ខេត្តកំពង់ស្ពឺ ៖ ផ្ទះសង់អំពីឈើជញ្ជាំងក្តារមួយខ្នងត្រូវអគ្គិភ័យឆាបឆេះ បង្កការភ្ញាក់ផ្អើលដល់សមត្ថកិច្ចបានជួយអន្តរាគមន៍បាញ់ទឹកពន្លត់អស់ចំនួន២រថយន្តទើបគ្រប់គ្រងស្ថានការណ៍បាន ដោយមិនរាលដាលដល់ផ្ទះអ្នកជិតខាងឡើយ។
ហេតុការណ៍នេះបង្កការភ្ញាក់ផ្អើលកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី២៨ ខែកុម្ភៈ ឆ្នាំ២០១៩ ស្ថិតក្នុងភូមិមុខខេត្ត សង្កាត់រការធំ ក្រុងច្បារមន ខេត្តកំពង់ស្ពឺ។
ម្ចាស់ផ្ទះរងគ្រោះឈ្មោះចាន់ មិនា ភេទប្រុស អាយុ៣៨ឆ្នាំ រស់នៅភូមិឃុំកើតហេតុខាងលើ។
ប្រភពពីសមត្ថកិច្ចបានអោយដឹងថា មូលហេតុនៃការឆាបឆេះផ្ទះខាងលើនេះគឺបណ្តាលមកពីម្ចាស់ផ្ទះ
ដុតទានដាក់លើទូរទស្សន៍ ហើយពេលម្ចាស់ផ្ទះកំពុងតែដេកលង់លក់ ស្រាប់តែទានដួលលើទូរទស្សន៍ បណ្តាលឱ្យឆេះរាលដាលដល់ផ្ទះទាំងមូលតែម្តង។
ហេតុការណ៍ខាងលើនេះបណ្តាលឱ្យរងការខូចខាតផ្ទះមួយខ្នងទំហំ៤ម៉ែតគុណនឹង៦ម៉ែត្រ ម៉ូតូសង់កូរ៉េមួយគ្រឿងពណ៌ក្រហម លុយចំនួន២លានរៀល និងសម្ភារៈប្រើប្រាស់មួយចំនួនទៀត។
កិច្ចប្រតិបត្តិការពន្លត់អគ្គិភ័យឆាបឆេះផ្ទះខាងលើនេះសមត្ថកិច្ចប្រើប្រាស់រថយន្តពន្លត់អគ្គិភ័យបាញ់ទឹកអស់ចំនួន២រថយន្ត និងកម្លាំងនគរបាលចំនួន១០នាក់ ហើយអគ្គិភ័យបានរលត់ទៅវិញនៅវេលាម៉ោង៤និង៣០នាទីទៀបភ្លឺក្នុងថ្ងៃដដែល៕
ចែករំលែកព័តមាននេះ