រាជធានីភ្នំពេញ ៖ នៅក្នុងជំនួបជាមួយមន្ត្រីជាន់ខ្ពស់នៃកម្ពុជានៅទីក្រុងញូវដេលី ប្រទេសឥណ្ឌា កាលពីពេលថ្មីៗនេះ តំណាងវិស័យឯកជននៃប្រទេសឥណ្ឌា បានបង្ហាញចំណាប់អារម្មណ៍វិនិយោគលើវិស័យសំខាន់ៗចំនួន៤នៅក្នុងប្រទេសកម្ពុជា រួមមាន វិទ្យាសាស្ត្រនិងបចេ្ចកវិទ្យា, ទេសចរណ៍,…
រាជធានីភ្នំពេញ ៖ នៅក្នុងជំនួបជាមួយមន្ត្រីជាន់ខ្ពស់នៃកម្ពុជានៅទីក្រុងញូវដេលី ប្រទេសឥណ្ឌា កាលពីពេលថ្មីៗនេះ តំណាងវិស័យឯកជននៃប្រទេសឥណ្ឌា បានបង្ហាញចំណាប់អារម្មណ៍វិនិយោគលើវិស័យសំខាន់ៗចំនួន៤នៅក្នុងប្រទេសកម្ពុជា រួមមាន វិទ្យាសាស្ត្រនិងបចេ្ចកវិទ្យា, ទេសចរណ៍, ហេដ្ឋារចនាសម្ព័ន្ធ ដែលមានផ្លូវថ្នល់ ផ្លូវដែក និងស្ពាននិងវិស័យកសិឧស្សាហកម្ម ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងទំនាក់ទំនងពាណិជ្ជកម្ម រវាងប្រទេសទាំងពីរឱ្យបានខ្លាំងក្លាថែមទៀត ។
លោក សាន់ឌិប សូម៉ានី ប្រធានសហព័ន្ធសភាពាណិជ្ជកម្ម និងឧស្សាហកម្មឥណ្ឌា បានជម្រាបអំពីទំនាក់ទំនងពាណិជ្ជកម្ម និងវិនិយោគរវាងប្រទេសឥណ្ឌា និងរដ្ឋជាសមាជិកអាស៊ាន ព្រមទាំងចក្ខុវិស័យរបស់រដ្ឋាភិបាលឥណ្ឌា ក្នុងការពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្ម ជាមួយកម្ពុជា ដែលបច្ចុប្បន្ននៅមានទំហំតិចតួចនៅឡើយ បើធៀបជាមួយប្រទេសផ្សេងៗនៅក្នុងតំបន់។ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានសម្តែងការស្វាគមន៍ចំពោះគម្រោងវិនិយោគខាងលើ និងបានបង្ហាញពីលក្ខណៈអំណោយផលនៃទីតាំងភូមិសាស្ត្រប្រទេសកម្ពុជា គោលនយោបាយបើកចំហរ និងគោលការណ៍លើកទឹកចិត្តវិនិយោគផ្សេងៗរបស់រាជរដ្ឋាភិបាល ព្រមទាំងយុទ្ធសាស្ត្រអភិវឌ្ឍន៍ឧស្សាហកម្ម (IDP) ឆ្នាំ២០១៥-២០២៥ ដែលមានគោលដៅប្រែក្លាយកម្ពុជា ពីប្រទេសដែលពឹងផ្អែកខ្លាំងលើការប្រើប្រាស់កម្លាំង ទៅជាប្រើប្រាស់ជំនាញនៅឆ្នាំ២០៣០ ។
លោកបានលើកឡើងអំពីសក្តានុពលនៃវិស័យកសិកម្ម និងកសិ-ឧស្សាហកម្មកម្ពុជា និងបានស្នើសុំលោក សាន់ឌិប សូម៉ានី ជួយកៀងគរធុរជនឥណ្ឌា ធ្វើការបណ្តាក់ទុនលើការកែច្នៃកសិផលខ្មែរ សម្រាប់នាំចេញទៅកាន់ប្រទេសឥណ្ឌា និងផ្គត់ផ្គង់ទីផ្សារក្នុងតំបន់ និងពិភពលោក ។ លោករដ្ឋមន្ត្រីក៏បានសំណូមពរឱ្យមានជើងហោះហើរត្រង់ពីឥណ្ឌា មកកម្ពុជា ដើម្បីលើកកម្ពស់វិស័យទេសចរណ៍ វប្បធម៌ និងកិច្ចសហប្រតិបត្តិការធុរកិច្ចនៃប្រទេសទាំងពីរផងដែរ ។
សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាចក្រកម្ពុជា បានលើកឡើងកន្លងមកថា កម្ពុជាស្វាគមន៍ចំពោះវិនិយោគិនពីគ្រប់ទិសទី លើកលែងតែក្រុមភេរវករអាស៊ីសប៉ុណ្ណោះ ។ យោងតាមគេហទំព័រផ្លូវការរបស់សម្ដេចអគ្គមហាសេនាបតីតេជោហ៊ុន សែន សម្ដេចបានមានប្រសាសន៍ថា សម្ដេចសូមគាំទ្រ និងលើកទឹកចិត្តដល់អ្នកវិនិយោគមកវិនិយោគនៅកម្ពុជាកាន់តែច្រើន ។ កាលពីពេលថ្មីៗនេះ រាជរដ្ឋាភិបាលបានធ្វើការកែសម្រួលស្ថាប័នមានសមត្ថកិច្ចត្រួតពិនិត្យទំនិញនាំចេញ-នាំចូល ដើម្បីសម្រួលពាណិជ្ជកម្ម និងពង្រឹងភាពប្រកួតប្រជែង ដើម្បីវិនិយោគគិននិងពាណិជ្ជករទទួលបានផលប្រយោជន៍កាន់តែច្រើនឡើង ក្នុងនោះ មាត្រា១. ត្រូវបានបញ្ចប់តួនាទី និងភារកិច្ចត្រួតពិនិត្យទំនិញនាំចេញ-នាំចូលរបស់អគ្គនាយកដ្ឋានកម្ពុជាត្រួតពិនិត្យទំនិញ នីហរ័ណ អាហរ័ណ និងបង្ក្រាបការក្លែងបន្លំ(កាំកុងត្រូល)នៃក្រសួងពាណិជ្ជកម្មពីច្រកទ្វារអន្តរជាតិ ច្រកទ្វារព្រំដែនអន្តរជាតិ ច្រកទ្វារព្រំដែនទ្វេភាគី ច្រកទ្វាតំបន់ព្រំដែន ច្រកទ្វារកំពង់ផែសមុទ្រ តំបន់សេដ្ឋកិច្ចពិសេស ទីកន្លែងសន្និធិគយបណ្ដោះអាសន្ន និងទីកន្លែងត្រួតពិនិត្យទំនិញនាំចេញ-នាំចូលផ្សេងទៀតនៅទូទាំងព្រះរាជាណាចក្រកម្ពុជា។ មាត្រា២.- អគ្គនាយកដ្ឋានគយ និងរដ្ឋាករកម្ពុជានៃក្រសួងសេដ្ឋកិច្ច និងហិរញ្ញវត្ថុគឺជាស្ថាប័នតែមួយគត់មានសមត្ថកិច្ចក្នុងការត្រួតពិនិត្យទំនិញនាំចេញ-នាំចូលនៅច្រកទ្វារអន្តរជាតិ ច្រកទ្វារព្រំដែនអន្តរជាតិ ច្រកទ្វារព្រំដែនទ្វេភាគី ច្រកតំបន់ព្រំដែន និងច្រកទ្វារកំពង់ផែសមុទ្រតំបន់ សេដ្ឋកិច្ចពិសេសទីកន្លែងសន្និធិគយបណ្ដោះអាសន្ន និងទីកន្លែងត្រួតពិនិត្យទំនិញនាំចេញនាំចូលផ្សេងទៀត ។
សូមជម្រាបថា ចាប់តាំងពីកិច្ចព្រមព្រៀងពាណិជ្ជកម្មសេរីអាស៊ាន-ឥណ្ឌា បានចូលជាធរមាននៅថ្ងៃទី១ ខែមករា ឆ្នាំ២០១០ បានធ្វើឱ្យទំហំពាណិជ្ជកម្មទ្វេភាគី និងទឹកប្រាក់វិនិយោគផ្ទាល់ (FDI) ពីប្រទេសឥណ្ឌា មកកាន់ប្រទេសអាស៊ាន មានវឌ្ឍនភាពជាលំដាប់ ។ ជាក់ស្តែង ទឹកប្រាក់វិនិយោគផ្ទាល់ពីឥណ្ឌា មកកាន់អាស៊ាន បានកើនឡើងពី១,៤៧ពាន់លានដុល្លារ ក្នុងឆ្នាំ២០១៥ ដល់១,៧៣ពាន់លានដុល្លារ នៅក្នុងឆ្នាំ២០១៧ ។ ទន្ទឹមគ្នានេះ ទំហំពាណិជ្ជកម្មទ្វេភាគីរវាងអាស៊ាន និងឥណ្ឌា សម្រេចបានទឹកប្រាក់ ៧៣,៥៩ពាន់លានដុល្លារ គឺកើនឡើង ២៥,៥% បើធៀបនឹងឆ្នាំ២០១៦ ដែលមានត្រឹមតែ៥៨,៦ពាន់លានដុល្លារប៉ុណ្ណោះ ៕
ចែករំលែកព័តមាននេះ