ខេត្តព្រះសីហនុ ៖ រឿងរ៉ាវទំនាស់ផ្ទៃក្នុងមន្ទីរធម្មការនិងសាសនាខេត្ត ដែលផ្តើមចេញពីអនុប្រធានមន្ទីរចំនួន២រូប បានលេចចេញនូវញត្តិគាំទ្រពីសំណាក់ចៅអធិការវត្តចំនួន២២វត្ត ក្នុងខេត្ត ដែលមានខ្លឹមសារនៃញត្តិទាំងនោះគឺទទួលស្គាល់ពីព្រះតេជគុណមូល រ៉ន ព្រះមេគណខេត្ត និងជាចៅអធិការវត្តឥន្ទញ្ញាណ ។
ក្នុងខ្លឹមសារនៃញត្តិនេះ ព្រះចៅអធិការវត្តទាំង២២បានគាំទ្រយ៉ាងខ្លាំងចំពោះលោកកង ឌី ណាត និងបានចោទប្រកាន់ទៅលើមន្ត្រីដឹកនាំមន្ទីរធម្មការចំនួន២នាក់ គឺលោកសាំង ស្រស់ អនុប្រធានមន្ទីរធម្មការទទួលបន្ទុកគណនេយ្យ និងរដ្ឋបាល និងលោកខឹម សំណាង អនុប្រធានមន្ទីរទទួលបន្ទុកការិយាល័យធម្មការនិងសាសនាខេត្តថា បាននិងកំពុងធ្វើសកម្មភាពញុះញង់បង្កភាពអនាធិបតេយ្យ ធ្វើឱ្យបែកបាក់សាមគ្គីភាពផ្ទៃក្នុងរវាងបុគ្គលិក និងថ្នាក់ដឹកនាំក្នុងមន្ទីរ ដូចជាករណី ១-បានបំផុសឱ្យគ្រូជាប់កិច្ចសន្យាឆ្នាំ២០១០ ដែលមិនបង្រៀនឱ្យមកបើកប្រាក់ខែទាំងអស់ ។ ២-អ្នកទាំង២នាក់ខាងលើបានចោទប្រកាន់ថា ប្រធានមន្ទីរធម្មការនិងសាសនាខេត្តកេងប្រវ័ញ្ចញើសឈាមមន្ត្រីក្រោមឱវាទ ។ ៣-អ្នកទាំងពីរនាក់ចោទថា ប្រធានមន្ទីរធម្មការរំលោភការងារកូនចៅ ។ ៤-បានបំផុសឱ្យមន្ត្រីជាប់កិច្ចសន្យាផ្តិតមេដៃថាខ្លួនមិនបានបើកប្រាក់បៀវត្សប្រចាំខែ ។ ក្នុងខ្លឹមសារដដែលនោះបានបញ្ជាក់យ៉ាងច្បាស់ថា ក្នុងនាមចៅអធិការវត្តទាំង២២ សូមប្រឆាំងដាច់ខាតរាល់ទង្វើរបស់អនុប្រធានទាំង២នៃមន្ទីរធម្មការនិងសាសនាខេត្ត ដែលទង្វើទាំងនេះមិនស័ក្តិសមជាមន្ត្រីរាជការដែលបំរើការក្នុងមន្ទីរធម្មការនិងសាសនាទេ។
លោកកង ឌីណាត ប្រធានមន្ទីរធម្មការនិងសាសនាខេត្តបានឱ្យដឹងថា ចំពោះការចោទប្រកាន់ពីសំណាក់មន្ត្រីក្រោមឱវាទទាំងពីរគឺជាការបង្កាច់បង្ខូចកិត្តិយសរបស់ថ្នាក់ដឹកនាំតែប៉ុណ្ណោះ ក្នុងគោលបំណងធ្វើឱ្យជះឥទ្ធិពលអាក្រក់លើវិស័យព្រះពុទ្ធសាសនាដែលជាសាសនារបស់រដ្ឋ ។ លោកបានបន្តទៀតថា បន្ទាប់ពីលេចចេញនូវបាតុភាពនេះឡើង លោកពុំដែលខ្វល់ខ្វាយអ្វីឡើយ ព្រោះថាសច្ចធម៌ពិតមិនសាបសូន្យ អំពើល្អរមែងទទួលបានផលល្អ ។ ថ្មីៗនេះ ដោយមើលឃើញពីភាពអយុត្តិធម៌សម្រាប់រូបលោកដែលជាថ្នាក់ដឹកនាំមន្ទីរមួយមានការតែងតាំងត្រឹមត្រូវពីរដ្ឋមន្ត្រីក្រសួងធម្មការនិងសាសនានៃព្រះរាជាណាចក្រកម្ពុជា ទើបមន្ត្រីសង្ឃដែលជាចៅអធិការទាំង២២វត្ត ព្រមទាំងមេគណខេត្តផងដែរ បានធ្វើញត្តិគាំទ្រដល់រូបលោកដើម្បីឱ្យបន្តដឹកនាំលើវិស័យព្រះពុទ្ធសាសនាបន្តទៀត ។ ញត្តិទាំងនេះបានដាក់ជូនទៅលោកអភិបាលខេត្តនិងក្រសួងធម្មការរួចហើយដើម្បីមានវិធានការ ។
យោងតាមប្រភពពីលោកស្រីកុក សុខា អនុប្រធានការិយាល័យរដ្ឋបាល និងគណនេយ្យនៃមន្ទីរធម្មការនិងសាសនាខេត្ត បានឱ្យដឹងថា លោកប្រធានមានគម្រោងរៀបចំឯកសារមួយចំនួនដើម្បីចាត់ការទៅតាមផ្លូវច្បាប់នៅឯសាលាដំបូងពីបទក្លែងបន្លំឯកសារសាធារណៈ ។ ការរៀបចំនេះ គឺដោយសារការចោទប្រកាន់របស់មន្ត្រីទាំងពីររូបខាងលើធ្វើឱ្យប៉ះពាល់កិត្តិយសនិងសេចក្តីថ្លៃថ្នូរយ៉ាងធ្ងន់ធ្ងរ មិនអាចប៉ះប៉ូវវិញបានទេ ។
បើតាមប្រភពផ្សេងមួយទៀតពីមន្ត្រីនៅក្នុងមន្ទីរធម្មការមួយរូបសុំមិនបញ្ចេញឈ្មោះបានឱ្យដឹងថា កន្លងមកមន្ត្រីទាំងពីររូបខាងលើនេះពេលចូលមកកន្លែងធ្វើការនៅក្នុងមន្ទីរតែងតែបញ្ចេញអត្តចរិតខ្វះសាមគ្គីភាពផ្ទៃក្នុងអង្គភាព ពេលខ្លះថាមានចោរចូលលួចរបស់របរនៅក្នុងមន្ទីរបាត់នេះបាត់នោះ ធ្វើឱ្យមន្ត្រីផ្សេងទៀតលែងចង់ហ៊ានចូលកន្លែងធ្វើការព្រោះខ្លាចរងការចោទប្រកាន់ពីលោកទាំងពីរខាងលើ ។ ប្រភពដដែលបានបន្តទៀតថា បើទោះបីជាយ៉ាងណាក៏ដោយបន្ទាប់ពីគណៈសង្ឃទាំង២២វត្ត ធ្វើញត្តិគាំទ្រលោកប្រធានមន្ទីរធម្មការនិងសាសនា ដាក់ជូនអភិបាលខេត្ត និងក្រសួងធម្មការនិងសាសនា រួចមក លោកសង្ឃឹមថា នឹងមានចំណាត់ការទៅតាមប្រព័ន្ធផ្លូវច្បាប់ជាក់ជាមិនខានហើយច្បាប់នឹងមិនទុកឱ្យបុគ្គលខិលខូចដើរធ្វើសកម្មភាព ធ្វើព្យុះធ្វើភ្លៀងតាមអំពើចិត្តនោះទេ។
ដោយឡែក លោកសាំង ស្រស់ និងលោកខឹម សំណាង បានឱ្យភ្នាក់ងារកោះសន្តិភាពដឹងថា ចំពោះញត្តិដែលចោទប្រកាន់ថា លោកដើរបំផុសបំផុលនិងប្តឹងលោកកង ឌីណាត ប្រធានមន្ទីរធម្មការនិងសាសនានោះ គឺមិនពិតទេ។ លោកគ្រាន់តែធ្វើសំណើទៅអធិការកិច្ច នៃក្រសួងហិរញ្ញវត្ថុតែប៉ុណ្ណោះ ឯចំពោះរឿងស្នាមមេដៃនិងពាក្យបណ្តឹងរបស់គ្រូជាប់កិច្ចសន្យា និងមន្ត្រីជាប់កិច្ចសន្យា លោកពុំដឹងអ្វីទាំងអស់ រឿងគេប្តឹងឬមិនប្តឹងជារឿងរបស់គេ លោកគ្រាន់តែប្រាប់ពីតួលេខនៃប្រាក់បៀវត្សដល់គ្រូនិងមន្ត្រីជាប់កិច្ចសន្យាតែប៉ុណ្ណោះ ។ លោកសាំង ស្រស់ បន្តទាំងសម្តីក្រេវក្រោធថា គណៈសង្ឃទាំង២២វត្តនោះដឹងរឿងអ្វីខ្លះនៅក្នុងមន្ទីរធម្មការនិងសាសនាខេត្ត ទើបហ៊ានធ្វើញត្តិគាំទ្រផ្តេសផ្តាស លូកដៃចូលក្នុងរឿងមន្ទីរធម្មការនិងសាសនាខេត្ត ។ រឿងនេះជារឿងរបស់ធម្មការនិងសាសនាខេត្ត មិនមែនជារឿងរបស់គណៈសង្ឃនោះទេ ៕
ចែករំលែកព័តមាននេះ