វៀតណាមចង់សហការជាមួយជប៉ុនបន្ថែមទៀត
ទីក្រុងហូជីវមិញ ៖ ប្រធានសភាពាណិជ្ជកម្ម និងឧស្សាហកម្មវៀតណាម (VCCI) បាននិយាយថា វិស័យគាំទ្រពលកម្ម ទេសចរណ៍ និងកសិកម្ម គួរតែនាំមុខក្នុងកិច្ចសហប្រតិបត្តិការរវាងប្រទេសជប៉ុន…
ទីក្រុងហូជីវមិញ ៖ ប្រធានសភាពាណិជ្ជកម្ម និងឧស្សាហកម្មវៀតណាម (VCCI) បាននិយាយថា វិស័យគាំទ្រពលកម្ម ទេសចរណ៍ និងកសិកម្ម គួរតែនាំមុខក្នុងកិច្ចសហប្រតិបត្តិការរវាងប្រទេសជប៉ុន និងវៀតណាម ។
សារព័ត៌មាន Viet Nam News បានស្រង់សម្ដីលោក Vu Tien Loc ប្រធានសភាពាណិជ្ជកម្មរូបនេះ ដោយលោកបាននិយាយនៅកិច្ចសន្ទនាសេដ្ឋកិច្ចរវាងវៀតណាមនិងជប៉ុនកាលពីថ្ងៃទី២៥ កុម្ភៈ កន្លងមកថា វិស័យទាំងនេះមានសក្តានុពលសម្រាប់ប្រទេសទាំងពីរក្នុងការពង្រឹងទំនាក់ទំនងទ្វេភាគី ។
លោកបានបន្តថា គោលនយោបាយរបស់វៀតណាមក្នុងការអភិវឌ្ឍវិស័យគាំទ្រមិនទាន់ដល់សក្តានុពលភាពដែលមានទេ និងបានបន្ថែមថាជំនួយពីប្រទេសជប៉ុនក្នុងការចែករំលែកបទពិសោធន៍ និងបច្ចេកវិទ្យាបានដើរតួយ៉ាងសំខាន់ក្នុងការលើកស្ទួយវិស័យនេះ ជាពិសេសក្នុងការជួយដល់ក្រុមហ៊ុនធុនតូចនិងមធ្យមក្នុងការចូលរួមក្នុងខ្សែសង្វាក់ផលិតកម្មជាដើម ។
លោក Loc បានបន្តទៀតថា VCCI ប្តេជ្ញាសហការយ៉ាងដិតដល់ជាមួយនឹងសភាពាណិជ្ជកម្ម និងឧស្សាហកម្មជប៉ុន (JCCI) ដើម្បីជួយដល់សហគ្រាសជប៉ុនដែលកំពុងស្វែងកដៃគូសហការក្នុងប្រទេសវៀតណាម ។
វិស័យពលកម្មក៏ជាវិស័យមានសក្តានុពលសម្រាប់កិច្ចសហប្រតិបត្តិការរវងប្រទេសទាំងពីរដែរ ព្រោះតែការខិតខំរបស់រដ្ឋាភិបាលជប៉ុនក្នុងការកែទម្រង់វិធានការដើម្បីទាក់ទាញពលករបរទេសបន្ថែម និងធានាដល់សិទ្ធិពលករបរទេសផងដែរ ។
លោក Loc បានឲ្យដឹងថា មានជនជាតិវៀតណាមប្រមាណ៣០ម៉ឺននាក់កំពុងតែធ្វើការ និងសិក្សាក្នុងប្រទេសជប៉ុនកាលពីឆ្នាំ២០១៨ ឬច្រើនជាង៦ឆ្នាំមុនដល់ទៅ៦ដង។ សក្តានុពលក្នុងការលើកស្ទួយកិច្ចសហប្រតិបត្តិការក្នុងវិស័យទេសចរណ៍រវាងប្រទេសទាំងពីរក៏មានសារសំខាន់ដែរ ហើយលោក Loc បានបន្តថា ប្រទេសជប៉ុនគឺជាទីផ្សារធំមួយក្នុងយុទ្ធសាស្ត្រអភិវឌ្ឍន៍វិស័យទេសចរណ៍ជប៉ុននៅឆ្នាំ២០២០ និង២០៣០។
វៀតណាមក៏ចង់ពង្រឹងកិច្ចសហប្រតិបត្តិការជាមួយជប៉ុនក្នុងវិស័យកសិកម្មទៀតផង។ ដើម្បីសម្រេចបានគោលបំណងនេះ លោក Loc បានឲ្យដឹងថា វៀតណាមត្រូវតែពង្រឹងស្ថានការអាជីវកម្ម បង្កើនសមត្ថភាពសហគ្រាស អភិវឌ្ឍន៍ហេដ្ឋារចនាសម្ព័ន្ធសេដ្ឋកិច្ច និងបង្កើតមធ្យោបាយក្នុងការសម្របសម្រួលពាណិជ្ជកម្មនិងការវិនិយោគជាដើម ៕
ចែករំលែកព័តមាននេះ