រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋ ទូទាំងប្រទេស កុំមានការតក់ស្លុតឬភ័យខ្លាចចំពោះជំងឺឆ្កែខាំ ។ សម្តេចតេជោ…
រាជធានីភ្នំពេញ ៖ សម្តេចតេជោនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋ ទូទាំងប្រទេស កុំមានការតក់ស្លុតឬភ័យខ្លាចចំពោះជំងឺឆ្កែខាំ ។ សម្តេចតេជោ បានអំពាវនាវបែបនេះនៅក្នុងពិធីអបអរសាទរ«ទិវាជាតិទីក្រុងស្អាត» លើកទី៧ ក្រោមប្រធានបទ «ទីក្រុងស្អាត ទីក្រុងផ្តល់ភាពកក់ក្តៅ» ដែលប្រារព្ធធ្វើនៅសណ្ឋាគារសុខាភ្នំពេញ កាលពីព្រឹកថ្ងៃទី២៥ ខែកុម្ភៈ ។
សម្តេចតេជោ ហុ៊ន សែន ថ្លែងថា ក្នុងរយៈពេលកន្លងមកនេះ មានការជ្រួលច្របល់និងតក់ស្លុតចំពោះការស្លាប់ដោយសារឆ្កែខាំ ។ សម្តេចបញ្ជាក់ថា៖ខ្ញុំសូមយកឱកាសនេះ អំពាវនាវចំពោះប្រជាពលរដ្ឋ សូមកុំឲ្យមានការតក់ស្លុតនិងភ័យខ្លាច រហូតដល់វិទ្យាស្ថានប៉ាស្ទ័រនិងទីកន្លែងនានាមានការកកកុញដោយអ្នកព្យាយាមទៅរកចាក់វ៉ាក់សាំង ដែលអ្នកខ្លះមិនត្រូវចាក់វ៉ាក់សាំងក៏ទៅចាក់ដែរ ។
សម្តេចតេជោបន្តថា អ្នកដែលមិនមានឆ្កែខាំក៏ទៅទទួលយកសេវាដែរ ដូច្នេះបណ្តាលឲ្យមានការកកស្ទះ ឯក្រសួងសុខាភិបាលបានអំពាវនាវរួចហើយថាយើងនឹងខិតខំដោះស្រាយ។ ប៉ុន្តែ អ្នកដែលអត់មានឆ្កែឬឆ្មាខាំក៏ទៅទទួលសេវានៅទីនោះដែរ ដែលករណីនេះធ្វើឲ្យមានការពិបាកចំពោះអ្នកដែលចាំបាច់ត្រូវទទួលវ៉ាក់សាំង ព្រោះវាមានកម្មវិធីចំពោះអ្នកត្រូវទទួលវ៉ាក់ សាំងឆ្កែខាំ ។
សម្តេចតេជោមានប្រសាសន៍ថា វិធីដែលល្អក្នុងការទប់ស្កាត់ជំងឺឆ្កែឆ្កួតនោះ គឺកុំឲ្យឆ្កែខាំ អាហ្នឹងមានតែប៉ុណ្ណឹងទេគឺល្អជាងគេ ហើយ កុំទៅប្រឡែងជាមួយសត្វឆ្កែ កុំទៅប្រឡែងជាមួយសត្វមានពិស ។ អាហ្នឹងគឺវិធីដ៏ល្អហើយ ។ នៅតាមជនបទ សត្វឆ្កែវាមានកូនវាការពារកួនរបស់វា ដូច្នេះវាខាំក៏មាន អ្នកទាំងនោះហើយដែលត្រូវការសេវាបន្ទាន់ ។ សម្តេចតេជោ បានស្នើដល់ក្រសួងសុខាភិបាល ត្រូវពង្រាយសេវាជួយសង្គ្រោះអ្នកត្រូវឆ្កែខាំទៅដល់មន្ទីពេទ្យមួយចំនួន ត្រូវមានសេវាបែបនេះ ហើយក៏អាចផ្តល់លទ្ធភាពដល់គ្លីនិកឯកជន ក្នុងការផ្តល់វ៉ាក់សាំងឆ្កែខាំផងដែរ ។
សម្តេចតេជោថ្លែងថា ការផ្តល់សេវានេះគ្រូពេទ្យត្រូវតែពិគ្រោះចំពោះជំងឺដែលកើតឡើង ដោយកុំចេះតែផ្តល់ ដោយមិនបានពិគ្រោះមូលហេតុជំងឺឲ្យសោះ ។ «អីុចឹង ខ្ញុំសូមអំពាវនាវចំពោះបញ្ហាឆ្កែខាំ កុំតក់ស្លុតចំពោះការស្លាប់របស់កុមារីម្នាក់ ដែលកើតឡើងដោយឆ្កែខាំ»។សម្តេចតេជោបានលើកឡើងថា កន្លងមក
មានអ្នកខ្លះបានជេរប្រទេចវិទ្យាស្ថានប៉ាស្ទ័រ និងក្រសួងសុខាភិបាលផងដែរ ចំពោះការផ្តល់វ៉ាក់សាំងនេះ
សួមជម្រាបថា ការលើកឡើងរបស់ប្រមុខរាជរដ្ឋាភិបាលនេះ គឺបន្ទាប់ពីមានការភ្ញាក់ផ្អើលពេញផ្ទៃប្រទេសជិត១ខែមកហើយ ដោយប្រជាពលរដ្ឋក្មេងចាស់ប្រុសស្រី បាននាំគ្នាសម្រុកមកចាក់ថ្នាំបង្ការនៅវិទ្យាស្ថានប៉ាស្ទ័រក្នុង១ថ្ងៃៗជាច្រើនរយនាក់ ធ្វើឲ្យកំណាត់មហាវិថីព្រះមុនីវង្សមុខវិទ្យាស្ថានប៉ាស្ទ័រត្រូវកកស្ទះចរាចរណ៍ណែនណាន់តាន់តាប់ ។
ចែករំលែកព័តមាននេះ