ខេត្តបាត់ដំបង ៖ សម្ដេចក្រឡាហោម ស ខេង បានមានប្រសាសន៍ថា លោកសម រង្ស៊ី ពេលនេះកំពុងស្ថិតក្នុងទិដ្ឋភាព២យ៉ាង ចំពោះផែនការវិលចូលស្រុកខ្មែរវិញរបស់គាត់… គឺទិដ្ឋភាពទី១-សម រង្ស៊ី មិនមែនចូលមក ដើម្បីប្រកួតប្រជែងការបោះឆ្នោត ឬបង្កើតគណបក្សប្រឆាំងស្របច្បាប់ជាធរមានណាមួយនាពេលខាងមុខទេ… ហើយទិដ្ឋភាពទី២-គាត់គឺជាទណ្ឌិត(អ្នកទោស) ។ នេះជាសណ្ឋានភាពរបស់គាត់ គឺអីចឹង..! ដូច្នេះ ផែនការត្រឡប់ចូលស្រុកខ្មែរវិញរបស់គាត់ គឺមានគោលដៅបំផ្លាញសុខសន្តិភាព ស្ថិរភាព និងបំផុសបំផុលពលរដ្ឋ ដើម្បីឱ្យចូលរួមធ្វើបដិវត្តពណ៌ ។
សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសូងមហាផ្ទៃបានថ្លែងលាតត្រដាងអំពីផែនការទុច្ចរិតរបស់លោកសម រង្ស៊ី បែបនេះ នៅព្រឹកថ្ងៃទី២៨ កុម្ភៈ ក្នុងពេលដែលសម្ដេចអញ្ជើញជាអធិបតីក្នុងពិធីបិទ«សន្និបាតបូកសរុបការងារប្រចាំឆ្នាំ២០១៨ និងលើកទិសដៅការងារសម្រាប់ឆ្នាំ២០១៩ របស់រដ្ឋបាលខេត្តបាត់ដំបង» ។ សម្ដេចក្រឡាហោមបានមានប្រសាសន៍ថា សម រង្ស៊ី ជាជនជាតិខ្មែរ ដូច្នេះយើងគ្មានសិទ្ធិរារាំងជនជាតិខ្មែរណាម្នាក់ មិនឱ្យវិលចូលស្រុកខ្មែរនោះទេ តែគាត់ (សម រង្ស៊ី) ជាទណ្ឌិត..។ ប៉ុន្តែយើងចង់សួរថា បើគាត់មិនមែនមកប្រកួតប្រជែងការបោះឆ្នោត… មិនមកធ្វើបក្សនយោបាយប្រឆាំង… តើមកធ្វើអ្វី ?
នៅក្នុងអង្គពិធីសន្និបាត សម្ដេច ស ខេង បានលើកឡើងថា «បើសម រង្ស៊ី មក… គឺមកដើម្បីបំផុសបំផុល ចលនាក្នុងប្រទេសឱ្យវឹកវរ ច្របូកច្របល់បំផ្លាញសុខសន្តិភាព ស្ថិរភាព ហើយដឹកនាំធ្វើបដិវត្តពណ៌ តែប៉ុណ្ណឹង ។ នេះជាគោលដៅគាត់..! អុីចឹង យើងស្វាគមម៍គាត់ទេ បើមករបៀបចឹង ? នេះមិនទាន់និយាយពីគាត់ជាទណ្ឌិតផង»។ សម្ដេចបានពន្យល់ត្រង់ចំណុចនេះថា «ទណ្ឌិតក៏អាចចូលស្រុកខ្មែរវិញបានដែរ តែបើចូលមកគេឃុំខ្លួន ។ មិនមែនតែ សម រង្សី ម្នាក់ទេ ឲ្យតែជាទណ្ឌិតត្រូវគេចាប់ទាំងអស់ហ្នឹង.! នេះជាបញ្ហាដែលខ្ញុំចង់អំពាវនាវដល់អស់លោក លោកស្រី ដើម្បីបានជំរាបជូនដល់ប្រជាពលរដ្ឋ ។ ជាពិសេស អ្នកដែលធ្លាប់គាំទ្រ សម រង្ស៊ី ដែលតែងប្រកាសវិលចូលស្រុកខ្មែរជាបន្តបន្ទាប់.! តើសម រង្ស៊ី នាំពេជ្រ នាំមាស មកជាមួយប៉ុន្មាន ? គឺប្រហែលនាំមកតែភាពអន្តរាយចូលស្រុកខ្មែរទេ»។
ជុំវិញផែនការទុច្ចរិតវិលចូលស្រុកខ្មែររបស់លោកសម រង្ស៊ី នេះ សម្ដេចក្រឡាហោមស ខេង បានអំពាវនាវនៅចំពោះមុខមន្ត្រីរដ្ឋបាលខេត្ត ជាង១,០០០នាក់ ដោយស្នើឲ្យធ្វើការផ្សព្វផ្សាយពន្យល់ឲ្យបាន ជ្រាបដល់ប្រជាពលរដ្ឋដែលធ្លាប់គាំទ្រអតីតបក្សប្រឆាំង ដើម្បីឲ្យពួកគាត់បានយល់អំពីផែនការខ្មៅងងឹតនេះ។ សម្ដេច ស ខេង បានលើកជាសំណួរដែរថា តើសម រង្ស៊ី មកបានឬមិនបាន ? មកដោយរបៀបណា ? មកក្នុងស្ថានភាពបែបណា ? នេះមិនមែនមក ដើម្បីសន្តិភាពទេ គឺមកដើម្បីបំផ្លាញសន្តិភាព..! អីចឹង យើងគួរស្វាគមន៍គាត់ទេ ? គឺអត់ទេ..។ សម្ដេចបានសង្កត់ធ្ងន់ថា រឿងសម រង្ស៊ី មកបានឬមិនបាន មិនមែនចំណុះលើសម រង្ស៊ី ទេ ហើយរឹតតែមិនមែនចំណុះលើបក្សពួកសម រង្ស៊ី ដែរ.. គឺវាចំណុះនៅលើយើង (រដ្ឋាភិបាល) លើកត្តាផ្ទៃក្នុង..! តើយើងគ្រប់គ្រងបញ្ហាផ្ទៃក្នុងបានប៉ុនណា ? ។
ត្រង់ចំណុចនេះ សម្ដេចក្រឡាហោម ស ខេង ហាក់ចង់បង្ហាញពីភាពអន់ខ្សោយខ្លះៗនៃមន្ត្រីបច្ចុប្បន្ន ដូច្នេះនេះថា ត្រង់នេះសុំកត់សម្គាល់ឲ្យបានច្បាស់.. កន្លងមក យើងបានបង្ហាញពីភាពអសកម្មច្រើន បញ្ហារសើបច្រើន។ ដូចជាបញ្ហាពុករលួយ បញ្ហាគ្រឿងញៀន ចោរលួចចោរប្លន់ ទំនាស់ដីធ្លី បញ្ហារំលោភអំណាច ការប្រព្រឹត្តហិង្សាផ្សេងៗ ។ល។ សម្ដេចបានបញ្ជាក់ថា នេះជាចំណុចអសកម្មភាព ដែលជាការក្រាលព្រហ្មសម្រាប់ទុកឱ្យ សម រង្ស៊ី វិលត្រឡប់ចូលស្រុកវិញ ។ ប៉ុន្តែបើយើងអត់មានបញ្ហាអ្វីទេ.. ដេកចាំទៅ..។
សម្ដេចបានរិះគន់ថា សព្វថ្ងៃនេះ សម រង្ស៊ី អស់តម្លៃ បាត់ឥទ្ធិពល ទាំងក្នុងមជ្ឈដ្ឋានអ្នកធ្លាប់គាំទ្រ ក្នុងប្រទេសនិងក្រៅប្រទេស ទាំងក្នុងមជ្ឈដ្ឋានអន្តរជាតិ ។ ដូច្នេះ ដើម្បីស្ដារជីវិតនយោបាយចុងក្រោយ គឺសម រង្ស៊ី បានប្រកាសទាំងប្រថុយប្រថាន ទាំងស្ទាក់ស្ទើរដូចជាខ្លាំងក្លាណាស់ថា នឹងវិលចូលស្រុកខ្មែរវិញ តែធាតុពិតនេះវាគ្រាន់តែជាការបញ្ឆោតអ្នកគាំទ្រតែប៉ុណ្ណោះ។
សារនយោបាយរបស់សម្ដេចក្រឡាហោម ស ខេង បានប្រកាសនៅចំពោះមន្ត្រីគ្រប់លំដាប់ថ្នាក់ជាង១,០០០នាក់ ហើយទំនងក៏ជាសារនយោបាយ សម្រាប់ផ្ញើរទៅកាន់អតីតមេបក្សប្រឆាំង និងអ្នកគាំទ្រនានាដែរថា «លោកសម រង្សី មកបានឬមិនបាន មិនមែនស្ថិតនៅលើសម រង្ស៊ី ខ្លួនឯងនោះទេ..! គឺនៅលើយើង»។ ត្រង់ចំណុចនេះ សម្ដេចស ខេង ចង់សំដៅលើកត្តា «ផ្ទៃក្នុងរបស់មន្ត្រីក្នុងរដ្ឋាភិបាល» ។
សម្ដេចបានបញ្ជាក់ចុងក្រោយថា សម រង្ស៊ី មកស្រុកលើកនេះ មិនមែនមកដូចកាលឆ្នាំ២០១៣ នោះទេ។ សម្ដេចថា កាលមកឆ្នាំ២០១៣ គឺទី១-សម រង្ស៊ី មានព្រះរាជក្រិត្រលើកលេងទោស ទី២-សម រង្ស៊ី មានតួនាទីជាមេបក្សប្រឆាំងស្របច្បាប់ និងទី៣-មកដើម្បីប្រកួតប្រជែងការបោះឆ្នោត ដោយស្របច្បាប់តាមលទ្ធិប្រជាធិបតេយ្យពហុបក្ស ។ ប៉ុន្តែសម្រាប់សម រង្ស៊ី វិលចូលស្រុកខ្មែរលើកនេះ គឺផ្ទុយពីឆ្នាំ២០១៣។
បើមកលើកនេះ សម រង្ស៊ី បាននាំមហន្តរាយចូលស្រុក គឺបានន័យថា សម រង្ស៊ី ចូលមកបំផ្លាញសុខសន្តិភាព ស្ថិរភាព និងមកបំផុសបំផុលឱ្យពលរដ្ឋចូលរួមធ្វើបដិវត្តពណ៌ ។ ដូច្នេះ ដើម្បីថែរក្សាសុខសន្តិភាពនេះ យើងត្រូវតែជាម្ចាស់ការក្នុងការគ្រប់គ្រងសភាពការឱ្យបានល្អ ដើម្បីទប់ស្កាត់នូវផែនការទុច្ចរិតរបស់សម រង្ស៊ី ដែលកំពុងបំផុសបំផុលពីខាងក្រៅប្រទេសនាពេលនេះ ។
ចែករំលែកព័តមាននេះ