ពិតជាអ្នកក្លាហានមែនបោះសម្តីឡើងឡូយ«តើវាយប៉ុណ្ណឹងអស់លុយប៉ុន្មានហា»…!
- សៀមរាប
ខេត្តសៀមរាប ៖ បន្ទាប់ពីមានពាក្យបណ្តឹងរបស់ជនរងគ្រោះ ឈ្មោះ ស៊ីន ហាក់ ភេទប្រុស អាយុ៣៧ឆ្នាំ មុខរបរលក់ចាប់ហួយ រស់នៅភូមិអូរទទឹង…
ខេត្តសៀមរាប ៖ បន្ទាប់ពីមានពាក្យបណ្តឹងរបស់ជនរងគ្រោះ ឈ្មោះ ស៊ីន ហាក់ ភេទប្រុស អាយុ៣៧ឆ្នាំ មុខរបរលក់ចាប់ហួយ រស់នៅភូមិអូរទទឹង ឃុំព្រះដាក់ ស្រុកបន្ទាយស្រី ខេត្តសៀមរាប កាលពីថ្ងៃទី២៥ ខែកុម្ភៈ ឆ្នាំ២០១៩ ខណៈពេលនោះកម្លាំងនគរបាលអធិការស្រុកបន្ទាយស្រី ចុះទៅដល់ផ្ទះបុរសជើងខ្លាំងក្នុងភូមិដែលបានយកដែកបំពង់ទីបទៅវាយគេដល់ផ្ទះ ។
ខណៈជនរងគ្រោះកំពុងលក់ចាប់ហួយហើយនាំខ្លួនយកមកសាកសួរនៅអធិការស្រុករួចឆ្លើយសារភាពថា រូបគេពិតជាបានវាយជនរងគ្រោះមែន ទើបកម្លាំងជំនាញសុំគោលការណ៍ព្រះរាជអាជ្ញាអមសាលាដំបូងខេត្តដើម្បីធ្វើការឃាត់ខ្លួន ហើយបញ្ជូនទៅការិយាល័យនគរបាលកំរិតធ្ងន់ដើម្បីរៀបចំកសាងសំណុំរឿងបញ្ជូនបន្តទៅតុលាការចាត់ការតាមនិតិវិធីច្បាប់ ។
ហេតុការឃាត់ខ្លួនជនសង្ស័យនៅក្នុងអធិការស្រុកបន្ទាយស្រីនោះបានធ្វើឡើងនៅវេលាម៉ោង០៦និង៣០នាទីយប់ ថ្ងៃទី២៥ ខែកុម្ភៈ ឆ្នាំ២០១៩ ស្ថិតនៅក្នុងអធិការស្រុកបន្ទាយស្រី ខេត្តសៀមរាប នេះបើតាមសម្តីរបស់ប៉ូលិសស្រុកបន្ទាយស្រី ។
លោកវរសេនីយឯក ឡុង សំណាង អធិការស្រុកបន្ទាយស្រី ខេត្តសៀមរាបបានប្រាប់នៅរសៀលថ្ងៃទី២៦ ខែកុម្ភៈ ឆ្នាំ២០១៩ នេះថា ជនសង្ស័យឈ្មោះ ហ៊ាន ហិន ភេទប្រុស អាយុ៣៨ឆ្នាំ រស់នៅភូមិអូរទទឹង ឃុំព្រះដាក់ស្រុកបន្ទាយស្រី ខេត្តសៀមរាប ។
លោកបានបញ្ជាក់ថា នៅថ្ងៃទី២៥ ខែកុម្ភៈ ឆ្នាំ២០១៩ កម្លាំងសមត្ថកិច្ចបានទទួលបណ្តឹងពីប្រជាពលរដ្ឋម្នាក់ឈ្មោះ ស៊ីន ហាក់ ភេទប្រុស អាយុ៣៧ឆ្នាំ មុខរបរលក់ចាប់ហួយ រស់នៅភូមិអូរទទឹង ឃុំព្រះដាក់ ស្រុកបន្ទាយស្រី ខេត្តសៀមរាប ។ អំពីករណីហិង្សាដោយចេតនាដោយមានស្ថានទម្ងន់ទោស(វាយនឹងបំពង់ដែកទីប) ដែលកើតឡើងនៅថ្ងៃទី២៤ ខែកុម្ភៈ ឆ្នាំ២០១៩ វេលាម៉ោង១១និង00នាទីថ្ងៃត្រង់ ស្ថិតនៅភូមិ-ឃុំជាមួយគ្នា ។
ហើយករណីនោះបានកើតឡើងនៅចំណុចផ្ទះលក់នំបញ្ចុកក្បែរផ្ទះជនរងគ្រោះដែលស្ថិតក្នុងភូមិអូរទទឹង ឃុំព្រះដាក់ ដែលបានកើតចេញពីការប្រចណ្ឌប្រពន្ធ ហើយបានឆាតតបគ្នារវាង ជនរងគ្រោះ និងជនសង្ស័យរហូតដល់ជនសង្ស័យខលមកប្រាប់មេប៉ុស្តិ៍សុំវាយមនុស្សម្នាក់តែលោកនាយប៉ុស្តិ៍បានឆ្លើយប្រាប់ហើយណែនាំឱ្យមកប៉ុស្តិ៍ដើម្បីរកដំណោះស្រាយតាមផ្លូវច្បាប់តែមិនបានមក ។
រហូតដល់ថ្ងែទី២៤ ខែកុម្ភៈ ឆ្នាំ២០១៩ ជនសង្ស័យឈ្មោះ ហ៊ាន ហិន ភេទប្រុស អាយុ៣៨ឆ្នាំបានយកបំពង់ទីបប្រវែង80cm ក៏ដើរតម្រង់ទៅរកជនរងគ្រោះដែលកំពុងតែលក់អីវ៉ាន់ចាបហួយនៅផ្ទះ ឃើញដូច្នោះក៏ជនរងគ្រោះខាងលើដើរទៅរកឱ្យគេជួយក្បែរផ្ទះ ហើយក៏ស្ទុះទៅយកប៉ែលមកដើម្បីការពារខ្លួន ។
ពេលនោះជនសង្ស័យក៏វាយតែម្តងដោយជនរងគ្រោះពុំបានតបតទេគិតតែយកប៉ែលរងហើយដួល ប៉ះទៅនឹងគល់ឈើ ហើយត្រូវថូផ្កាបែកបណ្តាលឱ្យត្រូវចំក្បាលផ្នែកខាងក្រោយ ហូរឈាម ហើយជនសង្ស័យវាយមកលើជនរងគ្រោះត្រូវពីរបំពង់ទីបចំឆ្អឹងជំនីរទៀតត្រូវបានអ្នកលក់នំបញ្ចុកជួយទាន់ ។ បន្ទាប់មកត្រូវបានបងប្អូនជនរងគ្រោះដឹកយកទៅសង្ក្រោះនៅមន្ទីរពេទ្យឯកជនក្នុងខេត្តសៀមរាប ។
លោកបានបញ្ជាក់ទៀតថា ក្រោយពីសួរនាំរួចមកជនសង្ស័យបានឆ្លើយសារភាពថា ខ្លួនពិតជាបានយកដែកទីបវាយទៅលើជនរងគ្រោះខាងលើពិតប្រាកដមែន ថែមទាំងបោះសំដីថា «តើវាយប៉ុណ្ណឹងអស់លុយប៉ុន្មានហា» ។ បច្ចុប្បន្នជនសង្ស័យត្រូវបានកម្លាំងជំនាញរៀបចំកសាងសំណុំរឿងបញ្ជូនទៅតុលាការចាត់ការទៅតាមនិតិវិធីច្បាប់ ៕
ចែករំលែកព័តមាននេះ