ខេត្តប៉ៃលិន ៖ ជនសង្ស័យជួញដូរគ្រឿងញៀនម្នាក់កំពុងឈរលេងបុកប៊ីយ៉ាជាមួយមិត្តភក្តិ ត្រូវបានកម្លាំងនគរបាលអធិការក្រុងប៉ៃលិនមានការសង្ស័យក៏ធ្វើការឃាត់ខ្លួន និងឆែកឆេររកឃើញថ្នាំញៀន បង្កឱ្យមានការភ្ញាក់ផ្អើលយ៉ាងខ្លាំងដល់អ្នកលេងជាមួយគ្នា ។
ហេតុការណ៍នេះបានកើតឡើងកាលពីវេលាម៉ោង១០និង៣០នាទីព្រឹកថ្ងៃទី២៥ ខែកុម្ភៈ ឆ្នាំ២០១៩ នៅចំណុចតាបបុកប៊ីយ៉ាជាប់នឹងស្ពានអូរតាវ៉ៅ ស្ថិតក្នុងភូមិកូនភ្នំ សង្កាត់អូរតាវ៉ៅ ក្រុងប៉ៃលិន ។
ប្រភពព័ត៌មានពីនគរបាលបានឱ្យដឹងថា ជនសង្ស័យម្នាក់ខាងលើឈ្មោះ ថេង ថារិទ្ធ ភេទប្រុស អាយុ៣០ឆ្នាំ មុខរបរមិនពិតប្រាកដ រស់នៅក្នុងភូមិកើតហេតុខាងលើ និងដកហូតបានវត្ថុតាងរួមមានម្សៅក្រាមពណ៌សថ្លាសង្ស័យថាជាសារធាតុញៀន(ម៉ាទឹកកក) ចំនួន៤កញ្ចប់ ក្នុងនោះ១កញ្ចប់ធំ និង៣កញ្ចប់តូច ។
ប្រភពព័ត៌មានបានបន្តទៀតថា មុនពេលកើតហេតុ គេឃើញជនសង្ស័យខាងលើចូលទៅលេងបុកប៊ីយ៉ាជាមួយមិត្តភក្តិ ដោយមានសេចក្តីរាយការណ៍មកនគរបាល ក៏បានចាត់កម្លាំងឱ្យចុះទៅកន្លែងកើតហេតុខាងលើ ដើម្បីធ្វើការឆែកឆេរទៅលើខ្លួនជនសង្ស័យតែម្តង ។
ក្រោយពេលឃាត់ខ្លួនរួច នគរបាលបានរកឃើញសុទ្ធតែកញ្ចប់ម្សៅក្រាមពណ៌សសង្ស័យជាសារធាតុញៀនជាច្រើនកញ្ចប់នៅក្នុងហោប៉ៅជនសង្ស័យ ទើបចាប់ឃាត់ខ្លួនបញ្ជូនទៅអធិការក្រុងប៉ៃលិនភ្លាមៗ ។
បច្ចុប្បន្នជនសង្ស័យខាងលើត្រូវបានកម្លាំងជំនាញកំពុងធ្វើការសាកសួរ និងកសាងសុំណុំរឿង ដើម្បីបញ្ជូនទៅតុលាការចាត់ការតាមនីតិវិធី ៕
ចែករំលែកព័តមាននេះ