ប្រទេសឥណ្ឌា-ប៉ាគីស្ថាន ៖ ប៉ាគីស្ថាននិយាយកាលពីថ្ងៃទី២៧កុម្ភៈថា បានបាញ់ធ្លាក់យន្តហោះឥណ្ឌា២គ្រឿងក្នុងដែនអាកាសរបស់ខ្លួន ក្រោយការវាយប្រហារតាមអាកាសរបស់ឥណ្ឌា ក្នុងដែនដីប៉ាគីស្ថានប្រឆាំងក្រុមអ៊ិស្លាមនិយមមួយ។
តាមTWITTERអ្នកនាំពាក្យម្នាក់របស់កងទ័ពប៉ាគីស្ថានអះអាងនាថ្ងៃទី២៧កុម្ភៈថា ប៉ាគីស្ថានបានបាញ់ធ្លាក់យន្តហោះឥណ្ឌា២គ្រឿង ក្នុងដែនអាកាសរបស់ខ្លួន ក្រោយការវាយប្រហារបង្ការរបស់ឥណ្ឌានៅប៉ាគីស្ថាន ដែលនាំឲ្យមានការកើនឡើងថ្មីនៃភាពតានតឹង រវាងមហាអំណាចនុយក្លេអ៊ែរនៅអាស៊ីខាងត្បូងទាំង២។
អ្នកនាំពាក្យរូបនោះ ឧត្ដមសេនីយASIF GHAFOORគូសបញ្ជាក់ថា ជាការឆ្លើយតបចំពោះការវាយប្រហាររបស់កងទ័ពអាកាសប៉ាគីស្ថាន នាព្រឹកថ្ងៃទី២៧កុម្ភៈកងទ័ពអាកាសឥណ្ឌាបានឆ្លងកាត់ខ្សែបន្ទាត់ត្រួតពិនិត្យ ដែលជាព្រំដែនរវាងឥណ្ឌានិងប៉ាគីស្ថាននៅតំបន់មានជម្លោះកាស្មៀរ។ កងទ័ពអាកាសប៉ាគីស្ថានបានបាញ់ធ្លាក់យន្តហោះឥណ្ឌា២គ្រឿង ក្នុងដែនអាកាសប៉ាគីស្ថាន។ យន្តហោះមួយបានធ្លាក់នៅកាស្មៀរឥណ្ឌាហើយយន្តហោះមួយទៀតធ្លាក់នៅកាស្មៀរប៉ាគីស្ថាន។ អ្នកបើកយន្តហោះឥណ្ឌា២នាក់ត្រូវចាប់ខ្លួន នៅលើដីដោយកងទាហានប៉ាគីស្ថាន ។
ចំណែកអ្នកទទួលខុសត្រូវម្នាក់នៃរដ្ឋាភិបាលរដ្ឋចាមូកាស្មៀរឥណ្ឌាមុននេះគូសបញ្ជាក់ថា បណ្ដាយន្តហោះប្រដេញប៉ាគីស្ថានបានហោះឆ្លងកាត់រយៈពេលខ្លី ព្រំដែនរវាងប្រទេសទាំង២នៅកាស្មៀរ ហើយត្រូវកងទ័ពអាកាសឥណ្ឌារុញច្រាន។ ចំណែកអ្នកទទួលខុសត្រូវប៉ូលិសកាស្មៀរឥណ្ឌាម្នាក់ និយាយថាអ្នកបើកយន្តហោះ២នាក់និងជនសីុវិលម្នាក់ស្លាប់់ក្រោយយន្តហោះឥណ្ឌាធ្លាក់។ មានការបាញ់តតាំងគ្នាលើដែនដីរវាងកងទ័ពនៃប្រទេសទាំង២ នៅតាមកន្លែងជាច្រើននៅកាស្មៀរផងដែរ។
កងទ័ពអាកាសឥណ្ឌាអះអាងកាលពីថ្ងៃទី២៦កុម្ភៈ ពីការវាយប្រហារតាមអាកាស ប្រឆាំងជំរំហ្វឹកហ្វឺនមួយ របស់ក្រុមអ៊ិស្លាមនិយម JAISH-E-MOHAMMED ដោយថា សម្លាប់យុទ្ធជនក្រុមនោះជាច្រើននាក់៕
ចែករំលែកព័តមាននេះ