អ្នកភូមិមានមោទនភាពព្រោះបានវាយសម្លា.ប់ឆ្កែ១ក្បាល?
- កំពង់ចាម
ខេត្តកំពង់ចាម ៖ មានហេតុការណ៍ភ្ញាក់ផ្អើលមួយ ដោយសារមេឆ្កែមួយក្បាល មិនដឹងមកពីប្រភពណានោះទេ បានដើរមកចូលភូមិដូនធី ឃុំបុសខ្នុរ ស្រុកចំការលើ នៅយប់ថ្ងៃទី២៥ កុម្ភៈ…
ខេត្តកំពង់ចាម ៖ មានហេតុការណ៍ភ្ញាក់ផ្អើលមួយ ដោយសារមេឆ្កែមួយក្បាល មិនដឹងមកពីប្រភពណានោះទេ បានដើរមកចូលភូមិដូនធី ឃុំបុសខ្នុរ ស្រុកចំការលើ នៅយប់ថ្ងៃទី២៥ កុម្ភៈ និងបានខាំឆ្កែក្នុងភូមិថែមទៀត រួចបានរត់ចេញទៅទិសខាងជើងតាមបណ្តោយផ្លូវថ្នល់ ។ រហូតមកដល់វេលាម៉ោងជិត៩ព្រឹកថ្ងៃទី២៦ កុម្ភៈ ឆ្កែមួយក្បាលដដែលនោះបានដើរតាមផ្លូវ ដោយមានហៀរទឹកមាត់និងកន្ទុយធ្លាក់ចុះ សង្ស័យថាជាឆ្កែឆ្កួត ខ្លាចខាំក្មេងៗក្នុងភូមិ ក៏បាននាំគ្នាដេញវាយរហូតដល់ងាប់ភ្លាមៗនិងបានយកទៅកប់ចោលដើម្បីការពារកុំឲ្យឆ្លង ។
លោក ម៉ៃ ចាន់ធឿន អាយុ៤៨ឆ្នាំ នៅភូមិដូនធី ប្រាប់ឲ្យដឹងថា មេឆ្កែមួយក្បាល ដែលបង្កឲ្យមានការភ្ញាក់ផ្អើលខាងលើនោះ មិនដឹងមកពីណាទេ បានរត់មកចូលភូមិ ហើយបានដេញខាំឆ្កែដូចគ្នា អ្នកស្រុកឃើញដំបូងនាំគ្នាដេញវាយ ។ ប៉ុន្តែវាយមិនបានក៏រត់ចេញពីភូមិទៅទិសខាងជើងបាត់ទៅ ។ លោក ចាន់ ធឿន ប្រាប់បន្តថា មិនអស់ចិត្តទេ ម្នាក់ៗចេះតែនាំគ្នាតាមរកមើល តែមិនប្រទះសោះ រហូតដល់វេលាយប់ជ្រៅនៅតែរកមិនឃើញដដែល ។
លោកថា ដោយសារមួយរយៈនេះ នៅតាមបណ្តាញសង្គមមានការបង្ហោះពីរឿងគ្រោះថ្នាក់សត្វឆ្កែ ឬឆ្មាខាំ ដែលបង្កគ្រោះថ្នាក់រហូតដល់ស្លាប់បាត់បង់អាយុជីវិត ទើបអ្នកភូមិម្នាក់ៗ ពិសេសការពារក្មេងប្រុសស្រី បង្កើនការប្រុងប្រយ័ត្ន មិនឲ្យសត្វទាំង២ប្រភេទនេះខាំ ឬខ្វាច ព្រោះខ្លាចមានបញ្ហាកើតឡើង រហូតមកដល់ព្រឹកថ្ងៃទី២៦ កុម្ភៈ បានឃើញឆ្កែមួយក្បាល ដែលពួកគាត់តាមរកនោះកំពុងដើរតាមផ្លូវថ្នល់មកពីទិសខាងជើង ដោយមានហៀរទឹកមាត់កក្លាក់និងធ្លាក់អណ្តាត ព្រមទាំងលាកន្ទុយដាក់ចុះក្រោមផងក៏សង្ស័យថាពិតជាឆ្កែឆ្កួតហើយ ទើបអ្នកភូមិរបស់គាត់មានគ្នាប្រមាណ១០នាក់ ដោយក្នុងដៃមានព្រនង់វែងៗរត់ដេញវាយឆ្កែនោះទម្រាំបានប្រើពេលអស់មួយសន្ទុះ ទើបសម្លាប់បាន ។
ក្នុងនោះមានម្នាក់ដែលជាក្រុមដេញវាយ ត្រូវបានឆ្កែហក់វិះនឹងខាំត្រូវ តែសំណាងចេះគេចទាន់ ។ មូលហេតុដែលនាំគ្នាដេញវាយឆ្កែឲ្យងាប់ដើម្បីការពារកុំឲ្យខាំក្មេងៗក្នុងភូមិរបស់គាត់ ព្រោះបារម្ភពីវាឆ្កួត ។ ក្រោយពីបានវាយងាប់ហើយនោះ បានយកទៅកប់ក្នុងដីមិនមានអ្នកណាហ៊ានយកទៅធ្វើម្ហូបនោះទេ ។
គួររំលឹកថា មានស្ត្រីម្នាក់ឈ្មោះ សេង ស៊ាងអេង អាយុ២៧ឆ្នាំ នៅភូមិត្រពាំងរាំង ឃុំត្រពាំងព្រះស្រុកព្រៃឈរ ក្នុងខណៈពេលដែលបានចេញទៅរកស៊ីលក់ដូរនៅខេត្តកំពង់ឆ្នាំង ត្រូវសត្វឆ្កែខាំដៃ មិនមានរបួសធំដុំ ហើយមិនបានចាប់អារម្មណ៍ទៅចាក់ថ្នាំការពារនោះទេ ។ ដោយបានទុកជាច្រើនថ្ងៃរហូតដល់ជំងឺបានធ្វើទុក្ខខ្លាំង ដឹកយកទៅភ្នំពេញ ដោយមន្ទីរពេទ្យមួយពញយាបាលមិនធូរស្រាលក៏ចេញមកមន្ទីរពេទ្យកាល់ម៉ែតមិនហ៊ានព្យាបាល ព្រោះមេរោគ បានជ្រាបពេញខ្លួនក្នុងសភាពធ្ងន់ធ្ងរក៏បានដឹកត្រឡប់មកមកផ្ទះវិញ ។ លុះមកដល់ថ្ងៃទី១៩ កុម្ភៈ ២០១៩ បានស្លាប់និងបានធ្វើបុណ្យតាមប្រពៃណីក្រោមសំឡេងយំទួញសោកគួរឲ្យអាលោះអាល័យបំផុត ។
លោក នង ម៉េងហ៊ាង ប្រធានការិយាល័យផលិតកម្មនិងបសុព្យាបាលខេត្តវិញបានប្រាប់ឲ្យដឹងដែរថា តាមលក្ខណៈកត់សម្គាល់ខាងក្រៅឆ្កែដែលសង្ស័យឆ្កួត មើលទៅហៀរទឹកមាត់។ លោកប្រាប់ថា មួយរយៈកន្លងមកនេះនៅក្រុងកំពង់ចាមមានប្រជាជនយើងជាច្រើននាក់បានទាក់ទងមករូបលោកសួររកវ៉ាក់សាំងការពារជំងឺឆ្កែឆ្កួត លោកបានប្រាប់ឲ្យទៅចាក់នៅប៉ាស្ទ័រឯរាជធានីភ្នំពេញ ៕
ចែករំលែកព័តមាននេះ