រាជធានីភ្នំពេញ ៖ នៅក្នុងពិភពកីឡា គេស្គាល់ត្រឹមតែកីឡាការិនីស៊ន សៀវម៉ី និងសម ថារ័ត្ន ថាជានារីជើងខ្លាំងផ្នែកតេក្វាន់ដូ និងល្បុក្កតោប៉ុណ្ណោះដែលមានការទទួលស្គាល់ក្នុងកម្រិតជាអន្តរជាតិ ប៉ុន្តែមនុស្សតិចណាស់ដែលបានដឹងថា…
រាជធានីភ្នំពេញ ៖ នៅក្នុងពិភពកីឡា គេស្គាល់ត្រឹមតែកីឡាការិនីស៊ន សៀវម៉ី និងសម ថារ័ត្ន ថាជានារីជើងខ្លាំងផ្នែកតេក្វាន់ដូ និងល្បុក្កតោប៉ុណ្ណោះដែលមានការទទួលស្គាល់ក្នុងកម្រិតជាអន្តរជាតិ ប៉ុន្តែមនុស្សតិចណាស់ដែលបានដឹងថា អ្នកទាំងពីរមានចំណូលចិត្តធ្វើអ្វី និងមានជំនាញអ្វីខ្លះក្រៅពីអាជីពកីឡា ។ អ្វីដែលគេកត់សម្គាល់គឺអ្នកទាំងពីរមានចំណូលចិត្តមួយចំនួនស្របគ្នា ខណៈដែលចំណូលចិត្តនោះប្រសិនបើអ្នកមិនដឹងគឺនឹងអាចទាយខុស។
កញ្ញា ស៊ន សៀវម៉ី បានរៀបរាប់ថា រាល់ពេលទំនេរកញ្ញាចូលចិត្តអង្គុយតែម្នាក់ឯងនៅកន្លែងស្ងាត់ គ្មានការរំខាន ហើយស្ដាប់តន្ត្រីដោយបទចម្រៀងដែលនាងនិយមស្ដាប់គឺជាប្រភេទបទសម័យ ហើយសម្រាប់អត្ថន័យបទចម្រៀងគឺអាស្រ័យលើអារម្មណ៍របស់នាង។
កញ្ញានិយាយថា៖«សម្រាប់ខ្ញុំរាល់ពេលទំនេរមិនសូវចូលចិត្តទៅណាទេ គឺចូលចិត្តនៅតែម្នាក់ឯង ហើយស្ដាប់ចម្រៀង បើខ្ញុំសប្បាយចិត្តខ្ញុំស្ដាប់បទញាក់ៗ ប៉ុន្តែបើខ្ញុំអត់សូវសប្បាយចិត្ត គឺស្ដាប់បទមនោសញ្ចេតនា»។ ក្រៅពីចូលចិត្តស្ដាប់ចម្រៀង នាងថាខ្លួនចូលចិត្តច្រៀងលេងខ្លាំងណាស់ដោយរាល់ពេលនៅម្នាក់ឯង ឬកំពុងធ្វើការបណ្ដើរនាងរមែងច្រៀងលេងបណ្ដើរ ដោយនាងប្រកាសថា នៅពេលច្រៀងបណ្ដើរធ្វើការបណ្ដើរធ្វើឱ្យនាងមានកម្លាំងចិត្ត ។
ក្នុងនោះ នាងក៏ចូលចិត្តទៅច្រៀងនៅ KTV ជាលក្ខណៈគ្រួសារផងដែរ ដោយសារតែនាងចូលចិត្តច្រៀង បើទោះជាសំឡេងរបស់នាងមិនពីរោះណាស់ណា ។ នាងនិយាយថា៖«ខ្ញុំនិយាយពីច្រៀង គឺចេះច្រើនបទ អ៊ីចឹងហើយទើបឱ្យតែមានគ្នាទៅច្រៀងនៅKTVហើយព្រោះចូលចិត្តច្រៀងតាំងពីដើម គឺជំនាញអីុចឹងហ្មង!»។ ចំណូលចិត្តមួយទៀតដែលនាងនិយមធ្វើផងដែរ គឺទម្លាប់ធ្វើនេះធ្វើនោះកំប៉ិកកំប៉ុក ឧទាហរណ៍ដូចជាទស្សនាយូធូបហើយឃើញវីដេអូគេចាក់ចាហួយ ឬធ្វើបង្អែមនេះបង្អែមនោះជាដើម គឺនាងរមែងធ្វើជាប្រចាំដោយសារតែនាងចូលចិត្តញាំបង្អែម និងញាំអាហាររសជាតិផ្អែម ។
ក្នុងនោះ កញ្ញាក៏ចូលចិត្តពីរបៀបតែងខ្លួនផងដែរ ទើបនាងទៅណាមកណាគឺចេះបត់បែនដោយតុបតែងខ្លួនធ្វើឱ្យមានការទាក់ទាញ ដោយបានទាំងបើកអាជីវកម្មលក់ផលិតផលឡេតាមអនឡាញយ៉ាងជោគជ័យផង ព្រោះតែនាងចេះរៀបចំខ្លួនបានល្អនេះឯង ។ កញ្ញាថា ខ្លួនជាអ្នកកីឡា ប៉ុន្តែសម្រាប់ការរៀបចំខ្លួនគឺមិនចាញ់អ្នកសិល្បៈនោះទេ ។ បើឱ្យនាងតែងខ្លួនចូលរួមក្នុងកម្មវិធីមួយ នាងអាចទៅរួច ប៉ុន្តែបើឱ្យឡើងច្រៀងលើឆាកនាងអត់ហ៊ានទេ បើទោះជានាងចូលចិត្តច្រៀង ជាពិសេសបទចម្រៀងរបស់តារាចម្រៀងកញ្ញា ឱក សុគន្ធកញ្ញា។
ងាកមកកាន់កញ្ញា សម ថារ័ត្ន ឯណេះវិញ កញ្ញាប្រាប់ថា រាល់ពេលទំនេរកញ្ញាចូលចិត្តច្រៀង និងរាំជាងគេ ដោយកញ្ញាចូលចិត្តច្រៀងបទចម្រៀងបែបបរទេស ជាពិសេសបទជាភាសាអង់គ្លេស ចំណែកក្បាច់រាំវិញ ក៏មិនអន់នោះដែរ ដ្បិតថានាងគឺជាកីឡាការិនីផ្នែកល្បុក្កតោ ។ នាងនិយាយថា៖«ខ្ញុំអ្នកកីឡាមែន ប៉ុន្តែទេពកោសល្យសិល្បៈគឺចេះទាំងអស់ ទាំងការសម្ដែង ហើយបើទំនេរគឺច្រៀង និងរាំលេងតែម្ដង ព្រោះចូលចិត្តតាំងពីតូច!»។ នាងថា ខ្លួនធ្លាប់ប្រឡូកការប្រឡងចម្រៀងកាលពីច្រើនឆ្នាំមុនម្ដងហើយ ដោយក្នុងពេលនោះបានប្រឡងជាប់ផង ខណៈដែលនាងក៏ធ្លាប់ត្រូវបានគេអញ្ជើញជាតារាកិត្តិយសឱ្យច្រៀងក្នុងកម្មវិធីឃោសនាផលិតផលផងដែរ ។
កញ្ញាថា ខ្លួនជាកូនស្រីរបស់តន្ត្រីករល្បីឈ្មោះ គឺស្ដេចវីយូឡុង អ៊ុ ដារ៉ា ប៉ុន្តែកញ្ញាមិនមានឱកាសបានក្លាយជាតារាចម្រៀងនោះទេ ដោយបានត្រឹមតែស្រឡាញ់ និងមានចំណូលចិត្តប៉ុណ្ណោះ ដោយសារតែពេលប្រឡូកនៅក្នុងអាជីពកីឡាក៏មានអ្នកគាំទ្រច្រើន ហើយពេលបានក្លាយជាតារាភាពយន្តក៏ភ្លេចអាជីពចម្រៀងដែលនឹកស្រមៃតែម្ដង ។
នាងថា ខ្លួនមិនសូវមានចំណូលចិត្តធ្វើអ្វីក្រៅពីច្រៀង និងស្ដាប់បទចម្រៀងនោះទេ ដោយពេលធ្វើការគឺត្រូវធ្វើការតែម្ដង អត់មានទៅធ្វើអ្វីផ្សេងនាំឱ្យប៉ះពាល់ការងារឡើយ។ នាងនៅតែអះអាងថាចង់ឡើងឆាកច្រៀង និងចង់បញ្ចេញសមត្ថភាពក្នុងអាជីពច្រៀង និងរាំ ដោយបទរ៉េបៗគឺនាងចូលចិត្តច្រៀង និងស្ដាប់បំផុត ជាពិសេសគឺបទញាក់ៗតែម្ដង។
ទោះបីយ៉ាងណានាងថា បើឱ្យនាងឈោងចាប់អាជីពមួយនោះដល់ថ្នាក់ភ្លេចកីឡា និងភ្លេចការសម្ដែងភាពយន្តគឺមិនអាចនោះទេ ។ អ៊ីចឹងហើយ ទើបគេកត់សម្គាល់ថា កីឡាការិនីរូបនេះ មានទេពកោសល្យសិល្បៈគួរឱ្យសរសើរ ដែលនេះគឺជាចំណូលចិត្តផ្ទុយស្រឡះទាំងស្រុង បើធៀបនឹងអ្នកកីឡាល្បីឈ្មោះផ្សេងទៀត៕
ចែករំលែកព័តមាននេះ