ADផ្ទាំងផ្សព្វផ្សាយពាណិជ្ជកម្ម

២គ្រឿងពន្លះគ្នាយ៉ាងស្រៀវលើផ្លូវជាតិលេខ៤…មួយគ្រឿងដាច់កាប៊ីនរមៀលធ្លាក់ចូលប្រឡាយទឹកស្អុយ (មានវីដេអូ)

5 ឆ្នាំ មុន

កណ្តាល
២៨ ខែ កុម្ភៈ ឆ្នាំ ២០១៩ ម៉ោង ១៦:២៨

ខេត្តកណ្ដាល ៖ រថយន្តមួយគ្រឿងម៉ាកហ៊ីយ៉ាន់ដាយជាប្រភេទបែនដឹកដីបានបើកបរបោះពួយក្នុងល្បឿនលឿនមិនប្រកាន់ស្ដាំហើយបានជ្រុលទៅបុកយ៉ាងពេញទំហឹងជាមួយរថយន្តបែនមួយគ្រឿងទៀត ពាក់ស្លាកលេខខេមរភូមិន្ទ មានបិទឡូហ្គោអគ្គបញ្ជាការដ្ឋានកងទ័ពជើងគោកដែលមានដឹកថ្មពេញទ្រុង និងកំពុងបើកបរបញ្ច្រាសទិសគ្នា បណ្ដាលឲ្យរថយន្តម៉ាកហ៊ីយ៉ាន់ដាយដាច់កាប៊ីនចេញពីតួធ្លាក់ចូលប្រឡាយទឹកស្អុយ និងដាច់កង់មុខទាំង២គ្រាប់ ហើយរថយន្តនេះបានក្រឡាប់នៅលើកណ្ដាលទ្រូងផ្លូវ ចំណែកអ្នកបើកបរបានរងរបួសយ៉ាងធ្ងន់ធ្ងរ…

ចំណែករថយន្តបែនដឹកថ្មបាន ក្រពឹតរួញកាប៊ីន ទាំងស្រុងតែម្ដង និងផ្ទុះពោងសុវត្ថិភាពផងដែរ ចំណែកអ្នកបើកបររថយន្តនេះក៏បានរងរបួសផងដែរ ព្រោះនៅក្បែររថយន្តនេះក៏មានឈាមហូរដែរ បន្ទាប់មកអ្នកបើកបរបានគេចខ្លួនបាត់ស្រមោល។

គ្រោះថ្នាក់ចរាចរខាងលើនេះបានកើតឡើងកាលពីវេលាម៉ោង៥និង៣០នាទីព្រឹកថ្ងៃទី២៨ ខែកុម្ភៈ ឆ្នាំ២០១៩ នៅលើកំណាត់ផ្លូវជាតិលេខ៤ ត្រង់ចំណុចចន្លោះគីឡូម៉ែត្រលេខ២៨និង២៩ ស្ថិតនៅក្នុងភូមិត្រពាំរាំង ឃុំព្រៃពួច ស្រុកអង្គស្នួល ខេត្តកណ្ដាល។

នគរបាលបានឲ្យដឹងថា ភាគីខាងរថយន្តមួយគ្រឿងម៉ាកហ៊ីយ៉ាន់ដាយជាប្រភេទបែនដឹកដី ពណ៌សលាយបៃតង ពាក់ស្លាកលេខ ភ្នំពេញ ៣D-៤០១៧ បើកបរដោយបុរសម្នាក់ឈ្មោះ តេង ឈុនទី អាយុ២៨ឆ្នាំ មានទីលំនៅក្នុងភូមិខ្វិតតូច ឃុំជ្រៃវៀន ស្រុកព្រៃឈ ខេត្តកំពង់ចាម បានរងរបួសធ្ងន់។

ចំណែកភាគីខាងរថយន្តមួយគ្រឿងទៀតជាប្រភេទបែនដឹកថ្ម ពណ៌ត្រេអ៊ី ពាក់ស្លាកលេខ ខេមរភូមិន្ទ២-៣-០៦២២ មានបិទឡូហ្គោអគ្គបញ្ជាការដ្ឋានកងទ័ពជើង គោកនៅជាប់ទ្វារផង បើកបរដោយបុរសម្នាក់មិនស្គាល់អត្តសញ្ញាណបាន រត់គេចខ្លួនបាត់ស្រមោល។

តាមប្រភពព័ត៌មានបានឲ្យដឹងថា នៅមុនពេលកើតហេតុ គេឃើញរថយន្តទាំង២គ្រឿងបានបើកបរក្នុងទិសដៅបញ្ច្រាសគ្នា ដោយរថយន្តបែនមួយគ្រឿង ពាក់ស្លាកលេខខេមរភូមិន្ទ មានដឹកថ្មពេញទ្រុងបានបើកបរក្នុងទិសដៅពីលិចទៅកើត។ ដោយឡែករថយន្តបែនដឹកដីម៉ាកហ៊ីយ៉ាន់ដាយប្រភេទបែនដឹកដី (តែមិនមានដឹកដីទេ) បើកបរបោះពួយក្នុងល្បឿនក្នុងទិសដៅពីកើតទៅលិចក្នុងល្បឿនលឿនដូចហោះ លុះមកដល់ត្រង់ចំណុចកើតហេតុខាងលើ ដោយសារមិនប្រកាន់ស្ដាំ ហើយសង្ស័យអ្នកបើកបរងងុយដេកក៏បានរេចង្កូតចូលចំណែកផ្លូវម្ខាងទៀតជ្រុលទៅបុកជាមួយរថយន្តបែនដឹកថ្មពេញទំហឹងតែម្ដង។

ប្រភពដដែលបានបន្តថា ពេលនោះរថយន្តម៉ាកហ៊ីយ៉ាន់ដាយបានដាច់កាប៊ីនចេញពីតួចម្ងាយប្រមាណ២០ម៉ែត្ររមៀលធ្លាក់ចូលទៅក្នុងប្រឡាយទឹកស្អុយ និងដាច់កង់មុខ ទាំង២គ្រាប់រមៀលខ្ទាតចេញពីតួចម្ងាយប្រមាណជាង៣០ម៉ែត្រ។ ចំណែកអ្នកបើកបរបានធ្លាក់ចេញពីកាប៊ីនរថយន្ត ដួលដេកក្នុងថ្លុកឈាមនៅលើផ្លូវក្បែរតួរថយន្តដែលបានក្រឡាប់នៅកណ្ដាលទ្រូងផ្លូវតែម្ដង ។ រីឯរថយន្តបែនមានដឹកថ្មបានក្រពឹតរួញកាប៊ីនរងការខូចខាតទាំងស្រុង ព្រមទាំងផ្ទុះពោងសុវត្ថិភាព ហើយអ្នកបើកបររថយន្តនេះក៏រងរបួសដែរ ព្រោះប្រទះឃើញមានឈាមហូរនៅក្បែររថយន្ត បន្ទាប់មកបានរត់គេចខ្លួនបាត់ស្រមោល។

ក្រោយពេលកើតហេតុ កម្លាំងនគរបាល និងកងរាជអាវុធហត្ថស្រុកអង្គស្នួលបាន ចុះទៅសម្រួលចរាចរមិនឲ្យមានការកកស្ទះ ព្រមទាំងបញ្ជូនអ្នកបើកបររថយន្តហ៊ីយ៉ាន់ដាយទៅកាន់មន្ទីរពេទ្យដើម្បីសង្គ្រោះបន្ទាន់ ។ បន្ទាប់មកសមត្ថកិច្ចបានស្ទូចយករថយន្តទាំងពីរគ្រឿងទៅរក្សាទុកនៅអធិការដ្ឋាននគរបាលស្រុកអង្គស្នួលរង់ចាំការដោះស្រាយគ្នានៅពេលក្រោយ៕