រាជធានីភ្នំពេញ ៖ រឿងក្តីឃាតកម្មលើឧកញ៉ា អុឹង ម៉េងជឺ ត្រូវបានសាលាដំបូងរាជធានីភ្នំពេញ កាលពីព្រឹកថ្ងៃទី២៥ ខែកុម្ភៈ បន្តបើកសវនាការដោយមានជនជាប់ចោទ៦នាក់ ក្នុងនោះ៥នាក់ត្រូវបានតម្រូវឲ្យនាំមកឈរនៅមុខរង្វង់ក្រចកសេះ ដើម្បីឲ្យអង្គសវនាការសាកសួរដេញដោល និងម្នាក់បានស្លាប់ក្នុងពេលឃុំខ្លួនបណ្តោះអាសន្នកន្លងមក ។
ជនជាប់ចោទមាន ៖ ១-ឧកញ៉ា ថោង សារ៉ាត់ ភេទប្រុស អាយុ ៣៨ឆ្នាំ ថៅកែក្រុមហ៊ុន៩៩៩ ជាប់ចោទពីបទផ្តើមគំនិតក្នុងអំពើឃាតកម្មគិតទុកជាមុន ។ ២-ឈ្មោះ សៀង វាសនា ភេទប្រុស អាយុ៤៤ឆ្នាំ ជាជនដៃដល់ ។ ៣-ឈ្មោះ លី សៅ ហៅវី ភេទប្រុស អាយុ៤២ឆ្នាំ ជាជនដៃដល់ស្លាប់ក្នុងពន្ធនាគារ ជាប់ចោទពីបទឃាតកម្មគិតទុកជាមុន ។ ៤-ឈ្មោះ កូយ ចាន់ថុល ភេទប្រុស អាយុ២៩ឆ្នាំ ។៥-ឈ្មោះ មាស សម្បត្តិ ភេទប្រុស អាយុ២៧ឆ្នាំ និង៦-ឈ្មោះ ឈុន ចិត្រា ភេទប្រុស ជាប់ចោទពីបទសមគំនិតក្នុងអំពើឃាតកម្មគិតទុកជាមុន ។
នៅក្នុងសវនាការលើសំណុំរឿងឃាតកម្មមួយនេះ គេសង្កេតឃើញថា កន្លងមក គេកម្រឃើញវត្តមានឧកញ៉ា ថោង សារ៉ាត់ ចូលរួមក្នុងសវនាការណាស់ គឺរាល់លើកតែងតែដាក់ពាក្យឆ្លើយតបចូលមកប្រធានក្រុមប្រឹក្សាជំនុំជម្រះ ដោយផ្តោតលើបញ្ហាសុខភាព ដែលកំពុងសម្រាកព្យាបាលនៅមន្ទីរពេទ្យ គឺដេកក្នុងមន្ទីរពេទ្យច្រើនជាងដេកក្នុងពន្ធនាគារ ដែលមជ្ឈដ្ឋានជាច្រើននិយាយថា គុកខ្ពើមអ្នកមានណាស់ ដេញមិនឱ្យគាត់ដេកទេ ។ ជួនកាលដេកនៅមន្ទីរពេទ្យរុស្ស៊ី ជាប់នឹងប៊ុលឌិញ៩៩៩ ដែលគាត់កំពុងសាងសង់ងាយស្រួលដេកមើល ។ ប៉ុន្តែលើកនេះ ទំនងតុលាការមិនអនុញ្ញាតឲ្យអវត្តមាន ទើបអនុរក្សពន្ធនាគារព្រៃស នាំខ្លួនឧកញ៉ា ថោង សារ៉ាត់ ឲ្យចូលមកសវនាការ ឱ្យបានឃើញមុខម្តងនៅចំពោះមុខអង្គជំនុំជម្រះ ។
ឧកញ៉ា ថោង សារ៉ាត់ ត្រូវបានក្រុមគ្រូពេទ្យនៃមន្ទីរពេទ្យព្រះកុសមៈ លើកដាក់លើរទេះរុញដឹកតាមរថយន្តសង្គ្រោះឡើងទៅកាន់បន្ទប់សវនាការ ពុំមានអ្នកកាសែតក្លាហានណាមួយ មានចិត្តខ្លាហែកថតបានឡើយ ព្រោះឡានចតជិតជណ្តើរយន្តចេញពីឡានចូលជណ្តើរយន្តភ្លាម ។
ខណៈអង្គសវនាការដំណើរការ ជនជាប់ចោទ ថោង សារ៉ាត់ បានស្រែកទ្រហោយំដោយអះអាងថា សុខភាពមិនស្រួល ។ ពេលនោះ ប្រធានក្រុមប្រឹក្សាជំនុំជម្រះបានអនុញ្ញាតឲ្យក្រុមគ្រួពេទ្យចូលពិនិត្យអាការហើយបញ្ជាក់ថា ថោង សារ៉ាត់ ឡើងសម្ពាធឈាមខ្ពស់ ទើបតម្រូវឲ្យដឹកទៅកាន់មន្ទីរពេទ្យព្រះកុសមៈ
វិញ ។ គេសង្កេតឃើញទៀតថា ឧកញ៉ា ថោង សារ៉ាត់ យំសស្រាក់ ហើយត្រូវបានដាក់លើរទេះរុញ ចុះតាមជណ្តើរយន្ត នាំចូលរថយន្តសង្គ្រោះក្នុងសម្លៀកបំពាក់ធម្មតា មិនមែនស្លៀកឈុតអ្នកទោសដូចកូនចៅ៤នាក់នោះទេ ។
ទោះបីជនជាប់ចោទ ថោង សារ៉ាត់ តម្រូវឲ្យទៅសម្រាកនៅមន្ទីរពេទ្យយ៉ាងណាក្តី ក៏ក្រុមប្រឹក្សាជំនុំជម្រះសាលាដំបូងរាជធានីភ្នំពេញ នៅតែដំណើរការបើកសវនាការជំនុំជម្រះក្តីលើសំណុំរឿងនេះជាធម្មតា ក្រោមការសាកសួរដេញដោល ជនជាប់ចោទជាអតីតអង្គរក្ស៤នាក់នោះ ព្រោះជាសវនាការប្រើរយៈពេលច្រើនឆ្នាំមកហើយ ក៏រាប់ការលើកនីតិវិធីជំនុំជម្រះមិនអស់ដែរ ព្រោះច្រើនដងពេក រាប់ដងមិនអស់ទេ ៕
ចែករំលែកព័តមាននេះ