សហរដ្ឋអាមេរិក-OPEC ៖ ប្រភពមួយរបស់អង្គការបណ្ដាប្រទេសនាំប្រេងចេញ ហៅកាត់ថាOPEC អះអាងប្រាប់រ៉យទ័រកាលពីថ្ងៃទី២៦កុម្ភៈថា OPECនិងបណ្ដាសម្ព័ន្ធមិត្តនឹងបន្តអនុវត្តកិច្ចព្រមព្រៀងរបស់ពួកគេ កាត់បន្ថយផលិតកម្មប្រេង ទោះបីមានការរិះគន់នានារបស់ប្រធានាធិបតីអាមេរិក លោកដូណាល់ត្រាំក្ដី។ ប្រភពនោះនិយាយថា…
សហរដ្ឋអាមេរិក-OPEC ៖ ប្រភពមួយរបស់អង្គការបណ្ដាប្រទេសនាំប្រេងចេញ ហៅកាត់ថាOPEC អះអាងប្រាប់រ៉យទ័រកាលពីថ្ងៃទី២៦កុម្ភៈថា OPECនិងបណ្ដាសម្ព័ន្ធមិត្តនឹងបន្តអនុវត្តកិច្ចព្រមព្រៀងរបស់ពួកគេ កាត់បន្ថយផលិតកម្មប្រេង ទោះបីមានការរិះគន់នានារបស់ប្រធានាធិបតីអាមេរិក លោកដូណាល់ត្រាំក្ដី។
ប្រភពនោះនិយាយថា ដោយពិនិត្យលើបណ្ដាទិន្នន័យបច្ចុប្បន្នលើទីផ្សារ OPECនិងសម្ព័ន្ធមិត្ត ប្រហែលជានឹងបន្តកាត់បន្ថយផលិតកម្មប្រេងរហូតដល់ដំណាច់ឆ្នាំ។ OPECនឹងរួមប្រជុំនាខែមេសាដើម្បីពិនិត្យលើយុទ្ធសាស្ត្ររបស់ខ្លួន។
លោកដូណាល់ត្រាំបានអំពាវនាវជាថ្មីកាលពីថ្ងៃទី២៥កុម្ភៈដល់OPEC ឲ្យបញ្ឈប់ការខិតខំប្រឹងប្រែងរបស់ខ្លួន ដើម្បីធ្វើឲ្យតម្លៃប្រេងឆៅកើនឡើង ដោយស្នើដល់OPECឲ្យរក្សាភាពស្ងប់ស្ងាត់។ ក្រោយសារនោះតាមTWITTERរបស់លោកត្រាំ់ តម្លៃប្រេងបានធ្លាក់ចុះខ្លាំង ដោយប្រេងឆៅBRENTនៃសមុទ្រខាងជើងធ្លាក់ចុះ៣,៥%នាថ្ងៃទី២៥កុម្ភៈ មុនពេលឡើងវិញប្រមាណជា០,៨៥%។
ប្រភពខាងលើនោះបន្តថាOPECនឹងបន្តកាត់បន្ថយផលិតកម្ម យោងតាមផែនការរបស់យើង ហើយយើងនឹងធ្វើយ៉ាងណាឲ្យមានការចូលរួមកាន់តែខ្លាំងក្នុងវិធានការទាំងនោះ។ OPECនឹងបន្តអនុវត្តកិច្ចព្រមព្រៀងកាត់បន្ថយផលិតកម្មប្រេងរបស់ខ្លួនរហូតដល់ការស្តុក ចាប់ផ្ដើមធ្លាក់ចុះបើប្រៀបធៀបទៅនឹងផលិតកម្មបច្ចុប្បន្ន។
OPECនិងបណ្ដាសម្ព័ន្ធមិត្តពិសេសរុស្ស៊ី បានព្រមព្រៀងគ្នាកាលពីខែធ្នូ កាត់បន្ថយផលិតកម្មប្រេង មកនៅត្រឹម១,២លានធុងក្នុង១ថ្ងៃ គិតចាប់តាំងពីថ្ងៃទី១មករាទៅ ហើយក្នុងរយៈពេល៦ខែ ដើម្បីធ្វើឲ្យទីផ្សារមានស្ថេរភាព ហើយជួយទ្រទ្រង់ដល់តម្លៃប្រេង។
ទណ្ឌកម្មរបស់អាមេរិកប្រឆាំងផ្នែកប្រេងកាតរបស់វេណេស៊ុយអេឡា ជាអ្នកផ្ដល់ប្រេងឆៅសំខាន់ដល់សហរដ្ឋអាមេរិក បានរួមចំណែកជួយទ្រទ្រង់តម្លៃប្រេងនាពេលថ្មីៗនេះ ហើយបែបនោះ អាចឲ្យអារ៉ាប៊ីសាអូឌីតបង្កើនផលិតកម្មប្រេងរបស់ខ្លួន សម្រាប់យកទៅប៉ះប៉ូវដល់ការផ្គត់ផ្គង់៕
ចែករំលែកព័តមាននេះ