កីឡាករស្កុតឡែនរីកគី បឺនការពារបានខ្សែក្រវាត់ទម្ងន់ស្រាលពិភពលោកស្ថាប័ន WBOរបស់ខ្លួនបន្ទាប់ពីប្រកួតស្មើពិន្ទុជាមួយកីឡាករម៉ិកស៊ិករ៉ៃម៉ុនដូ បេលត្រាន ។ ជ័យជម្នះនៅសង្វៀន SECC Arenaក្រុង Glasgow ប្រទេសស្កុតឡែនលើកនេះ បាននាំឱ្យរូបគេរក្សាបានចំនួនចាញ់របស់ខ្លួននៅត្រឹមតែ២លើកជាដដែល ។
នៅក្នុងការប្រកួត៣ទឹកដំបូង បឺនវ័យ៣០ឆ្នាំបានគ្រប់គ្រងការប្រកួតទាំងស្រុងជាមួយនឹងការប្រើកណ្តាប់ដៃវាយខាវឆ្វេងដ៏មានប្រសិទ្ធភាព ។ទោះជាយ៉ាងណា នៅក្នុងទឹកទី៨ រូបគេបានរងកណ្តាប់ដៃបេលត្រានដួលត្រូវអាជ្ញាកណ្តាលរាប់ដល់៨ ។ នេះជាលើកទី១ហើយក្នុងរយៈពេល៣ឆ្នាំដែលបឺនត្រូវដៃគូវាយឱ្យដួល ។ ចំណែក៤ទឹកបន្ទាប់ ការប្រកួតហាក់ប្រដំប្រសងគ្នា ។ ជាលទ្ធផលពិន្ទុពីចៅក្រមទាំង៣រូបគឺ ចៅក្រមទី១ឱ្យបឺនឈ្នះ ១១៥-១១២ ខណៈចៅក្រមទី២ឱ្យ បេលត្រានឈ្នះ ១១៥-១១៣ ឯចៅក្រមទី៣ឱ្យពិន្ទុស្មើគ្នា ១១៤-១១៤ ។
សូមបញ្ជាក់ថា រីកគី បឺន នៅក្នុងការប្រកួត៣៩លើកទាំងលើកនេះគឺឈ្នះ៣៦លើកស្មើ១ផ្តួលដៃគូឱ្យសន្លប់បាន១១លើក ។ គេបានក្លាយជាម្ចាស់ខ្សែក្រវាត់ស្ថាប័នWBO បន្ទាប់ពីឈ្នះកីឡាករអូស្ត្រាលី Michael Katsidis ដោយពិន្ទុ កាលពីថ្ងៃទី៥ ខែវិច្ឆិកា ឆ្នាំ២០១១ ។ ដោយឡែកកីឡាករបេលត្រាន ទោះបីគេមានបទពិសោធន៍ប្រកួតតិចជាងរីកគី បឺនក្តី (៣១លើក) ប៉ុន្តែនៅក្នុងជ័យជម្នះរបស់គេចំនួន២៧លើក គឺគេផ្ដួលដៃគូឱ្យសន្លប់បានដល់ទៅ១៧លើក ឯ៦លើកចាញ់គូប្រកួត និងស្មើ១លើក ៕
ចែករំលែកព័តមាននេះ