ខេត្តកំពង់ចាម ៖ ផ្កាអគីដេរីកស្រស់ស្អាតរួម និងកូនឈើហូបផ្លែជាច្រើនប្រភេទត្រូវបានប្រជាពលរដ្ឋនៅភូមិថ្នល់បែកលិច ឃុំស្វាយទាប ស្រុកចំការលើបានដាក់តាំងលក់នៅមុខផ្ទះដែលនេះជាមុខរបរមួយ សម្រាប់ជួយទ្រទ្រង់ជីវភាពគ្រួសារ ។ ក្នុងនោះគេបានសង្កេតឃើញមានម៉ូយមកពីគ្រប់ទិសទីបាន
ចូលមកទិញយកទៅដាំតាមចំការ នៅខេត្តឆ្ងាយៗផងដែរ ។
អ្នកស្រី គឹម ហៀក អាយុ៤១ឆ្នាំ ប្រាប់ឲ្យដឹងនៅព្រឹកថ្ងៃទី២៦ កុម្ភៈ ឆ្នាំ២០១៩ថា គាត់បានលក់ផ្លែល្ហុងទុំ ចេកទុំ ខ្នុរ ក្រូចឆ្មារ នៅរោងមុខផ្ទះ ដែលបានដាំដុះនៅខាងក្រោយផ្ទះប្រាក់ចំណូលដែលបានមកដោះស្រាយជីវភាពគ្រួសារមិនគ្រប់គ្រាន់នោះទេ ទើបមកដល់ឆ្នាំ២០១៨ បានពង្រីករបរលក់ផ្កា និងកូនដើមឈើហូបផ្លែជាច្រើនប្រភេទនៅខាងមុខផ្ទះ រកចំណូលបានក្នុង១ថ្ងៃជាង១០ម៉ឺនរៀល គ្រាន់នឹងឲ្យកូនៗបានរៀនសូត្រនៅសាលារៀន គាត់នឹងប្រឹងប្រែងលើរបរនេះទៅថ្ងៃអនាគតទៀត ។
អ្នកស្រី ឆាង វណ្ណា អាយុ៥៦ឆ្នាំ នៅភូមិថ្នល់បែកលិច ប្រាប់ឲ្យដឹងថា ដីលំនៅឋានរបស់គាត់ និងអ្នក
ផ្សេងទៀតចំនួនជិត២០គ្រួសារបាននាំគ្នារស់នៅអាស្រ័យផលជាច្រើនឆ្នាំមកហើយ ក្រោយមកទៀត
ស្រាប់តែមានគេមកប្តឹង ដើម្បីឲ្យពួកគាត់ចាកចេញពីលំនៅឋានទៅវិញ ។ តែសំណាងល្អបានលោក
ឧបនាយករដ្ឋមន្ត្រី យឹម ឆៃលី និងអាជ្ញាធរពាក់ព័ន្ធបានផ្តល់យុត្តិធម៌ ឲ្យពួកគាត់រស់នៅលើដីដដែល
និងបានចេញប្លង់កម្មសិទ្ធឲ្យថែមទៀត ធ្វើឲ្យម្នាក់ៗសប្បាយចិត្តរីករាយ និងបានបង្កើនការដាំដុះដំណាំ
ផ្សេងៗនៅក្រោយផ្ទះ ដើម្បីដោះស្រាយជីវភាពគ្រួសាររៀងៗខ្លួន ។
អ្នកស្រី ឆាង វណ្ណា ប្រាប់បន្តថា ហេតុតែមានការទុកចិត្តដល់អាជ្ញាធរគ្រប់លំដាប់ថ្នាក់នោះក្នុងឆ្នាំ
២០១៨ គាត់ និងប្តីបានពង្រីករបរបណ្តុះកូនឈើហូបផ្លែជាច្រើនប្រភេទលក់នៅខាងមុខផ្ទះក្នុងនោះមានទាំងផ្កាស្រស់ស្អាតៗនាំមកពីថៃ និងវៀតណាមសម្រាប់យកទៅដាក់តាំងលំអរក្នុងលំនៅឋាន ។ ដោយសារតែមានការតស៊ូនោះរបរលក់ផ្កាបានប្រហែលកន្លះឆ្នាំហើយ រហូតមកដល់សព្វថ្ងៃមានម៉ូយនៅតាមបណ្តាខេត្តផ្សេងៗមានដូចជា ខេត្តកំពត តាកែវ ឧត្តរមានជ័យ រតនៈគិរី និងបណ្តាខេត្តមួយចំនួនទៀត បានមកកម្មង់ទិញកូនទុរេន ដូងក្រអូប ដើម្បីយកទៅដាំសម្រាប់ឲ្យបានផលលក់ដោះស្រាយជីវភាពគ្រួសារ ។
ត្បិតរបរនេះលក់ចំណេញតិចគាត់ និងប្តីរួមនឹងកូនប្រុសម្នាក់បានប្រឹងប្រែង ដើម្បីបណ្តុះកូនឈើហូបផ្លែជាច្រើនប្រភេទនៅក្រោយផ្ទះ កាលពីបុណ្យចូលឆ្នាំចិនកន្លងទៅផ្ការបស់គាត់បានរីកនៅក្នុងថូជាច្រើនមើលទៅស្រស់ស្អាតថែមទាំងលក់ដាច់ និងមានយុវជនយុវនារីនាំគ្នាមកចូលលេងថតសែលហ្វីតាមទូរស័ព្ទដៃច្រើនផងដែរ ។ រាល់ថ្ងៃជីវភាពបានធូរស្រាល ដោយសាររបរលក់ផ្កា និងកូនឈើហូបផ្លែច្រើនប្រភេទនេះ ៕
ចែករំលែកព័តមាននេះ