ខេត្តព្រះវិហារ ៖ អភិបាលក្រុងព្រះវិហារបានព្រមានដល់ជនណាដែលនៅតែបន្តចោលសំរាមផ្តេសផ្តាសនៅតាមទីសាធារណៈ ក្នុងក្រុងព្រះវិហារនៅពេលចាប់បាននឹងត្រូវពិន័យតាមផ្លូវច្បាប់ជាធរមាន ដោយគ្មានការលើកលែង ឬអប់រំទៀតឡើយ ។ ការធ្វើបែបនេះដើម្បីធានាបាននូវបរិស្ថានល្អ មានសោភណ្ឌភាព តាមដងផ្លូវសាធារណៈក្នុងក្រុងព្រះវិហារដែលជាបេក្ខភាពមួយក្នុងការប្រឡងប្រណាំងទីក្រុងស្អាត ។
នៅក្នុងយុទ្ធនាការដឹកនាំមន្ត្រីរាជការសិស្សានុសិស្ស ប្រជាពលរដ្ឋ ដើររើសសំរាមតាមទីសាធារណៈ ក្រុងព្រះវិហារអបអរទិវាជាតិទីក្រុងស្អាត លើកទី៧ ក្រោមប្រធានបទ «ទីក្រុងស្អាតទីក្រុងផ្ដល់ភាពកក់ក្ដៅ» កាលពីចុងសប្តាហ៍នេះលោក ឯ សារ៉ូ អភិបាលក្រុងព្រះវិហារ មានប្រសាសន៍ថា បញ្ហាសំរាមនៅតែជាកត្តាចម្បងដែលនាំឱ្យប៉ះពាល់ដល់បរិស្ថាន សោភណ្ឌភាពក្រុង និងប៉ះពាល់ដល់សុខភាពរបស់មនុស្សដោយសារតែកង្វះការយល់ដឹង បុគ្គលមួយចំនួននៅតែគ្មានឆន្ទះក្នុងការចូលរួមសំអាតឬទុកដាក់សំរាមឱ្យបានត្រឹមត្រូវឡើយ ។
ដូច្នេះហើយលោកព្រមានថា អាជ្ញាធរនឹងដាក់អ្នកឃ្លាំមើលជាប្រចាំ ប្រសិនបើឃើញជនណាដែលនៅតែចោលសំរាមផ្តេសផ្តាសគ្មានសណ្តាប់ធ្នាប់ នៅតាមទីសាធារណៈនោះអាជ្ញាធរនឹងចាប់ធ្វើការ ផាកពិន័យយ៉ាងតឹងរឹងតាមអនុក្រិត្យរបស់រាជរដ្ឋាភិបាលដែលបានដាក់ចេញកន្លងទៅ ដោយគ្មានការលើកលែងឬអប់រំធ្វើកិច្ចសន្យាដូចមុនទៀតឡើយ ។
ទោះជាបែបនេះក្តីលោកក៏បានអំពាវនាវឱ្យប្រជាពលរដ្ឋទាំងអស់នៅក្នុងក្រុងព្រះវិហារចូលរួមអនាម័យបរិស្ថាន នៅក្នុងក្រុងព្រះវិហារត្រូវចេះទុកដាក់សំរាមនៅក្នុងធុងសំរាមបានត្រឹមត្រូវក្នុងគោលដៅរក្សាបាននូវសោភ័ណភាពក្រុងប្រកបទៅដោយភាពស្រស់ស្អាត និងគ្មានសំរាម ។
លោក សុត វិបុល ជាប្រជាពលរដ្ឋរស់នៅក្រុងព្រះវិហារ បានសម្តែងនូវការរីករាយបន្ទាប់ពីអាជ្ញាធរក្រុងព្រះវិហារ បានព្រមាននិងប្រើវិធានការក្តៅចំពោះជនណាដែលនៅតែមិនរៀងចាល ចោលសំរាមផ្តេសផ្តាសគ្មានអនាម័យនៅក្នុងក្រុងព្រះវិហារ ។
លោកថា សំរាមដែលបានយកមកបោះចោលនៅតាមទីប្រជុំជនមិនត្រឹមតែបានធ្វើឱ្យបាត់បង់សណ្តាប់ធ្នាប់ សោភណ្ឌភាពក្រុងព្រះវិហារប៉ុណ្ណោះទេ ថែមទាំងបានធ្វើឱ្យ ជះក្លិនមិនល្អ ប៉ះពាល់ដល់សុខភាពមនុស្សយ៉ាងខ្លាំង ។
សូមបញ្ជាក់ថា ក្រុងព្រះវិហារ ជាបេក្ខភាពមួយក្នុងការប្រឡងប្រណាំង ទីក្រុងស្អាត នឹងធ្លាប់ទទួលបាននូវពានរង្វាន់ ផ្ការំដួលមួយទងផងដែរ កាលពីពេលកន្លងទៅនេះ ៕
ចែករំលែកព័តមាននេះ