ខេត្តបន្ទាយមានជ័យ ៖ នគរបាលខេត្តបន្ទាយមានជ័យបានបំបែកសំណុំរឿងករណីឃាតកម្មសម្លាប់បុរសម្នាក់រួចដុតសពនៅជិតភ្នំដងរ៉ែក ដោយចាប់ឃាត់ខ្លួនជនសង្ស័យចំនួន២នាក់ នេះពិតជាឈាមស្រែកស្បែកហៅមែន ។ សំណុំរឿងឃាតកម្មមួយដែលកើតឡើងក្នុងភាពអាថ៌កំបាំង ត្រូវបានកងកម្លាំងនគរបាលខេត្តបន្ទាយមានជ័យ រួមមានកម្លាំងនគរបាលជំនាញផែនព្រហ្មទណ្ឌ កម្លាំងនគរបាល…
ខេត្តបន្ទាយមានជ័យ ៖ នគរបាលខេត្តបន្ទាយមានជ័យបានបំបែកសំណុំរឿងករណីឃាតកម្មសម្លាប់បុរសម្នាក់រួចដុតសពនៅជិតភ្នំដងរ៉ែក ដោយចាប់ឃាត់ខ្លួនជនសង្ស័យចំនួន២នាក់ នេះពិតជាឈាមស្រែកស្បែកហៅមែន ។
សំណុំរឿងឃាតកម្មមួយដែលកើតឡើងក្នុងភាពអាថ៌កំបាំង ត្រូវបានកងកម្លាំងនគរបាលខេត្តបន្ទាយមានជ័យ រួមមានកម្លាំងនគរបាលជំនាញផែនព្រហ្មទណ្ឌ កម្លាំងនគរបាល អធិការដ្ឋាននគរបាលស្រុកថ្មពួក និងកម្លាំងនគរបាលវរសេនាតូចការពារព្រំដែនគោកលេខ៨០៧ ដឹកនាំបញ្ជាផ្ទាល់ របស់ លោកឧត្តមសេនីយ៍ទោ អាត់ ខែម ស្នងការនគរបាលខេត្តនិងលោក ឧត្តមសេនីយ៍ទោ សិទ្ធ ឡោះ ស្នងការរង ទទួលផែនព្រហ្មទណ្ឌ បានស្រាវជ្រាវវែកមុខឃាតករ និងឈានដល់បំបែកសំណុំរឿងនេះបានទាំងស្រុង ។
លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ បានឲ្យដឹងថា ករណីឃាតកម្មគិតទុកជាមុននេះបានកើតឡើងនៅចន្លោះពីម៉ោង១០ទៅម៉ោង១២ថ្ងៃត្រង់ថ្ងៃទី២៥ ខែកុម្ភៈ ឆ្នាំ២០១៩ នៅចំណុចព្រៃអាព្រហ្ម ក្នុងដីក្រុមហ៊ុនជាតិអភិវឌ្ឍ ក្នុងភូមិថ្មរមៀល ឃុំបន្ទាយឆ្មា ស្រុកថ្មពួក ខេត្តបន្ទាយមានជ័យ ។
ក្រោយពីកើតហេតុនិងទទួលបានព័ត៌មានថា មានមនុស្សត្រូវគេសំលាប់ ដែលជនរងគ្រោះត្រូវបានគេស្គាល់ឈ្មោះហាន សុថុន ភេទប្រុស អាយុ៣៦ឆ្នាំ រស់នៅភូមិអំពិលចាស់ ឃុំបន្ទាយអំពិលស្រុកបន្ទាយអំពិល ខេត្តឧត្តមានជ័យ មុខរបរបើករោងម៉ាស៊ីនកិនស្រូវ និងបើកឡានយកស្រូវតាមផ្ទះទៅកិន ។
លោកបានដាក់បទបញ្ជាឲ្យលោកឧត្តមសេនីយ៍ត្រី សិទ្ធ ឡោះ ស្នងការរង ដឹកនាំកម្លាំងនគរបាលជំនាញខេត្ត និងកម្លាំងអធិការដ្ឋាននគរបាល ស្រុកថ្មពួក រួមទាំងកម្លាំងវរសេនាសតូចការពារ ព្រំដែនគោកលេខ៨០៧ បើកការស៊ើបអង្កេត ស្រាវជ្រាវ និងឈានដល់ការចាប់ឃាត់ខ្លួនជនសង្ស័យចំនួន២នាក់ ក្នុងនោះម្នាក់ឈ្មោះស៊ួត សុភាក់ ហៅភ័ក្ត្រ ភេទប្រុស អាយុ៣៤ឆ្នាំ ត្រូវជាប្អូន និងម្នាក់ទៀតឈ្មោះស៊ួត សុផាត ភេទប្រុស អាយុ៣៧ឆ្នាំ ត្រូវជាបង។ ជនសង្ស័យទាំង២នាក់នេះត្រូវជាបងប្អូនបង្កើតនឹងគ្នា រស់នៅភូមិធ្លក ឃុំបន្ទាយឆ្មារ ស្រុកថ្មពួក ខេត្តបន្ទាយមានជ័យ ។
យោងតាមចម្លើយសារភាពរបស់ជនសង្ស័យឈ្មោះស៊ួត សុផាត ភេទប្រុស អាយុ៣៧ឆ្នាំ ជាជនដៃដល់ បានឆ្លើយសារភាពថា ខ្លួនពិតជាបានប្រព្រឹត្តអំពើឃាតកម្មគិតទុកជាមុនមែន ដោយប្រើកាំបិតប៉័ងតោកាប់ទៅលើជនរងគ្រោះចំនួនពីរកាំបិត ត្រូវចំក និងត្រូវចំដៃ បណ្តាលអោយស្លាប់ភ្លាមៗនៅកន្លែងកើតហេតុ ។
ជនសង្ស័យបានឆ្លើយសារភាពថា មូលហេតុដែលខ្លួនសម្លាប់ជនរងគ្រោះនោះ ក៏ព្រោះតែបានឃើញជនរងគ្រោះ និងប្អូនថ្លៃស្រីរបស់ខ្លួនទាក់ទងគ្នាជាយូរមកហើយ បើទោះបីជាប្អូនប្រុសរបស់ខ្លួនបានលែងលះគ្នាជាមួយប្រពន្ធចុង មកត្រូវរ៉ូវគ្នាជាមួយប្រពន្ធដើម(ប្អូនថ្លៃស្រី)វិញក៏ដោយ តែជនរងគ្រោះនៅតែបន្តលួចទាក់ទងប្អូនថ្លៃស្រីរបស់ខ្លួនទៀត ដោយតែងតែនាំគ្នាមកកន្លែងគុម្អប្ញស្សីដែលមានអូរនេះជាញឹកញាប់ ។
ជនសង្ស័យបានបន្តថា ពេលឃើញជនរងគ្រោះ និងប្អូនថ្លៃស្រីនៅតែទាក់ទងគ្នាដូច្នេះ ខ្លួនក៏រៀបគំរោងសម្លាប់ជនរងគ្រោះក្រោមដើមកកោះក្នុងដីឡូត៍ក្រុមហ៊ុនជាតិអភិវឌ្ឍ ក្រោយពីសម្លាប់រួចហើយ ខ្លួនបានបើកគោយន្តទៅភូមិប្រាប់ប្អូនប្រុសរបស់ខ្លួនឈ្មោះស៊ួត សុភាក់ ហៅភ័ក្ត្រ ដែលជាជនសមគំនិតថា ខ្លួនបានសម្លាប់ឈ្មោះសុថុន ហើយ រួចក៏បាននាំគ្នាប្រមូលកង់មុខគោយន្តកន្ត្រៃចំនួន៤ និងកង់មុខត្រាក់ទ័រចំនួន១ ដឹកតាមគោយន្តយកទៅដុតសពជនរងគ្រោះ ដើម្បីបំបាត់ភស្តុតាង។
លោកឧត្តមសេនីយ៍ស្នងការបានបញ្ជាក់ថា ក្រោយពីទទួលបានចម្លើយសារភាពរបស់ជនសង្ស័យរួចមក នៅថ្ងៃទី២៧ ខែកុម្ភៈនេះ លោកក៏បានដឹកនាំកម្លាំងជំនាញ អធិការដ្ឋាននគរបាលស្រុកថ្មពួក និងវរសេនាតូច ការពារព្រំដែនគោកលេខ៨០៧ នាំជនសង្ស័យ២នាក់ បងប្អូន និងស្ត្រីជាប្អូនថ្លៃជនដៃដល់ធ្វើត្រាប់ឡើងវិញពីសកម្មភាពនៃបទល្មើស និងរៀបចំសំណុំរឿងបញ្ជូនជនសង្ស័យទាំង២នាក់ទៅសាលាដំបូងខេត្តបន្ទាយមានជ័យ ដើម្បីចាត់ការតាមនីតិវិធីច្បាប់៕
គួររំលឹកថា សពបុរសត្រូវគេដុត និងកង់ឡានចោលនៅកណ្តាលព្រៃត្រូវបានស្គាល់ហើយ
ចែករំលែកព័តមាននេះ