក្នុងជំនួញពាណិជ្ជកម្ម ឧស្សាហកម្ម និងវិស័យស្រាវជ្រាវខាងប្រជាជនជាដើម ៕
ចែករំលែកព័តមាននេះ