រាជធានីភ្នំពេញ ៖ កម្ពុជានឹងធ្វើម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីលើកទី៧ ស្តីពីកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ហៅកាត់ថា(RCEP)ចាប់ពីថ្ងៃទី២ ដល់ថ្ងៃទី៤ ខែមីនា ឆ្នាំ២០១៩ខាងមុខ ដែលនឹងប្រាព្ធធ្វើនៅខេត្តសៀមរាប ។
យោងតាមសេចក្តីជូនដំណឹងរបស់ក្រសួងពាណិជ្ជកម្ម កិច្ចប្រជុំនេះនឹងពិភាក្សាអំពីផែនការចរចាRCEP ឆ្នាំ២០១៩ ផ្តល់ការណែនាំលើការចរចាបើកច្រកទីផ្សារ និងជំរុញបន្ថែមឱ្យអ្នកចរចាទាំងអស់ខិតខំប្រឹងប្រែងបញ្ចប់ការចរចាលើជំពូកដែលនៅសេសសល់ សំដៅឈានទៅបញ្ចប់ការចរចាកិច្ចព្រមព្រៀងនេះទាំងស្រុងនៅឆ្នាំ២០១៩នេះ ។ ក្រសួងបញ្ជាក់ថា កិច្ចប្រជុំនេះនឹងទទួលបានការអញ្ជើញជាអធិបតីភាពដ៏ខ្ពង់ខ្ពស់ពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានការចូលរួមពីរដ្ឋមន្ត្រី និងគណៈប្រតិភូជាន់ខ្ពស់មកពីប្រទេសចរចាកិច្ចព្រមព្រៀងទាំង១៦ និងលេខាធិការដ្ឋានអាស៊ានផងដែរ ។
បើតាមលោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់កោះសន្ដិភាពថា RCEP ជាកិច្ចប្រជុំរដ្ឋមន្ត្រីអាស៊ានទាំង១០ បូកជាមួយនឹង៦ប្រទេសផ្សេងទៀត រួមមាន ជប៉ុន, ចិន, កូរ៉េ, អូស្ត្រាលី, នូវែលសេឡង់ និងឥណ្ឌា ។ លោកបន្ដថា គណៈប្រតិភូ នឹងអញ្ជើញមកដល់ថ្ងៃទី២៨ ខែកុម្ភៈខាងមុខនេះ ហើយកិច្ចប្រជុំនឹងចាប់ផ្ដើមពីថ្ងៃទី២ រហូតដល់ថ្ងៃទី៤ មីនា ឆ្នាំ២០១៩ ព្រមទាំងមានទស្សនកិច្ចផ្សេងៗទៀត តែកិច្ចប្រជុំជាក្រុមតូចៗច្រើន មុនកិច្ចប្រជុំធំថ្នាក់រដ្ឋមន្ត្រី នឹងប្រព្រឹត្តទៅនាថ្ងៃទី២ ខែមីនា ។ លោកថ្លែងថា ៖ «ការពិត RCEPជាកិច្ចព្រមព្រៀងមួយដ៏ធំ ព្រោះយើងដឹងថាប្រទេសអាស៊ានទាំង១០ បូកជាមួយនឹងប្រទេសផ្សេងៗទៀត អីចឹងទំហំពាណិជ្ជកម្មគឺវាធំ ដូច្នេះមានការចរចាច្រើនដង ច្រើនឆ្នាំមកហើយ ប៉ុន្តែវាជាការចរចារគ្រប់ជ្រុងជ្រោយ ព្រោះមិនមែនជាការចរចាតែមួយបញ្ហានោះទេ »។ លោកថា ៖« ការចរចានេះវាខុសប្លែកពីការចរចារឿងខ្លះ ឧទាហរណ៍គ្រាន់តែចរចារឿងពាណិជ្ជកម្ម អីចឹង យើងនិយាយតែរឿងពាណិជ្ជកម្ម រឿងកាត់ពន្ធ កាត់អីហ្នឹង អីចឹងអាហ្នឹងវាឆាប់ ប៉ុន្ដែនេះជាការចរចាគ្រប់មុខទាំងអស់ តាំងពីពាណិជ្ជកម្ម វិនិយោគ តាំងពីវិស័យនានាទាំងអស់ ជាកញ្ចប់ ជាលក្ខណៈគ្រប់ជ្រុងជ្រោយតែម្តង អីចឹងហើយបានជាការចរចានេះវាយូរ » ។
លោក ស៊ាង ថៃ បន្ដថា ៖« ថ្នាក់ដឹកនាំ តែងតែមានទិសដៅចង់ធ្វើឲ្យបានឆាប់ចប់ ក៏ប៉ុន្តែវាមានពាក់ព័ន្ធជាមួយនឹងបញ្ហាច្បាប់ទម្លាប់ប្រទេសមួយៗដែលត្រូវការរយៈពេលកែសម្រួលឲ្យស៊ីគ្នាជាមួយនឹងកិច្ចព្រមព្រៀង ដែលយើងនឹងឯកភាពគ្នានោះ អីចឹងហើយបានជាវាមានការយឺតយ៉ាវ ប៉ុន្តែយើងសង្ឃឹមហើយសង្ឃឹម ទៀតថា ឆ្នាំ២០១៩នេះនឹងអាចបញ្ចប់ទាំងស្រុងតែម្ដង »។ យ៉ាងនេះក្ដី លោកថា ៖« វាមិនមែនមានន័យថា ពេលប្រជុំចប់នៅខ្មែរយើងហ្នឹង វាចប់តែម្តងនោះទេ ព្រោះក្នុងឆ្នាំ២០១៩ នឹងអាចមានប្រជុំបន្តៗទៀត អាចប្រជុំកំពូលនៅថៃ ដែលឆ្នាំនេះប្រទេសថៃជាប្រធានអាស៊ាន អីចឹងអាចសម្រេចពេលប្រជុំកំពូល » ។
នៅពេលសួរថា កិច្ចព្រមព្រៀងនេះ នឹងសំខាន់យ៉ាងម៉េចសម្រាប់កម្ពុជា និងតំបន់ លោក ស៊ាង ថៃ បានឲ្យដឹងថា ៖« ការពិត ពាណិជ្ជកម្មសេរី យើងបានធ្វើកន្លងមកហូរហែហើយ ហើយក្នុងតំបន់អាស៊ានក៏យើងឃើញផលប្រយោជន៍ដែលកម្ពុជាទទួលបានទីផ្សារធំ ហើយយើងក៏បានធ្វើជាមួយអង្គការពាណិជ្ជកម្មពិភពលោក ជាមួយនឹងតំបន់នានា ប៉ុន្ដែសម្រាប់ [RCEP] វាជាតំបន់មួយធំដែរ សឹងមួយចំហៀងពិភពលោក អីចឹងនៅពេលវាបញ្ចប់ទាំងស្រុង ទំនិញយើងវាហូរទៅហូរមក វាស្រួលជាងពេលយើងមិនទាន់មានកិច្ចព្រមព្រៀងហ្នឹង ។ ទីផ្សារធំ សម្រាប់យើងនាំចេញ អីចឹងយើងមិនសូវជាព្រួយបារម្ភពីរឿងគេគាបសង្កត់ទីផ្សារនេះ ទីផ្សារនោះទេ » ។
ឆ្លៀតឱកាសដែលកម្ពុជាធ្វើជាម្ចាស់ផ្ទះនៃកិច្ចប្រជុំថ្នាក់រដ្ឋមន្ត្រីនេះ កម្ពុជានឹងបង្ហាញទៅដល់ថ្នាក់ដឹកនាំទាំង១៦ប្រទេស អំពីតំបន់ទេសចរណ៍ដ៏ល្បីល្បាញដើម្បីទាក់ទាញចំណាប់អារម្មណ៍ពីភ្ញៀវទេសចរ និងបណ្ដាវិនិយោគិនផងដែរ ។ នេះបើតាមលោក ស៊ាង ថៃ មន្ត្រីអ្នកនាំពាក្យក្រសួងពាណិជ្ជកម្ម ។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជា លោកបណ្ឌិត គី សេរីវឌ្ឍន៍ យល់ថា កម្ពុជានឹងទទួលបានប្រយោជន៍ច្រើនពីកិច្ចប្រជុំនេះ ពិសេសរាជរដ្ឋាភិបាលបង្ហាញឲ្យពិភពលោកបានស្គាល់ពីភាពរីកចម្រើននៃសេដ្ឋកិច្ចរបស់កម្ពុជា និងចង់ជំរុញវិស័យទេសចរណ៍ឲ្យកាន់តែរីកចម្រើនថែមទៀត ។
លោកបណ្ឌិតមានប្រសាសន៍ថា ៖« ការដែលកម្ពុជាធ្វើជាម្ចាស់ផ្ទះរៀបចំកិច្ចប្រជុំនានានៅខេត្តសៀមរាប គឺជាការផ្សព្វផ្សាយមួយពីទីផ្សារទេសចរណ៍ ដូច្នេះមានន័យថា រាជរដ្ឋាភិបាលចង់ជំរុញ និងយកចិត្តទុកដាក់លើវិស័យទេសចរណ៍ដែលជាកត្តាសំខាន់ក្នុងការជំរុញកំណើនសេដ្ឋកិច្ច »៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ