ក្រុមហ៊ុន Porsche បានប្រកាសជាផ្លូវការថា រថយន្តម៉ាក Macan ជំនាន់ថ្មីរបស់ខ្លួន នឹងក្លាយទៅជារថយន្តប្រើប្រាស់អគ្គិសនីសុទ្ធ ។ រថយន្តនេះនាពេលបច្ចុប្បន្នគឺជារថយន្តលក់ដាច់ជាងគេរបស់ក្រុមហ៊ុន ហើយការសម្រេចចិត្តបំបាត់ម៉ាស៊ីនសាំងគឺជារឿងពិត ។ វានឹងក្លាយទៅជារថយន្ត Porsche ទីបី ដែលគឺជារថយន្តអគ្គិសនី ក្រោយពីរថយន្ត Taycan ឆ្នាំ២០២០ និង រថយន្ត Taycan Cross Turismo ឆ្នាំ២០២១ ។
អគ្គនាយករបស់ក្រុមហ៊ុន Porsche លោក Oliver Blume បាននិយាយថា ៖«បច្ចេកវិទ្យាប្រើប្រាស់អគ្គិសនីលើរថយន្ត និង ក្រុមហ៊ុន Porsche គឺដើរទៅទន្ទឹមគ្នាណាស់ មិនមែនត្រឹមដោយសារតែវាអាចជួយសន្សំការចំណាយលើថាមពលនោះទេ វាក៏បង្ហាញពីភាពស្ព័ររបស់វាផងដែរ ។
នៅឆ្នាំ២០២២ ពួកយើងនឹងវិនិយោគប្រាក់លើសពី ៦ប៊ីលានអឺរ៉ូ លើការផលិតរថយន្តអគ្គិសនី ហើយនៅឆ្នាំ២០២៥ រថយន្ត Porsche ថ្មីៗពាក់កណ្តាលនឹងគឺជារថយន្តប្រើប្រាស់អគ្គិសនី»។
រថយន្ត Macan ប្រើអគ្គិសនីនឹងជួយ Porsche ឱ្យមានភាពប្រកួតប្រជែងជាមួយនឹងរថយន្ត Audi សេរ៊ី e-tron SUV និង រថយន្ត Mercedes-Benz EQC ដែលប្រើអគ្គិសនីដូចគ្នា និង ចេញលក់ក្នុងពេលឆាប់ៗ ។
ក្រុមហ៊ុន Porsche បានប្រាប់ថា រថយន្ត Macan សេរ៊ីថ្មីនេះ នឹងមានមកជាមួយនូវអាគុយកម្លាំង ៨០០វ៉ុល និង ប្រើប្រាស់ស្ថាបត្យកម្ម Porsche PPE ដែលបានអភិវឌ្ឍរួមគ្នាជាមួយនឹង Audi។
ក្រុមហ៊ុនមេរបស់ក្រុមហ៊ុន Porsche ដែលជាក្រុមហ៊ុន Volkswagen Group បានប្តេជ្ញាចិត្តចំណាយប្រាក់ចំនួន ៣០ប៊ីលានអឺរ៉ូលើបច្ចេកវិទ្យារថយន្តប្រើប្រាស់អគ្គិសនី ក្នុងពេល៥ឆ្នាំខាងមុខនេះ។ គោលដៅរបស់គេគឺចង់ឱ្យ ២៥%នៃរថយន្តដែលលក់ចេញនៅឆ្នាំ២០២៥ គឺជារថយន្តអគ្គិសនី ៕
ប្រភព ៖ CarBuzz
ចែករំលែកព័តមាននេះ