ខេត្តបន្ទាយមានជ័យ ៖ ២នាក់ម្តាយកូនលើកគ្នាទៅឈ្លះប្រកែកអ្នកជិតខាង ហើយជនសង្ស័យជាកូនប្រុសទះកំផ្លៀងស្ត្រីរងគ្រោះ២ដៃដួលសន្លប់ ត្រូវបានប្តឹងចាប់ខ្លួនជនដៃដល់ពីបទហិង្សាដោយចេតនាត្រូវបានបញ្ជូនទៅសាលាដំបូងខេត្តបន្ទាយមានជ័យ ចាត់ការតាមច្បាប់ នៅថ្ងៃទី២៨ ខែកុម្ភៈ ឆ្នាំ២០១៩ ។
ជនសង្ស័យដែលត្រូវចាប់ខ្លួនមានឈ្មោះ សាវឹង មករា ភេទប្រុស អាយុ២៦ឆ្នាំ រស់នៅភូមិគាបសង្កាត់ទឹកផ្លា ក្រុងសិរីសោភ័ណ ។
លោកវរសេនីយត្រី យ៉ាន់ សុវណ្ណ មេបញ្ជាការកងរាជអាវុធហត្ថក្រុងសិរីសោភ័ណបានប្រាប់ថា នៅពេលដែលឃាត់ខ្លួនជនសង្ស័យកម្លាំងកងរាជអាវុធហត្ថក្រុងសិរីសោភ័ណបានទទួលពាក្យបណ្តឹងពីស្ត្រីឈ្មោះ រ៉េ រ៉ួម អាយុ៥៣ឆ្នាំ រស់នៅភូមិជាមួយគ្នា បានប្តឹងជនសង្ស័យឈ្មោះ សាវឹង មករា ដែលរស់នៅផ្ទះក្បែរគ្នា ហើយរករឿងឈ្លះប្រកែកគ្នា ហើយជនសង្ស័យ និងម្តាយបានមកដល់មុខផ្ទះ ហើយជេបញ្ចោរ និងប្រមាថមើលងាយ ហើយជនសង្ស័យបានចូលមកក្នុងផ្ទះខ្លួនបានទះកំផ្លៀង២ដៃ បណ្តាលដួលសន្លប់ តែដោយសុខភាពទន់ខ្សោយផងដែរ នៅវេលាម៉ោង៧យប់ ថ្ងៃទី២៦ ខែកុម្ភៈ ឆ្នាំ២០១៩ ស្ថិតភូមិគាប សង្កាត់ទឹកផ្លា ក្រុងសិរីសោភ័ណ ។
លោកវរៈសេនីយទោ ព្រហ្ម ថេង ប្រធានមន្ទីរយុត្តិធម៌កងរាជអាវុធហត្ថខេត្តបន្ទាយមានជ័យបានបញ្ជាក់ថា ក្រោយពេលដែលជនសង្ស័យធ្វើសកម្មភាពទះកំផ្លៀងស្ត្រីរងគ្រោះ បណ្តាលដួលសន្លប់ហើយបានដាក់បណ្តឹង កម្លាំងជំនាញបានឃាត់ខ្លួនជនសង្ស័យដែលជាជនដៃដល់ម្នាក់ត្រូវជាកូនប្រុសភ្លាមៗបញ្ជូនមកសាកសួរ ដោយតាមចម្លើយសារភាពខ្លួនពិតជាបានទះកំផ្លៀងស្ត្រីរងគ្រោះពិតមែន ។
ដោយយោងតាមចម្លើយ និងបណ្តឹងជនរងគ្រោះត្រូវចោទប្រកាន់ពីបទប្រើអំពើហិង្សាដោយចេតនាត្រូវកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ ៕
ចែករំលែកព័តមាននេះ