ខេត្តស្វាយរៀង ៖ស្ត្រីជនជាតិវៀតណាមម្នាក់ត្រូវបានកងទ័ពការពារព្រំដែនប្រទេសវៀតណាមឃាត់ខ្លួន និងសហកាជាមួយសមត្ថកិច្ចកម្ពុជារកឃើញថ្នាំញៀនជិត៧គីឡូក្រាម ។ ករណីបង្ក្រាបនេះធ្វើឡើង នៅវេលាម៉ោង៧និ០០នាទីយប់ ថ្ងៃទី២៧ ខែកុម្ភៈ ឆ្នាំ២០១៩ ក្រោយពីកម្លាំងសមត្ថកិច្ចនគរបាលខេត្តស្វាយរៀង បានទទួលព័ត៌មានពីភាគីវៀតណាមថា កាលពីវេលាម៉ោង១និង៣០នាទី រសៀលនៅចំណុចប៉ុស្តិ៍ព្រំដែនមីវីតី ស្រុកឌឹកវ៉េ ខេត្តឡុងអាន ប្រទេសវៀតណាម ។
កម្លាំងកងទព័ការពារព្រំដែនខេត្តឡុងអានបានធ្វើការបង្ក្រាបមុខសញ្ញាជួញដូរគ្រឿងញៀនឆ្លងដែនខុសច្បាប់បានចំនួនម្នាក់ មានឈ្មោះ ហ្វែង ថាន់ងុក អាយុ២៨ឆ្នាំ ភេទស្រី ជនជាតិវៀតណាម មានទីកន្លែងកំណើតភូមិ៥ ឃុំមីវីតី ស្រុកឌឹកវ៉េ ខេត្តឡុងអាន ប្រទេសវៀតណាមបច្ចុប្បន្នស្នាក់នៅផ្ទះជួលនៅភូមិចេក ឃុំសំរោង ស្រុកចន្ទ្រា ខេត្តស្វាយរៀង ដោយរឹបអូសថ្នាំញៀនទម្ងន់៤,៣០គីឡូក្រាម ហើយភាគីវៀតណាមបានស្នើខាងកម្ពុជាសហការណ៍ឆែកឆេរផ្ទះជួលរបស់ជនសង្សយ័ខាងលើក្នុងទឹកដីប្រទេសកម្ពុជា ។
សមត្ថកិច្ចបានអោយដឹងថា ក្រោយពីទទួលបានព័ត៌មានខាងលើនោះកម្លាំងអធិការដ្ឋាននគរបាលស្រុកចន្ទ្រាសហការជាមួយកម្លាំងជំនាញការិយាលយ័ប្រឆាំងគ្រឿងញៀនខេត្តស្វាយរៀង កម្លាំងប៉ុស្តិ៍ច្រកទ្វេភាគីសំរោង កម្លាំងវរសេនាតូចការពារព្រំដែនលេខ៦០៩ និងក្រោមការដឹកនាំសម្របសម្រួលផ្ទាល់ពីលោកព្រះរាជអាជ្ញាអមសាលាដំបូងខេត្តស្វាយរៀងនៅវេលាម៉ោង៨និង៣០នាទីយប់ បានធ្វើការឆែកឆេរបន្ទប់ជួលរបស់ឈ្មោះ ហ្វែង ថាន់ងុកនៅភូមិចេក ឃុំសំរោង ស្រុកចន្ទ្រា ខេត្តស្វាយរៀង រកឃើញថ្នាំញៀនប្រភេទម៉ាទឹកកកចំនួន០២កញ្ចប់(ធំ) ទម្ងន់២,០៥ គីឡូក្រាមបន្ថែមទៀត ។
បច្ចុប្បន្នជនសង្ស័យត្រូវបានឃាត់ខ្លួនដោយសមត្ថកិច្ចវៀតណាម រីឯវត្ថុតាងថ្នាំញៀនចំនួន០២កញ្ចប់ធំទម្ងន់២,០៥គីឡូក្រាម ដែលឆែកឆេររកឃើញត្រូវបានរឹបអូស និងបញ្ជូនមកការិយាលយ័ប្រឆាំងគ្រឿងញៀន តាមបញ្ជារបស់លោកព្រះរាជអាជ្ញា ដើម្បីធ្វើការស្រាវជ្រាវ និងបំពេញសំណុំរឿងចាត់ការតាមនីតិវិធី ៕
ចែករំលែកព័តមាននេះ