ខេត្តកោះកុង ៖ នៅព្រឹកថ្ងៃទី២៥ កញ្ញា ប្រតិភូមួយក្រុមដឹកនាំដោយលោកជំទាវសោម គឹមសួគ៌ រដ្ឋមន្ត្រីក្រសួងទំនាក់ទំនងជាមួយរដ្ឋសភា និងព្រឹទ្ធសភា និងអធិការកិច្ច ដោយមានការចូលរួមពីតំណាងក្រុមហ៊ុនម៉ុង ប្ញទ្ធីគ្រុប ក្រុមហ៊ុនគូហ៊ូឡុង ដែលជាដៃគូសម្ព័ន្ធមេត្រីភាពជាមួយវរសេនាតូចលេខ២៦៩ នគរបាលការពារព្រំដែនទឹក វរសេនាតូចលេខ៨២៧ នគរបាលការពារព្រំដែនគោកប្រចាំទិសកោះកុង បាននាំយកអំណោយ និងថវិកាមួយចំនួនទៅចែកជូនដល់វរសេនាតូចទាំង២នោះ ។ នៅក្នុងពិធីសាកសួរសុខទុក្ខ និងផ្តល់អំណោយនោះមានការចូលរួមពីលោកប៊ុន លើត អភិបាលនៃគណៈអភិបាលខេត្តកោះកុង លោកឧត្តមសេនីយ៍ឯក ស៊ឹម សុផល អគ្គស្នងការរងនគរបាលជាតិ លោកឧត្តមសេនីយ៍ទោ ប្រាក់ កាន់ណារ៉ា ប្រធាននាយកដ្ឋាននគរបាលការពារព្រំដែនទឹក ព្រមទាំងមានការចូលរួមពីនាយនគរបាល និងពលនគរបាល និងប្រតិភូក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចយ៉ាងច្រើនកុះករ ។
លោកឧត្តមសេនីយ៍ឯក ស៊ឹម សុផល បញ្ជាក់ថា ភូមិសាស្ត្រតំបន់កោះកុងពិតជាមានការស្មុគស្មាញជាងតំបន់ព្រះវិហារ ព្រោះគ្រប់គោលដៅឈរជើងរបស់កម្លាំងកងទ័ពក៏ដូចជានគរបាលនៅព្រះវិហារ សុទ្ធតែមានផ្លូវចូលទៅដល់ ហេតុនេះងាយស្រួលក្នុងការផ្គត់ផ្គង់ ការចល័តក្នុងពេលមានឧបសគ្គ ដោយឡែកសំរាប់ភូមិសាស្ត្រខេត្តកោះកុងវិញ បើកម្លាំងការពារព្រំដែនគោក គឺត្រូវដើរឆ្លងកាត់ព្រៃភ្នំ ជ្រោះជ្រលងពីចំណុចមួយទៅចំណុចមួយ ។ នៅរដូវវស្សាមានទឹកភ្លៀងប្រើប្រាស់ តែរដូវប្រាំងអត់ទឹកតែម្តង គឺតំរូវឱ្យកងកម្លាំងស្វែងរក និងដឹកជញ្ជូនទឹកពីបាតជ្រោះទៅកាន់ចំណុចឈរជើងត្រូវប្រើរយៈពេលយូរ ។ ពេលកម្លាំងមានជំងឺមិនអាចបញ្ជូនទៅកាន់មន្ទីរពេទ្យបាន រហូតដល់មានករណីស្លាប់ក៏មិនអាចបញ្ជូនសពទៅតម្កល់នៅវត្ត ឬឱ្យក្រុមគ្រួសារបានទេ ដូច្នេះត្រូវបង្ខំចិត្តបូជាសពនៅកណ្តាលទ្រូងព្រៃ ។ ចំណែកនគរបាលការពារព្រំដែនទឹកវិញនៅឈរជើងលើទឹកតែគ្មានទឹកប្រើប្រាស់ ព្រោះជាទឹកប្រៃ ត្រូវដឹកជញ្ជូនទឹកពីដែនគោកដោយត្រូវចំណាយសោហ៊ុយអូប័រដឹកទឹកសំរាប់ប្រើប្រាស់ ។
លោកបន្តថា ចំពោះជំរកស្នាក់នៅត្រូវប្រឈមនឹងការខូចខាត និងជួសជុលឡើងវិញស្ទើរតែរៀងរាល់ឆ្នាំ ដោយប្រឈមនឹងរលកសមុទ្រធ្វើឱ្យបន្ទាយឈរជើងបាក់ច្រាំង និងចាត់វិធានការទប់ស្កាត់ដោយចំណាយថវិកាហួសពីសមត្ថភាព ។ ចំពោះការចេញល្បាតត្រូវប្រឈមនឹងគ្រោះថ្នាក់២ករណីជានិច្ច ទី១-សត្រូវ និងទី២-គឺរលក និងព្យុះសមុទ្រ ។ ទោះជាយ៉ាងណា ក្តីកម្លាំងឈរជើងទាំង២វរៈនៅតែខិតខំទាំងកម្លាំងកាយ និងកម្លាំងចិត្តការពារបូរណភាពទឹកដីមិនឱ្យបាត់បង់សូម្បីមួយមីល្លីម៉ែត្រណាឡើយ ។ លោកជំទាវសោម គឹមសួគ៌ បានពាំនាំការសាកសួរសុខទុក្ខ និងនឹករលឹកពីសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន្ទ ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ចំពោះនាយនគរបាល និងពលនគរបាលទាំងអស់ដែលកំពុងបំពេញភារកិច្ចការពារជាតិ អនុវត្តតាមគោលនយោបាយរបស់សម្តេចអគ្គមហាសេនាបតីតេជោនាយករដ្ឋមន្ត្រី ។ ដើម្បីឆ្លើយតបនឹងការខិតខំនេះ ទើបសម្តេចចេញអនុសាសន៍ប្រកបដោយគតិបណ្ឌិតបង្កើតឱ្យមានសម្ព័ន្ធមេត្រីភាពរវាងអង្គភាពសមរភូមិក្រោយ និងសមរភូមិមុខ ដែលបង្កើតបានពាក្យស្លោកមួយឃ្លាបញ្ជាក់ថា “ការពារជាតិដើម្បីទាំងអស់គ្នា ទាំងអស់គ្នាដើម្បីការពារជាតិ” ។
លោកជំទាវមានប្រសាសន៍ទៀតថា បន្ទាប់ពីការបង្កើតសម្ព័ន្ធមេត្រីភាពនេះឡើងឃើញថា កងទ័ព ក៏ដូចជានគរបាលមានការរីកចំរើន និងកក់ក្តៅចំពោះកាតព្វកិច្ច ការពារបូរណភាពទឹកដីរបស់ខ្លួន ។ ទន្ទឹមនឹងនេះធ្វើឱ្យបេះដូងលោកជំទាវ ក៏ដូចជាអង្គភាពរដ្ឋ ឯកជន និងសប្បុរសជនដក់ជាប់ និងនៅជាមួយកងកម្លាំងដែលកំពុងឈរជើងការពារខ្សែក្រវាត់ព្រំដែនគ្រប់ទិសទិវារាត្រី ។ លោកជំទាវបានសន្យាផ្តល់អគារស្នាក់នៅដល់វរសេនាតូចលេខ២៦៩ មួយខ្នងមានតំលៃ១៦.២១៤ដុល្លារ និងមួយខ្នងទៀតសំរាប់វរសេនាតូចលេខ៨២៧ ដែលមានតំលៃ១៨.២៥២ដុល្លារ ។ លោកជំទាវបាននាំយកថវិកាចំនួន៤លានរៀល ក្នុងវរសេនាតូចនីមួយៗ និងសំរាប់កងកម្លាំងម្នាក់ៗ ទទួលបានភួយ១ ក្រមា១ ត្រីខ១០កំបុ៉ង សាច់ក្រកកន្លះគីឡូក្រាម ប៊ីចេង១កញ្ចប់ ឆៃប៉ូវ១គីឡូក្រាម នំអន្សម២ អង្ករ២៥គីឡូក្រាម និងប្រាក់២ម៉ឺនរៀល ព្រមទាំងផ្តល់ម៉ាស៊ីនព្រីនធ័រ១គ្រឿងសំរាប់ទីបញ្ជាការស្រាល ៕
ចែករំលែកព័តមាននេះ